ಗೊಂದಲಗಳಿಗೆ ಸದ್ಯದಲ್ಲಿಯೇ ತೆರೆ: ಪುತ್ತಿಗೆ ಶ್ರೀ ಉಡುಪಿ, ಶನಿವಾರ, 15 ಡಿಸೆಂಬರ್ 2007( 12:54 IST )

ಶ್ರೀಕೃಷ್ಣನ ಪೂಜೆ ಮತ್ತು ಪರ್ಯಾಯಕ್ಕೆ ಸಂಬಂಧಿಸಿದ ಎಲ್ಲ ಗೊಂದಲಗಳಿಗೂ ಇದೇ ತಿಂಗಳ 18ರ ವೇಳೆಗೆ ತೆರೆ ಬೀಳಲಿದೆ ಎಂದು ಪುತ್ತಿಗೆ ಮಠದ ಶ್ರೀ ಸುಗುಣೇಂದ್ರ ತೀರ್ಥರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. ಕೆನಡಾ, ಅಮೆರಿಕಾ, ರಷ್ಯಾ, ಆಫ್ರಿಕಾ ಇವೇ ಮೊದಲಾದ ದೇಶಗಳ ಪ್ರವಾಸ ಮುಗಿಸಿ ಬಂದಿರುವ ಶ್ರೀಗಳು ಭಾರತಾದ್ಯಂತ ಪಾದುಕಾ ಸಂಚಾರ ಮುಗಿಸಿದ್ದಾರೆ. ಈಗ ಕರ್ನಾಟಕದಲ್ಲಿ ಸಂಚರಿಸುತ್ತಿರುವ ಅವರು ಇದೇ ತಿಂಗಳ 18ರಂದು ಉಡುಪಿ ಪ್ರವೇಶ ಮಾಡಲಿದ್ದಾರೆ. ಶ್ರೀಕೃಷ್ಣನಿಗೆ ವಜ್ರದ ಕವಚವಿರುವ ರಥದ ಅರ್ಪಣೆ, ನಿರುದ್ಯೋಗಿಗಳಿಗೆ ಉದ್ಯೋಗ ತರಬೇತಿ ಇವೇ ಮೊದಲಾದ ಯೋಜನೆಗಳನ್ನು ಶ್ರೀಗಳು ಹಮ್ಮಿಕೊಂಡಿದ್ದು 12 ಕೋಟಿ ರೂ. ವೆಚ್ಚದಲ್ಲಿ ಉಡುಪಿಯಲ್ಲಿ ಗೀತಾಮಂದಿರ ನಿರ್ಮಿಸುತ್ತಿದ್ದಾರೆ ಎಂದು ತಿಳಿದುಬಂದಿದೆ. ಇದರೊಂದಿಗೆ ಸುಂದರ ಉಡುಪಿ, ಕೃಷ್ಣನ ಉಡುಪಿ ಎಂಬ ವಿಶಿಷ್ಟ ಯೋಜನೆಯನ್ನು ಜಾರಿಗೆ ತರಲು ಶ್ರೀಗಳು ಉದ್ದೇಶಿಸಿದ್ದು ಇದರನ್ವಯ ಉಡುಪಿ ನಗರಸಭೆ, ಸರ್ಕಾರೇತರ ಸ್ವಯಂಸೇವಾ ಸಂಸ್ಥೆಗಳ ಸಹಯೋಗದೊಂದಿಗೆ ಉಡುಪಿ ಸ್ವಚ್ಛತಾ ಕಾರ್ಯ ಪ್ರಾರಂಭವಾಗಲಿದೆ ಎಂದು ಮಠದ ಮೂಲಗಳು ತಿಳಿಸಿವೆ.