ಕುಣಿಗಲ್-ಮಾಗಡಿಯಲ್ಲಿ ಅವ್ಯಾಹತ ಆಯಿಲ್ ದಂಧೆ ಕುಣಿಗಲ್ , ಶನಿವಾರ, 9 ಫೆಬ್ರವರಿ 2008( 18:34 IST )

ಪೆಟ್ರೋಲ್ ಮತ್ತು ಡೀಸೆಲ್‌ಗಳ ಕಲೆಬೆರಕೆ ದಂಧೆ ಕುಣಿಗಲ್-ಮಾಗಡಿ ತಾಲ್ಲೂಕುಗಳ ಗಡಿ ಪ್ರದೇಶದಲ್ಲಿ ಅವ್ಯಾಹತವಾಗಿ ನಡೆಯುತ್ತಿದ್ದು ಸ್ಥಳೀಯರು ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಕೆಲ ತಿಂಗಳ ಹಿಂದೆ ಕುಣಿಗಲ್ಲಿನಲ್ಲಿ ಈ ಕಲಬೆರಕೆ ದಂಧೆಯನ್ನು ಮಟ್ಟಹಾಕಲಾಗಿತ್ತು. ಅದರೆ ಈಗ ದಂಧೆ ನಡೆಯುತ್ತಿರುವ ಪ್ರದೇಶ ಮಾಗಡಿ ತಾಲ್ಲೂಕಿನ ವ್ಯಾಪ್ತಿಗೆ ಒಳಪಡುತ್ತದಾದ್ದರಿಂದ ಕುಣಿಗಲ್ ಪೊಲೀಸರು ಅಸಹಾಯಕರಾಗಿದ್ದಾರೆ. ಆದ್ದರಿಂದ ಎರಡೂ ತಾಲ್ಲೂಕುಗಳ ಪೊಲೀಸರು ಈ ಕುರಿತು ಜಂಟಿ ಕಾರ್ಯಾಚರಣೆ ನಡೆಸುವುದರ ಬಗೆಗೆ ಮಾಗಡಿ ತಹಶೀಲ್ದಾರವರಿಗೆ ಪತ್ರ ಬರೆಯಲಾಗಿದೆ ಎಂದು ತಿಳಿದುಬಂದಿದೆ. ಬೆಂಗಳೂರು-ಮಂಗಳೂರು ರಾಷ್ಟ್ರೀಯ ಹೆದ್ದಾರಿಯಲ್ಲಿ, ಮಾಗಡಿ ವ್ಯಾಪ್ತಿಗೆ ಸೇರುವ ದಾಬಾದ ಬಳಿ ಈ ದಂಧೆ ನಡೆಯುತ್ತಿದ್ದು ಟ್ಯಾಂಕ್‌ಗಳಲ್ಲಿ ಬರುವ ಪೆಟ್ರೋಲ್, ಡೀಸೆಲ್‌ಗಳನ್ನು ಇಲ್ಲಿ ಇಳಿಸಿಕೊಂಡು ಅದಕ್ಕೆ ಸೀಮೆ ಎಣ್ಣೆಯನ್ನು ಬೆರೆಸಿ ಮಾರುಕಟ್ಟೆ ದರಕ್ಕಿಂತ 5 ರೂ. ಕಡಿಮೆ ದರದಲ್ಲಿ ಮಾರಾಟ ಮಾಡಲಾಗುತ್ತಿದೆ ಎಂದು ಹೇಳಲಾಗಿದೆ. ಈ ಹಿಂದೆ ಮಂಗಳೂರಿನಲ್ಲಿ ನಡೆದ ಪೊಲೀಸ್ ಎನ್‌ಕೌಂಟರಿನಲ್ಲಿ ಬಲಿಯಾದ ರಫೀಕ್‌ನ ಸಂಬಂಧಿ ಅಜೀಜ್ ಎಂಬಾತ ಈ ದಂಧೆಯಲ್ಲಿ ಪಾಲ್ಗೊಂಡಿದ್ದಾನೆಂದು ಹೇಳಲಾಗಿದ್ದು ಈತನ ಮೇಲೆ ಈಗಾಗಲೇ ಕ್ರಿಮಿನಲ್ ಕೇಸುಗಳಿವೆ ಎಂದು ತಿಳಿದುಬಂದಿದೆ. ಇದು ಗಡಿ ಪ್ರದೇಶವಾದ್ದರಿಂದ ಕುಣಿಗಲ್ ಪೊಲೀಸರ ಕೈ ಕಟ್ಟಿಹಾಕಿದಂತಾಗಿದ್ದು, ಮಾಗಡಿ ತಾಲ್ಲೂಕಿಗೆ ಸೇರಿದ ಪೊಲೀಸರೊಂದಿಗಿನ ಜಂಟಿ ಕಾರ್ಯಾಚರಣೆ ನಡೆಸುವುದು ಸೂಕ್ತ ಎಂಬದು ಸ್ಥಳೀಯರ ಅಭಿಪ್ರಾಯ.