ಬಂಗ್ಲೆ ಬಿಡಿ, ಇಲ್ಲವೇ ಬಾಡಿಗೆ ಕೊಡಿ..!! ಬೆಂಗಳೂರು, ಮಂಗಳವಾರ, 4 ಡಿಸೆಂಬರ್ 2007( 17:02 IST )

ಇದು ಯಾವುದೇ ಮಾಫಿಯಾದವರ ಧಮಕಿಯಲ್ಲ. ಕೆಲ ಮಾಜಿ ಸಚಿವರಿಗೆ ಬಂದಿರುವ ನೋಟೀಸು. ಸಚಿವ ಸ್ಥಾನಕ್ಕೆ ರಾಜೀನಾಮೆ ನೀಡಿದ 60 ದಿನಗಳೊಳಗಾಗಿ ಸಂಬಂಧಪಟ್ಟ ಸಚಿವರು ಮನೆ ಖಾಲಿ ಮಾಡಬೇಕಿರುವುದು ಅಗತ್ಯ. ಇಲ್ಲದಿದ್ದರೆ ಅದರ ಬಾಡಿಗೆ, ನೀರು-ವಿದ್ಯುತ್ ಬಿಲ್, ಪೀಠೋಪಕರಣದ ಬಳಕೆಯ ವೆಚ್ಚ ಇವೆಲ್ಲವನ್ನೂ ಅವರು ಪಾವತಿಸಬೇಕಾಗುತ್ತದೆ. ಬಾಡಿಗೆಯೂ ಕೇವಲ ಒಂದೆರಡು ಸಾವಿರ ರೂಪಾಯಿ ಇರುವುದಿಲ್ಲ. ಒಂದೂವರೆಯಿಂದ ಎರಡು ಲಕ್ಷ ರೂಪಾಯಿಗಳವರೆಗೆ ಇರುತ್ತದೆ. ಈ ಹಿನ್ನೆಲೆಯಲ್ಲಿ ಡಿಸೆಂಬರ್ 10ರೊಳಗಾಗಿ ಬಂಗ್ಲೆಗಳನ್ನು ಖಾಲಿ ಮಾಡುವಂತೆ ಸಿಬ್ಬಂದಿ ಮತ್ತು ಆಡಳಿತ ಸುಧಾರಣೆ ಇಲಾಖೆ ಎಲ್ಲ ಮಾಜಿ ಸಚಿವರಿಗೆ ಸೂಚನೆಗಳನ್ನು ನೀಡಿದೆ ಎಂದು ತಿಳಿದುಬಂದಿದೆ. ಮಾಜಿ ಮುಖ್ಯಮಂತ್ರಿ ಕುಮಾರಸ್ವಾಮಿಯವರ ಸಚಿವ ಸಂಪುಟದಲ್ಲಿ ಒಟ್ಟು 34 ಮಂದಿ ಸಚಿವರಿದ್ದರು. ಈ ಪೈಕಿ ಕೇವಲ ನಾಲ್ಕು ಮಂದಿಯನ್ನು ಹೊರತುಪಡಿಸಿ ಉಳಿದವರೆಲ್ಲರೂ ಅಧಿಕೃತ ಬಂಗಲೆಗಳನ್ನು ಪಡೆದಿದ್ದರು ಎಂದು ತಿಳಿದುಬಂದಿದೆ.