ಮಹಿಳೆಯ ಕೊಲೆಗೈದು ಆಭರಣ ಸಹಿತ ಪರಾರಿ ಬೆಂಗಳೂರು, ಗುರುವಾರ, 21 ಫೆಬ್ರವರಿ 2008( 09:56 IST )

ಮನೆಯಲ್ಲಿ ಒಬ್ಬಂಟಿಯಾಗಿದ್ದ ಮಹಿಳೆಯೊಬ್ಹರ ಮೇಲೆ ದುಷ್ಕರ್ಮಿಗಳು ಅತ್ಯಾಚಾರವೆಸಗಿ ಕೊಲೆ ಮಾಡಿ, ಚಿನ್ನಾಭರಣ, ನಗದು ದೋಚಿ ಪರಾರಿಯಾದ ಘಟನೆ ಬೆಂಗಳೂರು ಮಹಾಲಕ್ಷ್ಮಿ ಲೇ ಔಟ್‌ನಲ್ಲಿ ಸಂಭವಿಸಿದ್ದು, ಜನತೆಯ ಆತಂಕ ಹೆಚ್ಚಿದೆ. ಕುರುಬರಹಳ್ಳಿ ಜೆ.ಸಿ.ನಗರದಲ್ಲಿನ ಭಾರತ್ ಗ್ಯಾಸ್ ಗೋಡೌನ್ ಮುಂಭಾಗದಲ್ಲಿ ವಾಸವಾಗಿದ್ದ ಸುಬ್ರಮಣಿ ಎಂಬುವವರ ಪತ್ನಿ ಗೀತಾ(32) ಎಂಬವವರನ್ನು ಅತ್ಯಾಚಾರ ಮಾಡಿ ಕೊಲೆ ಮಾಡಿದ್ದಾರೆ ಎಂದು ಪ್ರಾಥಮಿಕ ಹಂತದ ತನಿಖೆಯಿಂದ ತಿಳಿದು ಬಂದಿದೆ. ಮನೆಯಲ್ಲಿ ಒಬ್ಬರೇ ಇರುವುದನ್ನು ಅರಿತು ಒಳನುಗ್ಗಿದ ದುಷ್ಕರ್ಮಿಗಳು ಎಲೆಕ್ಟ್ರಿಕ್ ವಯರಿನಿಂದ ಕುತ್ತಿಗೆ ಬಿಗಿದು, ದಿಂಬಿನಿಂದ ಒತ್ತಿ ಕೊಲೆ ಮಾಡಿದ್ದಾರೆ. ಬಳಿಕ ಮಾಂಗಲ್ಯ ಸರ, ಚಿನ್ನದ ಸರ, ಎರಡು ಕೈ ಬಳೆ ಹಾಗೂ ಸುಮಾರು 9 ಸಾವಿರ ರೂ. ನಗದು ದೋಚಿ ಆರೋಪಿಗಳು ಪರಾರಿಯಾಗಿದ್ದಾರೆ. ಇತ್ತೀಚೆಗೆ ನಗರದಲ್ಲಿ ಇಂತಹ ಕೊಲೆ ಪ್ರಕರಣಗಳು ದಿನದಿಂದ ದಿನಕ್ಕೆ ಹೆಚ್ಚುತ್ತಿದ್ದು, ಮುಖ್ಯವಾಗಿ ಒಂಟಿ ಮಹಿಳೆಯರನ್ನೇ ಗುರಿಯಾಗಿಟ್ಟುಕೊಂಡು ನಗ ನಾಣ್ಯ ದೋಚುತ್ತಿರುವುದು ಆತಂಕಕ್ಕೆ ಕಾರಣವಾಗಿದೆ.