ಜನತಾ ಜನಾರ್ದನರಲ್ಲಿ ನ್ಯಾಯ ಕೇಳುವೆ: ಪುತ್ತಿಗೆ ಶ್ರೀ ಹಾಸನ, ಬುಧವಾರ, 19 ಡಿಸೆಂಬರ್ 2007( 13:57 IST )

ಪರ್ಯಾಯ ಹಾಗೂ ಶ್ರೀಕೃಷ್ಣ ಪೂಜೆಗೆ ಉಡುಪಿಯ ಅಷ್ಠ ಮಠಗಳು ಅವಕಾಶ ಕಲ್ಪಿಸದಿದ್ದಲ್ಲಿ ಕೊನೆಯದಾಗಿ ಜನರಲ್ಲಿ ನ್ಯಾಯ ಕೇಳುವುದಾಗಿ ಪುತ್ತಿಗೆ ಶ್ರೀಗಳಾದ ಸುಗುಣೇಂದ್ರ ತೀರ್ಥರು ತಿಳಿಸಿದ್ದಾರೆ. ಪರ್ಯಾಯಕ್ಕೆ ಇನ್ನೂ ಒಂದು ತಿಂಗಳ ಕಾಲಾವಕಾಶವಿದೆ. ಅಷ್ಟರೊಳಗಾಗಿ ಈ ವಿವಾದಕ್ಕೆ ತೆರೆ ಬೀಳಬಹುದು ಎಂಬ ವಿಶ್ವಾಸ ತಮ್ಮದು ಎಂದಿರುವ ಶ್ರೀಗಳು, ಶ್ರೀಕೃಷ್ಣ ಪೂಜೆಯನ್ನು ತಡೆಯಲು ಯಾರಿಂದಲೂ ಸಾಧ್ಯವಿಲ್ಲ. ಶ್ರೀಕೃಷ್ಣ ಎಲ್ಲ ಸಮಸ್ಯೆಗಳನ್ನೂ ಬಗೆಹರಿಸಲಿದ್ದಾನೆ ಎಂಬ ಅಭಿಪ್ರಾಯವನ್ನು ವ್ಯಕ್ತಪಡಿಸಿದರು. ಈ ವೈಚಾರಿಕ ಸಂವಾದದಲ್ಲಿ ವೈಚಾರಿಕ ಭಿನ್ನಾಭಿಪ್ರಾಯಗಳಿದ್ದರೂ ಸತ್ವಯುತ ವಿಚಾರಗಳು ಇದರ ಹೂರಣದಲ್ಲಿವೆ. ನಮಗೆ ನಮ್ಮ ದೇಶ ಭಾರತ ಶ್ರೇಷ್ಠವಾದರೆ, ವಿದೇಶಿಯರಿಗೆ ಅವರ ದೇಶವೇ ಮುಖ್ಯ. ಸೃಷ್ಟಿಕರ್ತನ ದೃಷ್ಟಿಯಲ್ಲಿ ಇಡೀ ಪೃಥ್ವಿಯೇ ಪವಿತ್ರ, ಸರ್ವಶ್ರೇಷ್ಠ. ಸಮುದ್ರ ದಾಟಿದ ಮಾತ್ರಕ್ಕೆ ಅಪವಿತ್ರರಾದಂತಾಯಿತು ಎಂಬ ಚಿಂತನೆಗಳನ್ನು ಒಪ್ಪಲಾಗುವುದಿಲ್ಲ ಎಂದು ಶ್ರೀಗಳು ಈ ಸಂದರ್ಭದಲ್ಲಿ ಪುನರುಚ್ಚರಿಸಿದ್ದಾರೆ. ರಾಜಕೀಯದಲ್ಲಿ ನೇರವಾಗಿ ಭಾಗವಹಿಸದೇ ರಾಜಕಾರಣಿಗಳಿಗೆ ಮಠಾಧೀಶರು ಅಗತ್ಯ ಮಾರ್ಗದರ್ಶನ ಕೊಡಬಹುದು. ನಾಡಿನ-ಜನರ ಹಿತದೃಷ್ಟಿಯಿಂದ ಆಡಳಿತ ವ್ಯವಸ್ಥೆಗೆ ಯಾರೇ ಮಾರ್ಗದರ್ಶನ ಕೊಟ್ಟರೂ ತಪ್ಪಿಲ್ಲ ಎಂದು ಶ್ರೀಗಳು ಅಭಿಪ್ರಾಯಪಟ್ಟಿದ್ದಾರೆ.