ನಿಲ್ಲದ ಪ್ರತಿಭಟನೆ : 60 ಮಂದಿ ಬಂಧನ ಹಾವೇರಿ , ಗುರುವಾರ, 3 ಜನವರಿ 2008( 12:20 IST )

ಸಂಗೂರು ಸಕ್ಕರೆ ಕಾರ್ಖಾನೆ ಮುಚ್ಚಿರುವುದನ್ನು ಪ್ರತಿಭಟಿಸಿ ನಡೆಯುತ್ತಿರುವ ಕಾರ್ಮಿಕರ ಚಳುವಳಿ ತಾರಕಕ್ಕೇರಿದೆ. ವಿದ್ಯಾರ್ಥಿ ಸಮುದಾಯ ಬೆಂಬಲ ಘೋಷಿಸಿದ್ದು ಇಂದಿನ ಸಭೆಯಲ್ಲಿ ತಾನೂ ಕೈಜೋಡಿಸುವುದಾಗಿ ಹೇಳಿರುವುದು ಪ್ರತಿಭಟನೆಯ ಕಾವನ್ನು ಏರಿಸಿದೆ. ಪ್ರತಿಭಟನೆಯ ಬಿಸಿ ಈಗಾಗಲೇ 50 ದಿನಗಳನ್ನು ಮುಟ್ಟಿದೆ. ಬಡವರ ರೈತರ ಬದುಕು ಹುಳುಕಾಗಿದೆ. ಸಿಹಿಯಾಗಬೇಕಿದ್ದ ಸಕ್ಕರೆ ಪಟ್ಟಭದ್ರ ಹಿತಾಸಕ್ತಿಗಳಿಂದಾಗಿ ಕಹಿಯಾಗಿದೆ ಎಂದು ಪ್ರತಿಭಟನೆಯ ಮುಂದಾಳತ್ವ ವಹಿಸಿದ್ದ ಚಲನಚಿತ್ರ ನಟ ಅಶೋಕ್ ತೀವ್ರವಾಗಿ ಟೀಕಿಸಿದ್ದಾರೆ. ಪ್ರತಿಭಟನೆ ತೀವ್ರವಾಗುತ್ತಿರುವುದನ್ನು ಮನಗಂಡ ಪೊಲೀಸರು ಲಾಠಿ ಪ್ರಹಾರ ನಡೆಸಿದ್ದು, ಚಿತ್ರನಟ ಅಶೋಕ್, ಕಾರ್ಮಿಕ ನಾಯಕ ಎಂ. ಗೋಪಾಲ್ ಸೇರಿದಂತೆ 60 ಮಂದಿಯನ್ನು ಬಂಧಿಸಿದ್ದಾರೆ. ಈ ನಡುವೆ ಪೊಲೀಸರ ಕ್ರಮಕ್ಕೆ ವ್ಯಾಪಕ ವಿರೋಧ ವ್ಯಕ್ತವಾಗಿದೆ. ಜಿಲ್ಲಾಧಿಕಾರಿಗಳ ಕಛೇರಿಯಲ್ಲಿ ನಡೆದ ಹಾವೇರಿ ಉತ್ಸವದ ಪೂರ್ವಭಾವಿ ಸಿದ್ದತಾ ಸಭೆಯಲ್ಲಿ ಈ ನಿಲುವು ಸ್ಪಷ್ಟವಾಗಿದೆ. ಅಲ್ಲಿ ರೈತರು ಹೊಟ್ಟೆಗೆ ಹಿಟ್ಟಿಲ್ಲದೆ ಸಾಯುತ್ತಿರುವಾಗ ಜುಟ್ಟಿಗೆ ಮಲ್ಲಿಗೆ ಹೂವು ಎಂಬಂತೆ ಹಾವೇರಿ ಉತ್ಸವ ಬೇಕೆ? ಎಂದು ಸಭೆಯಲ್ಲಿ ಜಿಲ್ಲಾಧಿಕಾರಿಗಳನ್ನು ತೀವ್ರವಾಗಿ ತರಾಟೆಗೆ ತೆಗೆದುಕೊಂಡಿದ್ದಾರೆ. ಸಭೆಯಲ್ಲಿ ಮಾತನಾಡಿದ ಪ್ರತಿನಿಧಿಗಳು ಹಾವೇರಿ ಉತ್ಸವ ರದ್ದು ಮಾಡುವಂತೆ ಜಿಲ್ಲಾಧಿಕಾರಿಗಳನ್ನು ಆಗ್ರಹಿಸಿದ್ದಾರೆ ಎನ್ನಲಾಗಿದೆ.