ದಾಳಿ ಭೀತಿ: ಸಿದ್ದಾರೂಢ ಮಠಕ್ಕೆ ಭದ್ರತೆ ಹುಬ್ಬಳ್ಳಿ, ಗುರುವಾರ, 28 ಫೆಬ್ರವರಿ 2008( 18:59 IST )

ಉಡುಪಿಯ ಕೃಷ್ಣಮಠದ ಸ್ಫೋಟಕ್ಕೆ ಭಯೋತ್ಪಾದಕರು ಸಂಚು ಹೂಡಿದ್ದರು ಎಂಬ ಸುದ್ದಿ ಮಸುಕಾಗುವ ಮುನ್ನವೇ ಮತ್ತೊಂದು ಅಂಥದೇ ಆತಂಕಕಾರಿ ಸುದ್ದಿ ಹುಬ್ಬಳ್ಳಿಯಿಂದ ವರದಿಯಾಗಿದೆ. ಇಲ್ಲಿನ ಸುಪ್ರಸಿದ್ಧ ಸದ್ಗುರು ಸಿದ್ದಾರೂಢ ಮಠದ ಮೇಲೆ ಉಗ್ರರು ದಾಳಿ ನಡೆಸಲು ಸಂಚು ಹೂಡಿದ್ದರು ಎಂಬ ವಿಷಯ ಹೊರಬಿದ್ದಿದ್ದು ಈಗ ಮಠಕ್ಕೆ ಬಿಗಿಭದ್ರತೆ ಒದಗಿಸಲಾಗಿದೆ ಎಂದು ಮಠದ ಮೂಲಗಳು ತಿಳಿಸಿವೆ. ಮಠದ ಟ್ರಸ್ಟ್‌ನ ಚೇರ್ಮನ್ ಬಾಳು ಮಗಜಿಕೊಂಡಿರವರು ಪತ್ರಿಕಾಗೋಷ್ಠಿಯಲ್ಲಿ ಈ ವಿಷಯವನ್ನು ತಿಳಿಸಿ, ಈಗ ಶ್ರೀಮಠದ ಸುರಕ್ಷತೆಗೆ ಯಾವುದೇ ಧಕ್ಕೆ ಬರದಂತೆ ವ್ಯವಸ್ಥೆ ಮಾಡಲಾಗಿದೆ. ಸಾರ್ವಜನಿಕರೂ ಸಹ ಎಂದಿನಂತೆ ಮಠಕ್ಕೆ ಭೇಟಿ ನೀಡಬಹುದು ಎಂದು ತಿಳಿಸಿದ್ದಾರೆ. ಮಠದ ಭದ್ರತಾ ಸಿಬ್ಬಂದಿಯಷ್ಟೇ ಅಲ್ಲದೇ, ಮಠದ ಆವರಣದಲ್ಲಿ ಪೊಲೀಸ್ ಕಾವಲು ಹಾಗೂ ಮಫ್ತಿಯಲ್ಲಿರುವ ಸಿಬ್ಬಂದಿಯನ್ನು ವ್ಯವಸ್ಥೆಗೊಳಿಸಲಾಗಿದೆ. ಜೊತೆಗೆ ಅನುಮಾನಾಸ್ಪದ ವ್ಯಕ್ತಿಗಳ ಮೇಲೆ ಕಣ್ಣಿಡುವಂತೆ ಈಗಾಗಲೇ ಕ್ರಮ ಕೈಗೊಳ್ಳಲಾಗಿದೆ.