ಮುಂಬೈ ದಾಳಿಕೋರರಲ್ಲಿ ಜೀವಂತ ಸೆರೆ ಸಿಕ್ಕಿರುವ ಏಕೈಕ ಉಗ್ರ ಅಜ್ಮಲ್ ಅಮೀರ್ ಕಸಬ್ ಸೋಮವಾರ ಮುಂಬೈನ ವಿಶೇಷ ನ್ಯಾಯಾಲಯದ ಮುಂದೆ ತಾನು ಪಾಕಿಸ್ತಾನದ ಫರೀದ್‌ಕೋಟೆಯ ನಿವಾಸಿ ಎಂದು ಒಪ್ಪಿಕೊಂಡಿದ್ದಾನೆ.
ಮುಂಬೈದಾಳಿಯ ಕುರಿತು ಸೋಮವಾರ ವಿಚಾರಣೆ ಆರಂಭವಾಗಿದೆ. ಮುಂಜಾನೆ ಪ್ರಥಮ ವಿಚಾರಣೆಯ ವೇಳೆ ಆತ ತನಗೆ ವಕೀಲರ ಸೇವೆಯನ್ನು ಬಯಸಿದ್ದಾನೆ. ಎರಡು ತಿಂಗಳ ಹಿಂದೆ ಮುಂಬೈನ ವಕೀಲರ ಸಂಘವು ಕಸಬ್ ಪರ ವಾದಿಸುವುದಿಲ್ಲ ಎಂಬ ಅವಿರೋಧ ನಿರ್ಧಾರ ಕೈಗೊಂಡಿದೆ. ಹಾಗಾಗಿ ಆತನನ್ನು ಇದುವರೆಗೆ ಯಾರೂ ಪ್ರತಿನಿಧಿಸದೇ ರಿಮಾಂಡ್ ವಿಚಾರಣೆ ನಡೆಸಲಾಗಿತ್ತು.
ಅರ್ಥರ್ ರಸ್ತೆ ಜೈಲಿನ ಆವರಣದಲ್ಲಿನ ವಿಶೇಷ ನ್ಯಾಯಾಲಯ ನಿರ್ಮಾಣ ಕಾರ್ಯ ಇನ್ನಷ್ಟೆ ಸಂಪೂರ್ಣಗೊಳ್ಳಬೇಕಿರುವ ಕಾರಣ ಕಸಬ್ ಹಾಗೂ ಪ್ರಕರಣದ ಇನ್ನಿಬ್ಬರು ಆರೋಪಿಗಳ ವಿಚಾರಣೆಯನ್ನು ಮುಂಬೈ ಸೆಷನ್ಸ್ ನ್ಯಾಯಾಲಯದಲ್ಲಿ ವೀಡಿಯೋ ಕಾನ್ಫರೆನ್ಸಿಂಗ್ ಮೂಲಕ ನಡೆಸಲಾಯಿತು.
ಕಸಬ್ ಅಲ್ಲದೆ, ಫಾಹಿಮ್ ಅನ್ಸಾರಿ ಹಾಗೂ ಶಹಾಬುದ್ದೀನ್ ಮೊಹಮ್ಮದ್ ಅವರ ವಿಚಾರಣೆಯನ್ನೂ ನಡೆಸಲಾಯಿತು. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ