ಜೆಡಿಎಸ್ ವರಿಷ್ಠ ದೇವೇಗೌಡರು ದೆಹಲಿಗೆ ತೆರಳಿ ಕಾಂಗ್ರೆಸ್ ಬಾಗಿಲಲ್ಲಿ ಕಾದು ನಿಂತಿದ್ದ ಹಿನ್ನೆಲೆಯಲ್ಲಿ ರಾಜ್ಯ ಕಾಂಗ್ರೆಸ್ಸಿಗರ ನಿಲುವೇನಿರಬಹುದು ಎಂಬ ಕುತೂಹಲ ಜನರ ಮುಂದಿರುವಾಗಲೇ ರಾಜ್ಯ ಕಾಂಗ್ರೆಸ್ ನಾಯಕರು ಅದಕ್ಕೆ ತೆರೆ ಎಳೆದಿದ್ದಾರೆ.
ಯಾವುದೇ ಪಕ್ಷದ ನೆರವಿನೊಂದಿಗೆ ಸರ್ಕಾರ ರಚಿಸುವ ಉದ್ದೇಶ ಕಾಂಗ್ರೆಸ್ಗಿಲ್ಲ. ಈ ಹಿಂದೊಮ್ಮೆ ಅಂಥ ಅವಕಾಶ ಬಂದಿದ್ದಾಗಲೇ ನಾವು ನಿರಾಕರಿಸಿದ್ದೆವು. ಇವೆಲ್ಲಾ ನಡೆಯುವ ವಿಷಯವೂ ಅಲ್ಲ. ನಮ್ಮ ಗುರಿ ಏನಿದ್ದರೂ ಹೊಸ ಚುನಾವಣೆ ಎಂದು ಕಾಂಗ್ರೆಸ್ ನಾಯಕ ಧರಂಸಿಂಗ್ ನುಡಿದಿದ್ದಾರೆ.
ಈಗ ಬಿಜೆಪಿ ನೇತೃತ್ವದ ಸರ್ಕಾರ ಬಿದ್ದಿರುವುದು ಆ ಎರಡೂ ಮಿತ್ರ ಪಕ್ಷಗಳ ನಡುವಿನ ಕಚ್ಚಾಟದಿಂದ. ಅದರೆ ಇದಕ್ಕೆ ಕಾಂಗ್ರೆಸ್ ಕಾರಣ ಎಂದು ಆ ಪಕ್ಷಗಳ ಕೆಲ ನಾಯಕರು ಹೇಳುತ್ತಿರುವುದು ಹಾಸ್ಯಾಸ್ಪದ ಸಂಗತಿಯಾಗಿದೆ. ಈ ರೀತಿಯ ಯಾವುದೇ ಘಟನೆ ಸಂಭವಿಸಿದರೂ ಇದಕ್ಕೆ ಕಾಂಗ್ರೆಸ್ ಕಾರಣ, ಅದರ ಪ್ರಚೋದನೆ ಕಾರಣ ಎಂದು ಪದೇ ಪದೇ ಹೇಳುವುದು ಪರಿಪಾಠವಾಗಿದೆ. ಬಿಜೆಪಿ ಪ್ರಯತ್ನ ವಿಫಲವಾದರೆ ಅದಕ್ಕೆ ನಾವು ಹೇಗೆ ಕಾರಣರಾಗುತ್ತೇವೆ ಎಂದು ಈ ಸಂದರ್ಭದಲ್ಲಿ ನಾವು ಕೇಳ ಬಯಸುತ್ತೇವೆ ಎಂದು ಮಲ್ಲಿಕಾರ್ಜುನ ಖರ್ಗೆ ಪ್ರತಿಕ್ರಿಯಿಸಿದ್ದಾರೆ.
ಈ ಕುರಿತು ಹಲವು ಬಾರಿ ಕೇಳಲಾದ ಪ್ರಶ್ನೆಗಳಿಗೆ ನಾನು ಸ್ಪಷ್ಟಪಡಿಸಿದ್ದೇನೆ. ನಮ್ಮಲ್ಲಿ ಸಂಖ್ಯಾಬಲವಿಲ್ಲ. ಆದ್ದರಿಂದ ನಾವು ಸರ್ಕಾರ ರಚಿಸಬೇಕು ಎಂದು ಪ್ರಯತ್ನ ಪಡುವುದಿಲ್ಲ, ಆ ಇಚ್ಛೆಯೂ ನಮಗಿಲ್ಲ. ಹಾಗೇನಾದರೂ ಆದರೆ ನಾವು ಚುನಾವಣೆ ಎದುರಿಸಿ ಬಹುಮತ ಪಡೆಯುತ್ತೇವೆಯೇ ಹೊರತು ಬೇರೆ ಮಾರ್ಗವನ್ನು ಅನುಸರಿಸುವುದಿಲ್ಲ ಎಂದು ಖರ್ಗೆ ಈ ಸಂದರ್ಭದಲ್ಲಿ ನುಡಿದರು.
|
ಸುದ್ದಿ ಜಗತ್ತು > ಸುದ್ದಿಗಳು > ರಾಜ್ಯ ಸುದ್ದಿ
