ಪ್ರಧಾನಿ ಡಾ.ಮನಮೋಹನ್ ಅವರ ಗೈರು ಹಾಜರಿಯಲ್ಲಿ, ರಕ್ಷಣಾ ಸಚಿವ ಎ.ಕೆ.ಆಂಟನಿ, ರಾಷ್ಟ್ರಪತಿ ಪ್ರತಿಭಾ ಪಾಟೀಲ್ ಹಾಗೂ ಈ ಬಾರಿಯ ವಿದೇಶಿ ಅತಿಥಿ ಕಜಕಿಸ್ತಾನದ ಅಧ್ಯಕ್ಷ ನೂರ್ ಸುಲ್ತಾನ್ ಅವರ ಸಮ್ಮುಖದಲ್ಲಿ ಕೆಂಪುಕೋಟೆಯ ಮೇಲೆ 60ನೇ ಗಣರಾಜ್ಯೋತ್ಸವದ ತ್ರಿವರ್ಣ ಧ್ವಜ ಹಾರಿಸಲಾಯಿತು.
ಪ್ರಧಾನಿ ಮನಮೋಹನ್ ಸಿಂಗ್ ಅವರು ಹೃದಯದ ಬೈಪಾಸ್ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರಿಂದ ಈ ಬಾರಿಯ ಗಣರಾಜ್ಯೋತ್ಸವದಲ್ಲಿ ಗೈರು ಹಾಜರಾಗಿದ್ದು, ಅವರ ಸ್ಥಾನವನ್ನು ಔಪಚಾರಿಕವಾಗಿ ರಕ್ಷಣಾ ಸಚಿವ ಎ.ಕೆ.ಆಂಟನಿ ವಹಿಸಿದ್ದಾರೆ.
ರಾಜ್ ಪಥ್ ಮೈದಾನದಲ್ಲಿ ಅದ್ದೂರಿಯಾಗಿ ಸೇನಾ ಕವಾಯತು ನಡೆಯಿತು, ರಾಷ್ಟ್ರಪತಿ ಪ್ರತಿಭಾ ಪಾಟೀಲ್ ಅವರಿಗೆ 21ಕುಶಾಲು ತೋಪುಗಳನ್ನು ಹಾರಿಸುವ ಮೂಲಕ ವಂದನೆ ಸಲ್ಲಿಸಲಾಯಿತು. ಎ.ಕೆ.ಆಂಟನಿ ಅವರು ಅಮರ್ ಜವಾನ್ ಸ್ತೂಪಕ್ಕೆ ನಮನ ಸಲ್ಲಿಸಿದರು.
ಪ್ರತಿಬಾರಿಯ ಸಂಪ್ರದಾಯದಂತೆ 60ನೇ ಗಣರಾಜ್ಯೋತ್ಸವಕ್ಕೆ ಕಜಕಿಸ್ತಾನದ ರಾಷ್ಟ್ರಪತಿ ನೂರ್ ಸುಲ್ತಾನ್ ಅವರನ್ನು ವಿಶೇಷ ಅತಿಥಿಯನ್ನಾಗಿ ಆಹ್ವಾನಿಸಲಾಗಿತ್ತು.
ದೇಶಾದ್ಯಂತ ಗಣರಾಜ್ಯೋತ್ಸವ ಸಂಭ್ರಮ: ದೇಶದ ಎಲ್ಲೆಡೆ, ಶಾಲಾ-ಕಾಲೇಜು, ಅಂಚೆ ಕಚೇರಿ ಸೇರಿದಂತೆ ಖಾಸಗಿ ಸಂಸ್ಥೆಗಳಲ್ಲಿ ತ್ರಿವರ್ಣ ಧ್ವಜ ಹಾರಿಸುವ ಮೂಲಕ 60ನೇ ಗಣರಾಜ್ಯೋತ್ಸವವನ್ನು ಸಂಭ್ರಮದಿಂದ ಆಚರಿಸಲಾಯಿತು.
ಗಣರಾಜ್ಯೋತ್ಸವ ಸಮಾರಂಭದಲ್ಲಿ ವೀರಯೋಧರಿಗೆ ಅಶೋಕ ಚಕ್ರವನ್ನು ಪ್ರದಾನಿಸಲಾಯಿತು.
ಎಲ್ಲೆಡೆ ಸರ್ಪಗಾವಲು: ಗಣರಾಜ್ಯೋತ್ಸವ ನಿಮಿತ್ತ ರಾಜಧಾನಿ ಸೇರಿದಂತೆ ದೇಶದ ಆಯಾ ಕಟ್ಟಿನ ಸ್ಥಳಗಳಲ್ಲಿ ಬಿಗಿ ಬಂದೋಬಸ್ತ್ ಏರ್ಪಡಿಸಲಾಗಿದೆ. ಉಗ್ರರ ದಾಳಿ ನಡೆಯಬಹುದು ಎಂಬ ಮುನ್ನೆಚ್ಚರಿಕೆಯ ಅಂಗವಾಗಿ ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಪೊಲೀಸ್ ವರಿಷ್ಠಧಿಕಾರಿಗಳು ತಿಳಿಸಿದ್ದಾರೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ