ಬಾಲಭವನ ಖಾಸಗೀಕರಣ ಇಲ್ಲ: ಶಾಲಿನಿ ರಜನೀಶ್ ಬೆಂಗಳೂರು, ಮಂಗಳವಾರ, 8 ಜನವರಿ 2008( 18:52 IST )

ಜವಾಹರ ಬಾಲಭವನ ಖಾಸಗೀಕರಣಗೊಳ್ಳಲಿದೆ ಎಂಬುದು ಕೇವಲ ವದಂತಿ ಎಂದು ಬಾಲಭವನ ಸೊಸೈಟಿ ಅಧ್ಯಕ್ಷೆ ಶಾಲಿನಿ ರಜನೀಶ್ ತಿಳಿಸಿದ್ದಾರೆ.ಸುದ್ದಿಗೋಷ್ಠಿಯಲ್ಲಿ ಮಾತನಾಡುತ್ತಿದ್ದ ಅವರು, ಮಕ್ಕಳ ಸರ್ವತೋಮುಖ ಅಭಿವೃದ್ಧಿಗೆ ಹಲವು ಕಾರ್ಯಕ್ರಮಗಳನ್ನು ಹಮ್ಮಿಕೊಂಡಿರುವ ಬಾಲಭವನ ಹೊಸ ವಿದ್ಯುತ್ ಚಾಲಿತ ಆಟಿಕೆಗಳನ್ನು ಅಳವಡಿಸಲು ಮತ್ತು ರೈಲು ದುರಸ್ತಿಗೊಳಿಸಲು ಯೋಜನೆ ಹಾಕಿದೆ. ಈ ಕಾರ್ಯವನ್ನು ಫನ್ಫೈಲ್ ಸಂಸ್ಥೆಗೆ ವಹಿಸಲಾಗಿದೆ ಎಂದು ಸ್ಪಷ್ಟಪಡಿಸಿದರು. ಬಾಲಭವನದಲ್ಲಿ ಹೊಸ ಆಟಿಕೆಗಳನ್ನು ಅಳವಡಿಸಲು ಈ ಹಿಂದೆ ನೀಡಿದ್ದ ಟೆಂಡರ್ ಮುಕ್ತಾಯಗೊಂಡಿರುವುದರಿಂದ ಹೊಸ ಟೆಂಡರ್ ಕರೆಯಲಾಗಿದೆಯೇ ವಿನಃ ಬಾಲಭವನವನ್ನು ಖಾಸಗೀಕರಣಗೊಳಿಸುವ ಯಾವುದೇ ಉದ್ದೇಶವಿಲ್ಲ ಎಂದು ಶಾಲಿನಿ ರಜನೀಶ್ ತಿಳಿಸಿದರು. ಸುಮಾರು 12 ಎಕರೆ ಪ್ರದೇಶದಲ್ಲಿ ವ್ಯಾಪಿಸಿರುವ ಬಾಲಭವನದಲ್ಲಿ ಹೊಸದಾಗಿ 12 ಆಟಿಕೆಗಳನ್ನು ಅಳವಡಿಸಲು ಹಾಗೂ ಸಂಗೀತ ಕಾರಂಜಿ, ಸ್ಕೇಟಿಂಗ್ ರೋಲ್ ಇತ್ಯಾದಿಗಳನ್ನು ವ್ಯವಸ್ಥೆಮಾಡಲು ನಿರ್ಧರಿಸಲಾಗಿದೆ. ಈ ಎಲ್ಲಾ ಕಾರ್ಯಗಳಿಗಾಗಿ ಸುಮಾರು 3 ಕೋಟಿ ರೂ.ವೆಚ್ಚವಾಗಲಿದೆ ಎಂದು ಅವರು ಈ ಸಂದರ್ಭದಲ್ಲಿ ತಿಳಿಸಿದರು.