ಬಂಡಾಯ ಜೆಡಿಎಸ್ ಸಭೆಯತ್ತ ಎಲ್ಲರ ಕಣ್ಣು ಬೆಂಗಳೂರು, ಬುಧವಾರ, 28 ನವೆಂಬರ್ 2007( 11:04 IST )

ಜೆಡಿಎಸ್ ವರಿಷ್ಠ ಮುಖಂಡರ ಯಾವುದೇ ಸಂಧಾನ ಕಾರ್ಯಗಳಿಗೆ ಜಗ್ಗದಿರುವ ಎಂ.ಪಿ.ಪ್ರಕಾಶ್ ಅವರ ಅಸಮಾಧಾನ ಶಮನವಾಗುವ ಯಾವುದೇ ಲಕ್ಷಣಗಳು ಕಾಣಿಸುತ್ತಿಲ್ಲ. ಮಂಗಳವಾರ ಮಾಜಿ ಸಚಿವ ಎಚ್.ಡಿ.ರೇವಣ್ಣ ಹಾಗೂ ಜೆಡಿಎಸ್ ವಕ್ತಾರ ವೈ.ಎಸ್.ವಿ.ದತ್ತಾ ಅವರು ಪ್ರಕಾಶ್ ಜತೆ ನಡೆಸಿದ ಮಾತುಕತೆ ಯಾವುದೇ ಫಲ ನೀಡಿಲ್ಲ. ತದನಂತರ ವರಿಷ್ಠ ದೇವೇಗೌಡರ ಮಾತುಗಳಿಗೂ ಬಗ್ಗಲಿಲ್ಲ ಎಂದು ತಿಳಿದುಬಂದಿದೆ. ಈ ಹಿನ್ನೆಲೆಯಲ್ಲಿ ಇಂದು ಸಂಜೆ ನಡೆಯಲಿರುವ ಪಕ್ಷದ ಸಮಾನ ಮನಸ್ಕರ ಸಭೆಯೆಡೆಗೇ ಎಲ್ಲರ ಕುತೂಹಲದ ಕಣ್ಣುಗಳು ನೆಟ್ಟಿವೆ. ಇದು ಬಂಡಾಯವಲ್ಲ, ಪಕ್ಷ ಒಡೆಯುವ ಕೆಲಸವನ್ನು ಮಾಡುವುದಿಲ್ಲ ಎಂದು ಎಂ.ಪಿ.ಪ್ರಕಾಶ್ ಹೇಳಿದ್ದಾರಾದರೂ ಜೆಡಿಎಸ್‌ನಲ್ಲಿ ಈಗ ಎಲ್ಲವೂ ಮೊದಲಿನಂತಿಲ್ಲ ಎಂಬುದು ಬಹಿರಂಗ ಸತ್ಯ. ಏಕೆಂದರೆ ಪಕ್ಷವನ್ನು ಒಡೆಯುವ ಕೆಲಸವನ್ನು ಮಾಡುವುದಿಲ್ಲ ಎಂದು ಹೇಳಿರುವುದರ ಜತೆಗೆ, ಈಗಾಗಲೇ ಸಾಕಷ್ಟು ದೂರ ಬಂದಿದ್ದೇನೆ, ಹಿಂದೆ ಸರಿಯುವ ಪ್ರಶ್ನೆಯೇ ಇಲ್ಲ ಎಂಬ ಮಾತನ್ನೂ ಪ್ರಕಾಶ್ ಆಡಿರುವುದು ಜೆಡಿಎಸ್ ಎಂಬ ಕನ್ನಡಿಯಲ್ಲಿನ ಒಡಕಲು ಬಿಂಬವನ್ನು ಎತ್ತಿ ತೋರಿಸುತ್ತಿದೆ. ಇತ್ತೀಚಿನ ರಾಜಕೀಯ ವಿದ್ಯಮಾನಗಳಿಂದ ಕೆಲ ಶಾಸಕರು ಬೇಸತ್ತಿದ್ದಾರೆ. 20 ರಿಂದ 30 ಶಾಸಕರು ಈ ಸಮಾನ ಮನಸ್ಕರ ಸಭೆಯಲ್ಲಿ ಪಾಲ್ಗೊಳ್ಳಲಿದ್ದಾರೆ. ತಮ್ಮ ಮುಂದಿನ ಹಾದಿ ಯಾವುದಾಗಬೇಕು ಎಂಬುದರ ಕುರಿತು ಈ ಸಭೆಯಲ್ಲಿ ಚರ್ಚೆ ನಡೆಯಲಿದೆ ಎಂದು ಪ್ರಕಾಶ್ ಹೇಳಿದ್ದಾರಾದರೂ ಆ ಶಾಸಕರು ಯಾರಿರಬಹುದು ಎಂಬ ಅಂಶವೇ ಕುತೂಹಲಕ್ಕೆ ಕಾರಣವಾಗಿದೆ.