ಕುಮಾರಸ್ವಾಮಿಗೆ ನಾಳೆ ಶಸ್ತ್ತ್ರಚಿಕಿತ್ಸೆ ಬೆಂಗಳೂರು, ಬುಧವಾರ, 19 ಡಿಸೆಂಬರ್ 2007( 13:47 IST )

PTI ವೊಕ್ಹಾರ್ಟ್ ಆಸ್ಪತ್ರೆಗೆ ದಾಖಲಾಗಿರುವ ಮಾಜಿ ಮುಖ್ಯಮಂತ್ರಿ ಕುಮಾರಸ್ವಾಮಿಯವರಿಗೆ ನಾಳೆ (ಗುರುವಾರ) ತೆರೆದ ಹೃದಯದ ಶಸ್ತ್ತ್ರಚಿಕಿತ್ಸೆ ನಡೆಯಲಿದೆ.ಹೃದಯಕ್ಕೆ ರಕ್ತ ಸರಬರಾಜು ಮಾಡುವ ರಕ್ತನಾಳದಲ್ಲಿ ಅಡಚಣೆ ಕಾಣಿಸಿಕೊಂಡ ಹಿನ್ನೆಲೆಯಲ್ಲಿ ಆಸ್ಪತ್ರೆಗೆ ದಾಖಲಾಗಿರುವ ಕುಮಾರಸ್ವಾಮಿಯವರಿಗೆ ಡಾ| ವಿವೇಕ್ ಜವಳಿ ನೇತೃತ್ವದ ವೈದ್ಯರ ತಂಡ ಚಿಕಿತ್ಸೆ ನೀಡುತ್ತಿದೆ ಎಂದು ಆಸ್ಪತ್ರೆಯ ಮೂಲಗಳು ತಿಳಿಸಿವೆ. ಇತ್ತೀಚಿನ ರಾಜಕೀಯ ವಿದ್ಯಮಾನಗಳಿಂದ, ಎಡೆಬಿಡದ ಕೆಲಸಗಳ ಕಾರಣಗಳಿಂದ ತೀವ್ರ ಮಾನಸಿಕ ಒತ್ತಡಕ್ಕೆ ಒಳಗಾಗಿದ್ದ ಕುಮಾರಸ್ವಾಮಿ ರಕ್ತನಾಳದ ತೊಂದರೆಗೆ ಸಂಬಂಧಿಸಿದ ಶಸ್ತ್ತ್ರಚಿಕಿತ್ಸೆ ಮಾಡಿಸಿಕೊಳ್ಳಲು ಹಿಂದೇಟುಹಾಕಿದ್ದರು. ಇದು ತೊಂದರೆಯ ಉಲ್ಬಣಕ್ಕೆ ಕಾರಣವಾಗುವ ಲಕ್ಷಣಗಳು ಕಂಡುಬಂದದ್ದರಿಂದ ಆಸ್ಪತ್ರೆಗೆ ದಾಖಲು ಮಾಡಲಾಯಿತು ಎಂದು ತಿಳಿದುಬಂದಿದೆ. ನಾಳೆ ತೆರೆದ ಹೃದಯದ ಶಸ್ತ್ತ್ರಚಿಕಿತ್ಸೆ ನಡೆದ ನಂತ ಕನಿಷ್ಠ 10 ದಿನಗಳ ಕಾಲವಾದರೂ ಆಸ್ಪತ್ರೆಯಲ್ಲಿ ಅವರು ಇರಬೇಕಾಗುತ್ತದೆ. ನಂತರ ಸುಮಾರು 20 ದಿನಗಳ ಕಾಲ ವಿಶ್ರಾಂತಿ ತೆಗೆದುಕೊಳ್ಳಬೇಕಾಗುತ್ತದೆ ಎಂದು ಆಸ್ಪತ್ರೆಯ ಮೂಲಗಳು ತಿಳಿಸಿವೆ.