ಗೌಡರ ಕಾರಿಗೆ ಡಿಕ್ಕಿ ; ಆತ್ಮಹತ್ಯೆಗೆ ಶರಣು ಬೆಂಗಳೂರು, ಗುರುವಾರ, 10 ಜನವರಿ 2008( 13:52 IST )

ಮಾಜಿ ಪ್ರಧಾನಿ ದೇವೇಗೌಡರ ಕಾರಿಗೆ ಡಿಕ್ಕಿ ಹೊಡೆದ ಪರಿಣಾಮವಾಗಿ ಮನೆಯವರ ನಿಂದನೆಯನ್ನು ಎದುರಿಸಿದ ವ್ಯಕ್ತಿಯೋರ್ವ ಆತ್ಮಹತ್ಯೆಗೆ ಶರಣಾಗಿದ್ದಾನೆ. ಬೆಂಗಳೂರಿನ ಕದಿರೇನಹಳ್ಳಿಯ ರಮೇಶ್ ಎಂಬುವವನೇ ಈ ದುರ್ದೈವಿಯಾಗಿದ್ದು ತನ್ನ ಮನೆಯ ಕೋಣೆಯಲ್ಲಿ ನೇಣುಹಾಕಿಕೊಳ್ಳುವ ಮೂಲಕ ಆತ ಸಾವಿಗೆ ಶರಣಾಗಿದ್ದಾನೆ. ದೇವಾಲಯವೊಂದಕ್ಕೆ ಭೇಟಿ ನೀಡಿ ವಾಪಸ್ ಬರುತ್ತಿದ್ದ ಗೌಡರ ಕಾರಿಗೆ ರಮೇಶ್‌ನ ಮಾರುತಿ ಕಾರು ಢಿಕ್ಕಿಹೊಡೆದಾಗ, ಗೌಡರ ಅಂಗರಕ್ಷಕರು ಹಾಗೂ ಬೆಂಬಲಿಗರು ಅವನ ಮೇಲೆ ಹರಿಹಾಯ್ದರು. ಆದರೆ ಮಧ್ಯ ಪ್ರವೇಶಿಸಿದ ಗೌಡರು ಕಾರನ್ನು ದುರಸ್ತಿ ಮಾಡಿಸಿಕೊಡುವುದಾಗಿ ಭರವಸೆ ನೀಡಿ ವಾಪಾಸಾಗಿದ್ದರು ಎಂದು ತಿಳಿದುಬಂದಿದೆ. ಆದರೂ ಆತನ ಮನೆಯವರು ಈ ಕುರಿತು ತೀವ್ರವಾಗಿ ನಿಂದಿಸಿದಾಗ ಮನನೊಂದಿದ್ದ ಹಾಗೂ ಭಯಗ್ರಸ್ತನಾಗಿದ್ದ ಆತ ನೇಣುಹಾಕಿಕೊಂಡ. ಕಿಟಕಿಯಿಂದ ಇದನ್ನು ನೋಡಿದ ಆತನ ಅತ್ತಿಗೆ ಬೊಬ್ಬೆ ಹಾಕಿದಾಗ ಅಕ್ಕಪಕ್ಕದವರು ಸಹಾಯಕ್ಕೆ ಬರುವಷ್ಟರಲ್ಲಿ ಪರಿಸ್ಥಿತಿ ಚಿಂತಾಜನಕವಾಗಿತ್ತು ಎಂದು ಸುದ್ದಿಮೂಲಗಳು ತಿಳಿಸಿವೆ. ತಕ್ಷಣವೇ ಆತನನ್ನು ಆಸ್ಪತ್ರೆಗೆ ಸೇರಿಸಲಾಯಿತಾದರೂ ಆತ ಮೃತಪಟ್ಟಿದ್ದು ದೃಢವಾಯಿತು. ಕಿಮ್ಸ್ ಆಸ್ಪತ್ರೆಯಲ್ಲಿ ಆತನ ಮರಣೋತ್ತರ ಪರೀಕ್ಷೆ ನಡೆಯಲಿದೆ ಎಂದು ತಿಳಿದುಬಂದಿದೆ.