ಅವಹೇಳನಕಾರಿ ಗೀತೆ ವಿರೋಧಿಸಿ ಪ್ರತಿಭಟನೆ ಬೆಂಗಳೂರು, ಸೋಮವಾರ, 24 ಡಿಸೆಂಬರ್ 2007( 19:23 IST )

ಬಹು ನೀರೀಕ್ಷೆಯ ಹಾಗೂ ಬಹು ವೆಚ್ಚದ ಪ್ರೀತಿ ಏಕೆ ಭೂಮಿ ಮೇಲಿದೆ ಚಲನಚಿತ್ರವು ಬರುವ ಶುಕ್ರವಾರ ಬಿಡುಗಡೆಯಾಗಲಿದ್ದು, ಮತ್ತೊಮ್ಮೆ ವಿವಾದಕ್ಕೆ ಸಿಲುಕಿದೆ. ಅಶ್ವಿನಿ ಆಡಿಯೋ ಸಂಸ್ಥೆಯವರು ನಿರ್ಮಿಸಿರುವ ಪ್ರೀತಿ ಏಕೆ ಭೂಮಿ ಮೇಲಿದೆ ಚಿತ್ರದಲ್ಲಿ ಶ್ರೀರಾಮ, ರಾಮಾಯಣ ಮತ್ತು ಮಹಾಭಾರತವನ್ನು ಕುರಿತು ಅವಹೇಳನಕಾರಿ ಗೀತೆಗಳನ್ನು ಸೇರಿಸಲಾಗಿದೆ ಎಂದು ಶ್ರೀರಾಮ ಸೇನಾ ಆರೋಪಿಸಿದೆ. ಇದನ್ನು ವಿರೋಧಿಸಿ ವಿಜಯನಗರದಲ್ಲಿರುವ ಅಶ್ವಿನಿ ಅಡಿಯೋ ಸಂಸ್ಥೆಗೆ ಶ್ರೀರಾಮ ಸೇನಾ ವತಿಯಿಂದ ಮುತ್ತಿಗೆ ಹಾಕಲಿದ್ದು, ಅವಹೇಳನಕಾರಿ ಗೀತೆಗಳ ಕುರಿತು ಸೂಕ್ತ ಸ್ಪಷ್ಟೀಕರಣವನ್ನು ನೀಡದಿದ್ದರೆ ರಾಜ್ಯಾದ್ಯಂತ ಚಿತ್ರದ ಬಿಡುಗಡೆಗೆ ತಡೆಯೊಡ್ಡಲಾಗುವುದು ಎಂದು ಶ್ರೀರಾಮಸೇನಾ ಎಚ್ಚರಿಸಿದೆ. ನಿರ್ದೇಶಕ ಪ್ರೇಮ್ ನಾಯಕರಾಗಿ ಮೊದಲಬಾರಿಗೆ ನಟಿಸುತ್ತಿರುವ ಈ ಚಿತ್ರದಲ್ಲಿ ಮಲ್ಲಿಕಾ ಶೆರಾವತ್ ವಿಶೇಷ ನೃತ್ಯವೊಂದರಲ್ಲಿ ಕಾಣಿಸಿಕೊಂಡಿದ್ದಾರೆ ಎಂಬುದನ್ನು ಇಲ್ಲಿ ಸ್ಮರಿಸಬಹುದಾಗಿದೆ.