ಫೆ.14ಕ್ಕೆ ಚಿತ್ರೋದ್ಯಮ ಬಂದ್ ಬೆಂಗಳೂರು, ಮಂಗಳವಾರ, 12 ಫೆಬ್ರವರಿ 2008( 12:34 IST )

ರೀಮೇಕ್ ಚಿತ್ರಗಳಿಗೂ ತೆರಿಗೆ ವಿನಾಯಿತಿ ಹಾಗೂ ಎಲ್ಲಾ ಕನ್ನಡ ಚಿತ್ರಗಳಿಗೂ ಸಬ್ಸಿಡಿ ನೀಡಬೇಕು ಎಂದು ಒತ್ತಾಯಿಸಿ ಫೆಬ್ರವರಿ 14ರ ಗುರುವಾರದಂದು ಕನ್ನಡ ಚಿತ್ರೋದ್ಯಮ ಬಂದ್ ನಡೆಸಲು ನಿರ್ಮಾಪಕರ ಸಂಘ ತೀರ್ಮಾನಿಸಿದೆ. ರೀಮೇಕ್ ಚಿತ್ರಗಳಿಗೆ ಸಹಾಯಧನವಾಗಲೀ ಪ್ರಶಸ್ತಿಯಾಗಲೀ ಬೇಡ. ಬದಲಿಗೆ ತೆರಿಗೆ ವಿನಾಯಿತಿ ನೀಡಿದರೆ ಸಾಕು. ಅಷ್ಟೇ ಅಲ್ಲದೇ ರೀಮೇಕ್ ಅಲ್ಲದ, ಅಶ್ಲೀಲತೆಯಿಂದ ಕೂಡಿರದ ಎಲ್ಲಾ ಕನ್ನಡ ಚಿತ್ರಗಳಿಗೂ ಸಹಾಯಧನ ನೀಡಬೇಕು ಎಂದು ಸಂಘ ಒತ್ತಾಯಿಸಿದೆ. ಈ ಬಂದ್‌ಗೆ ಕಲಾವಿದರ ಸಂಘ ಮತ್ತು ನಿರ್ದೇಶಕರ ಸಂಘದಿಂದ ಬೆಂಬಲ ಸಿಕ್ಕಿದ್ದು, ಈಗಾಗಲೇ ಚಿತ್ರೀಕರಣದ ಹಂತದಲ್ಲಿರುವ ಅನೇಕ ನಿರ್ಮಾಪಕರಿಗೆ ಇದರಿಂದ ಉಂಟಾಗಬಹುದಾದ ಸಂಭವನೀಯ ತೊಂದರೆಗಳ ಬಗೆಗೂ ಚರ್ಚಿಸಲು ಮಂಗಳವಾರ ಸಂಜೆ ಸಭೆ ಕರೆಯಲಾಗಿದೆ. ಖ್ಯಾತ ನಿರ್ದೇಶಕ ಗೀರೀಶ್ ಕಾಸರವಳ್ಳಿ ನೇತೃತ್ವದ ಸಮಿತಿಯು ಸಹಾಯಧನ ನೀಡಿಕೆಗೆ ಕೇವಲ 26 ಚಿತ್ರಗಳನ್ನಷ್ಟೇ ಆಯ್ಕೆ ಮಾಡಿರುವ ಕ್ರಮವನ್ನು ಮಲತಾಯಿ ಧೋರಣೆ ಎಂದು ಆಪಾದಿಸಿ ಚಿತ್ರ ನಿರ್ಮಾಪಕ ಭಾ.ಮಾ.ಹರೀಶ್‌ ಅವರು ಈಗಾಗಲೇ ಅಸಮಾಧಾನ ವ್ಯಕ್ತಪಡಿಸಿದ್ದನ್ನು ಇಲ್ಲಿ ಸ್ಮರಿಸಬಹುದಾಗಿದೆ.