ತಮಗೆ ಅಧಿಕಾರವನ್ನು ಹಸ್ತಾಂತರಿಸದ ಜೆಡಿಎಸ್ ವಂಚನೆ ಬಗ್ಗೆ ಜನರಿಗೆ ತಿಳಿಸಲು ಬಿಜೆಪಿ ಧರ್ಮಯಾತ್ರೆಯನ್ನು ಕೈಗೆತ್ತಿಕೊಂಡಿದ್ದರೆ, ಅದರ ಮಾಜಿ ಮಿತ್ರ ಪಕ್ಷ ಜೆಡಿಎಸ್ ರಾಜ್ಯಾದ್ಯಂತ ಅರಿವು ಯಾತ್ರೆಯನ್ನು ಹಮ್ಮಿಕೊಳ್ಳಲು ಮುಂದಾಗಿದೆ.
ಅರಿವು ಯಾತ್ರೆಯ ಮೂಲಕ ಬಿಜೆಪಿಯ ಮರ್ಮವನ್ನು ಬಯಲಿಗೆಳೆದು ಜನರಿಗೆ ತಿಳಿಸುವುದಾಗಿ ಯುವ ಜೆಡಿಎಸ್ ಅಧ್ಯಕ್ಷ ಅರವಿಂದ ಎಂ. ದಳವಾಯಿ ತಿಳಿಸಿದ್ದಾರೆ.
ಪಕ್ಷದ ರಾಷ್ಟ್ತ್ರಿಯ ಅಧ್ಯಕ್ಷ ಎಚ್.ಡಿ.ದೇವೇಗೌಡ, ರಾಜ್ಯಾಧ್ಯಕ್ಷ ಮೆರಾಜುದ್ದೀನ್ ಪಟೇಲ್, ಹಿರಿಯ ಮುಖಂಡ ಎಂ.ಪಿ. ಪ್ರಕಾಶ್ ಮತ್ತು ಮಾಜಿ ಮುಖ್ಯಮಂತ್ರಿ ಎಚ್.ಡಿ.ಕುಮಾರಸ್ವಾಮಿ ಅರಿವು ಯಾತ್ರೆಯಲ್ಲಿ ಪಾಲ್ಗೊಳ್ಳಲಿದ್ದಾರೆ ಎಂದರು.
ಲೋಕಸಭೆಯ ಮಧ್ಯಂತರ ಚುನಾವಣೆ ಸಂಬಂಧ ಬಿಜೆಪಿ ರಾಮಸೇತು ವಿಷಯವನ್ನು ಹೇಳುತ್ತಿದೆ. ವಿಧಾನಸಭೆ ಮಧ್ಯಂತರ ಚುನಾವಣೆಯನ್ನು ಗಮನಿಸಿ ಬಾಬಾ ಬುಡನ್‌ಗಿರಿಯನ್ನು ದತ್ತಪೀಠವನ್ನಾಗಿ ಪರಿವರ್ತಿಸಬೇಕು ಎಂದು ಹೇಳುತ್ತಿದೆ ಎಂದು ಟೀಕಿಸಿದರು.
ಇದು ಬಿಜೆಪಿ ನಾಯಕರ ಬೌದ್ದಿಕ ಮತ್ತು ರಾಜಕೀಯ ದಿವಾಳಿತನಕ್ಕೆ ಸಾಕ್ಷಿಯಾಗಿದೆ ಎಂದು ಹಿಯಾಳಿಸಿದರು.
|
ಸುದ್ದಿ ಜಗತ್ತು > ಸುದ್ದಿಗಳು > ರಾಜ್ಯ ಸುದ್ದಿ
