ಉಳ್ಳಾಲದಲ್ಲಿ ಉಗ್ರರ ಚಲನವಲನ: ವಿಚಾರಣೆಯಲ್ಲಿ ಬಹಿರಂಗ ದಾವಣಗೆರೆ, ಶುಕ್ರವಾರ, 1 ಫೆಬ್ರವರಿ 2008( 10:56 IST )

ಶಂಕಿತ ಉಗ್ರರಾದ ಮಹಮದ್ ಗೌಸ್ ಮತ್ತು ಆತನ ಸಹಚರರಾದ ಅಸಾದುಲ್ಲಾ ಹಾಗೂ ಆಸಿಫ್ ಈ ಹಿಂದೆ ಕರಾವಳಿಗೆ ಭೇಟಿ ನೀಡಿದ್ದರೆಂಬ ಮಾಹಿತಿ ವಿಚಾರಣೆ ವೇಳೆ ಬಹಿರಂಗಗೊಂಡಿದೆ. ಈ ಮೂಲಕ ದಕ್ಷಿಣ ಕನ್ನಡದಲ್ಲೂ ಭಯೋತ್ಪಾದಕರ ಕರಿನೆರಳು ಕಂಡು ಬಂದಿದೆ. ಮಂಗಳೂರಿನ ಉಳ್ಳಾಲದಲ್ಲಿ ಉಗ್ರರು ಕೆಲವು ದಿನಗಳು ತಂಗಿದ್ದು, ಅಲ್ಲಿನ ಸ್ಥಳಗಳನ್ನು ಪರೀಶೀಲಿಸುತ್ತಿದ್ದರು. ಇಲ್ಲಿಯೂ ವಿಧ್ವಂಸಕ ಕೃತ್ಯ ನಡೆಸುವ ಹುನ್ನಾರ ಮಾಡಿದ್ದರು ಎಂಬ ಅಂಶ ಬೆಳಕಿಗೆ ಬಂದಿದೆ ಎಂದು ಮಂಗಳೂರಿನ ಐಜಿಪಿ ತಿಳಿಸಿದ್ದಾರೆ. ಈ ನಡುವೆ, ಆಸಿಫ್ ವಿಚಾರಣೆಯನ್ನು ತೀವ್ರ ಗೊಳಿಸಿರುವ ಪೊಲೀಸರು ಆತ ರಿವಾಲ್ವರ್ ತರಬೇತಿ ಪಡೆಯುತ್ತಿದ್ದ ಜಾಗವನ್ನು ಪರೀಶೀಲಿಸಿದ್ದಾರೆ. ಈತ ಉತ್ತರ ಪ್ರದೇಶದ ಪೊಲೀಸರಿಗೆ ಬೇಕಾಗಿದ್ದ ಎಂದು ತನಿಖೆ ವೇಳೆ ತಿಳಿದು ಬಂದಿದೆ. ಈ ಸಂಬಂಧ ಉತ್ತರ ಪ್ರದೇಶದ ಪೊಲೀಸರು ನಗರಕ್ಕೆ ಆಗಮಿಸಲಿದ್ದಾರೆ ಎಂದು ತಿಳಿದು ಬಂದಿದೆ. ಹೆಚ್ಚಿನ ವಿಚಾರಣೆಯನ್ನು ನಡೆಸುವ ನಿಟ್ಟಿನಲ್ಲಿ ಈ ಉಗ್ರಗಾಮಿಗಳನ್ನು ಬೆಂಗಳೂರಿಗೆ ಕರೆತರಲಿದ್ದು, ಈ ಮೂಲಕ ಹೆಚ್ಚಿನ ಮಾಹಿತಿಗಳು ಬಹಿರಂಗಗೊಳ್ಳುವ ಸಾಧ್ಯತೆಗಳಿವೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.