ವಿಶ್ವೇಶ್ವರಯ್ಯ ನಾಲೆ ಒಡೆದು ಫಸಲು ನಷ್ಟ ಮಂಡ್ಯ, ಬುಧವಾರ, 19 ಡಿಸೆಂಬರ್ 2007( 19:08 IST )

ವಿಶ್ವೇಶ್ವರಯ್ಯ ನಾಲೆ ಒಡೆದಿದ್ದರ ಪರಿಣಾಮವಾಗಿ ರೈತರ ನೂರಾರು ಎಕರೆ ಜಮೀನಿಗೆ ನೀರು ನುಗ್ಗಿ ಲಕ್ಷಾಂತರ ರೂ.ಬೆಲೆಯ ಬೆಳೆ ನಾಶವಾಗಿದೆ ಎಂದು ತಿಳಿದುಬಂದಿದೆ. ಮಂಡ್ಯ ತಾಲ್ಲೂಕಿನ ದುದ್ದ ಸಮೀಪದ ಕನ್ನಹಟ್ಟಿ ಗ್ರಾಮದ ಬಳಿ ಇದು ಸಂಭವಿಸಿದೆ. ಈ ನಾಲೆಯಲ್ಲಿ ಬಿರುಕು ಬಿಟ್ಟಿರುವುದರ ಕುರಿತು ಹದಿನೈದು ದಿನಗಳ ಹಿಂದೆಯೇ ನೀರಾವರಿ ಇಲಾಖಾ ಅಧಿಕಾರಿಗಳ ಗಮನಕ್ಕೆ ತರಲಾಗಿದ್ದರೂ ದುರಸ್ತಿ ಕ್ರಮ ಕೈಗೊಳ್ಳದೆ ಅವರು ನಿರ್ಲಕ್ಷ್ಯ ತೋರಿದ್ದರು ಎಂದು ತಿಳಿದುಬಂದಿದೆ. ಇಂದು ಬೆಳಗ್ಗೆ 9 ಗಂಟೆಯಾದರೂ ನೀರಾವರಿ ಇಲಾಖೆಯ ಯಾವೊಬ್ಬ ಅಧಿಕಾರಿಯೂ ಈ ಸ್ಥಳಕ್ಕೆ ಬಂದಿರಲಿಲ್ಲ. ಬೆಳೆ ನಷ್ಟದಿಂದ ಆಕ್ರೋಶಗೊಂಡಿದ್ದ ರೈತರು ಈ ಕಾರಣದಿಂದಾಗಿ ಆಕ್ರೋಶಗೊಂಡು ಅಧಿಕಾರಿಗಳ ಆಗಮನಕ್ಕಾಗಿ ಕಾಯುತ್ತಿದ್ದುದನ್ನು ಕಾಣಬಹುದಾಗಿತ್ತು. ಕನ್ನಹಟ್ಟಿಯೂ ಸೇರಿದಂತೆ ಶಿವಳ್ಳಿ, ಹುಳ್ಳೇನಹಳ್ಳಿ, ದುದ್ದ ಗ್ರಾಮಗಳಲ್ಲಿ ಸಣ್ಣ ಹಿಡುವಳಿ ರೈತರೇ ಹೆಚ್ಚಾಗಿದ್ದಾರೆ. ನಷ್ಟಕ್ಕೊಳಗಾಗಿರುವ ರೈತರು ಇಂದು ಮಳೆಯನ್ನೂ ಲೆಕ್ಕಿಸದೆ ಅಧಿಕಾರಿಗಳ ವಿರುದ್ಧ ಪ್ರತಿಭಟನೆ ನಡೆಸಿದರು.