ಹಾಲಿ ಸಂಸದೆ ತೇಜಸ್ವಿನಿ ಸಿನೆಮಾ ನಾಯಕಿ ಬೆಂಗಳೂರು, ಗುರುವಾರ, 20 ಡಿಸೆಂಬರ್ 2007( 18:59 IST )

ಖ್ಯಾತ ಪತ್ರಕರ್ತ ರವಿ ಬೆಳಗೆರೆಯವರು ಮುಖ್ಯಮಂತ್ರಿ ಐ ಲವ್ ಯೂ ಎಂಬ ಹೆಸರಿನ ಚಿತ್ರವನ್ನು ನಿರ್ಮಿಸಿ-ನಿರ್ದೇಶಿಸುತ್ತಿರುವ ಸುದ್ದಿಯ ಬಿಸಿ ಆರುವುದರ ಮೊದಲೇ ಅಂತಹ ಮತ್ತೊಂದು ಸುದ್ದಿ ಹೊರಬಂದಿದೆ. ಆದರೆ ಈಗಿನ ಸುದ್ದಿಯ ಹಿನ್ನೆಲೆಯಲ್ಲಿ ಮಾಜಿ ಪತ್ರಕರ್ತೆ, ಹಾಲಿ ಸಂಸದೆ ತೇಜಸ್ವಿನಿ ನಿಂತಿದ್ದಾರೆ. ತೇಜಸ್ವಿನಿ ಎಂಬ ಹೆಸರಿನ ಚಿತ್ರ ಸದ್ಯದಲ್ಲಿಯೇ ಸೆಟ್ಟೇರಲಿದ್ದು, ಮಾಜಿ ಪತ್ರಕರ್ತೆ ತೇಜಸ್ವಿನಿ ಅದರ ನಾಯಕಿ ಪಾತ್ರ ವಹಿಸಲಿದ್ದರೆ, ರಮೇಶ್ ಅರವಿಂದ್ ನಾಯಕ ಪಾತ್ರ ವಹಿಸಲಿದ್ದಾರೆ. ಇದರೊಂದಿಗೆ ಚಲನಚಿತ್ರರಂಗಕ್ಕೆ ಕಾಲಿರಿಸುತ್ತಿರುವ ಪತ್ರಕರ್ತರ ಸಾಲಿಗೆ ತೇಜಸ್ವಿನಿಯವರೂ ಸೇರಿದಂತಾಗಿದೆ. ಈ ಹಿಂದೆ ಪಿ.ಲಂಕೇಶ್, ಅಗ್ನಿ ಶ್ರೀಧರ್, ಎನ್.ಎಸ್.ಶಂಕರ್, ಇಂದ್ರಜಿತ್ ಲಂಕೇಶ್, ರಾಜ್ಹನ್ಸ್ ಬಾಲಚಂದ್ರ ಮೊದಲಾದವರೆಲ್ಲಾ ಚಿತ್ರರಂಗದ ಅಖಾಡಕ್ಕೆ ಇಳಿದವರೇ. ಇದಕ್ಕೆ ನಿರ್ದೇಶಕರಾಗಿ ತೀರಾ ಇತ್ತೀಚಿನ ಸೇರ್ಪಡೆ ರವಿ ಬೆಳಗೆರೆಯವರದಾಗಿತ್ತು. ಪತ್ರಕರ್ತೆಯಾಗಿ ವೃತ್ತಿಜೀವನವನ್ನು ಆರಂಭಿಸಿ, ಟಿವಿ ಚಾನೆಲ್ ವರದಿಗಾರ್ತಿ-ಸಂದರ್ಶಕಿಯಾಗಿ ಮುಂದುವರೆಯುವ ಕಥಾನಾಯಕಿ ಕೊನೆಗೆ ರಾಜ್ಯದ ಮುಖ್ಯಮಂತ್ರಿಯಾಗುವ ಕಥೆಯನ್ನು ಈ ಚಿತ್ರ ಹೊಂದಿದೆ ಎನ್ನಲಾಗಿದೆ. ಇದೊಂದು ಸಕಾರಾತ್ಮಕ ಅಂಶವನ್ನು ಒಳಗೊಂಡ ಚಿತ್ರ. ರಾಜಕೀಯ ರಂಗದಲ್ಲಿ ಸೇವೆ ಸಲ್ಲಿಸಲು ಇರುವ ಅವಕಾಶಗಳು, ಅವುಗಳ ಸದ್ಬಳಕೆ, ಇದರಿಂದ ಸಮಾಜಕ್ಕಾಗುವ ಅನುಕೂಲ ಇವುಗಳನ್ನು ಈ ಚಿತ್ರದ ಮೂಲಕ ಪ್ರೇಕ್ಷಕರ ಮುಂದೆ ತೆರೆದಿಡಲಾಗುವುದು ಎಂದು ತೇಜಸ್ವಿನಿ ತಿಳಿಸಿದ್ದಾರೆ.