ಭಯೋತ್ಪಾದನಾ 'ಕ್ಯಾನ್ಸರ್' ದಮನಕ್ಕಾಗಿ ಅಂತಾರಾಷ್ಟ್ರೀಯ ಮಂಡಳಿಯೊಂದನ್ನು ಹುಟ್ಟುಹಾಕುವ ಉದ್ದೇಶದಿಂದ ಭಾರತ ಪ್ರವಾಸದಲ್ಲಿರುವ ಸೌದಿ ಅರೇಬಿಯಾದ ವಿದೇಶಾಂಗ ಸಚಿವರಿಗೆ ಉಗ್ರವಾದಿ ದಾಳಿಯಲ್ಲಿ ಪಾಕಿಸ್ತಾನದ ಕೈವಾಡದ ಕುರಿತು ಭಾರತ ಪುರಾವೆಗಳನ್ನು ನೀಡಿದೆ ಎನ್ನಲಾಗಿದೆ.
ಭಯೋತ್ಪಾದನೆಗೆ ಮುಕ್ತಾಯ ಹಾಡುವಲ್ಲಿ ಇದೀಗ ಭಾರತದೊಂದಿಗೆ ಕೈ ಜೋಡಿಸಿರುವ ಸೌದಿ, ಇದಕ್ಕಾಗಿ ಎಲ್ಲಾ ರಾಷ್ಟ್ರಗಳು ತಕ್ಷಣದ ಮತ್ತು ಪಾರದರ್ಶಕ ಸಹಕಾರ ನೀಡಬೇಕು ಎಂದು ಒತ್ತಾಯಿಸಿದೆ.
ವಿದೇಶಾಂಗ ಸಚಿವ ಪ್ರಣಬ್ ಮುಖರ್ಜಿ ಅವರು ಸೌದಿ ವಿದೇಶಾಂಗ ಸಚಿವ ರಾಜಕುಮಾರ ಸವುದ್ ಆಲ್ ಫೈಸಾಲ್ ಅವರೊಂದಿಗೆ ಮಾತುಕತೆ ನಡೆಸಿದ್ದು, ಮುಂಬೈದಾಳಿಯಲ್ಲಿ ಪಾಕಿಸ್ತಾನದ ಕೈವಾಡ ಕುರಿತ ಸಂಕೀರ್ಣ ಪುರಾವೆಗಳನ್ನು ಒದಗಿಸಿದ್ದು, ದಾಳಿಯ ನಿರ್ಮಾತೃಗಳನ್ನು ನ್ಯಾಯಾಲಯದ ಕಟಕಟೆಗೆ ತರಲು ಬೆಂಬಲ ಯಾಚಿಸಿದರು.
ಪಾಕಿಸ್ತಾನದಲ್ಲಿ ಅಡಗಿಕೊಂಡಿರುವ ಮುಂಬೈ ನರಮೇಧ ಕೃತ್ಯದ ಹಿಂದಿರುವವರನ್ನು ನ್ಯಾಯಾಲಯಕ್ಕೆ ಎಳೆದು ತರಲು ಸೌದಿಯು ಪಾಕಿಸ್ತಾನದ ಮೇಲೆ ಪ್ರಭಾವಬೀರಬೇಕಿರುವ ಅವಶ್ಯಕತೆಯನ್ನು ಮುಖರ್ಜಿ ಅವರು ಅಲ್-ಫೈಸಲ್ ಅವರಿಗೆ ಮನವರಿಕೆ ಮಾಡಿದ್ದಾರೆನ್ನಲಾಗಿದೆ.
ಭಯೋತ್ಪಾದನೆಯು ಕ್ಯಾನ್ಸರ್, ಇದನ್ನು ನಾವು ತೊಡೆದು ಹಾಕಬೇಕಿದೆ ಎಂದ ಸೌದಿ ಸಚಿವರು, ಮುಂಬೈಯಂತಹ ಭಯೋತ್ಪಾದನಾ ದಾಳಿಯ ಕುರಿತಂತೆ ವ್ಯವಹರಣೆಗಾಗಿ ಅಂತಾರಾಷ್ಟ್ರೀಯ ಮಂಡಳಿಯನ್ನು ಹುಟ್ಟುಹಾಕುವಂತೆ ವಿಶ್ವಸಂಸ್ಥೆಯನ್ನು ಒತ್ತಾಯಿಸಿದರು. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ