ಬಿಜೆಪಿಯ ಹೊಸ ಚುನಾವಣಾ ತಂತ್ರ ಮಾಧ್ಯಮದೊಂದಿಗೆ ಬಾಂಧವ್ಯ ಬೆಂಗಳೂರು, ಸೋಮವಾರ, 7 ಏಪ್ರಿಲ್ 2008( 18:50 IST )

ಚುನಾವಣೆ ಮುಗಿಯುವವರೆಗೂ ಪ್ರತಿದಿನ ಪತ್ರಿಕೆಗಳಲ್ಲಿ ಪಕ್ಷದ ಸುದ್ದಿ ಬರುವಂತೆ ಮಾಡುವ ಹೊಸ ತಂತ್ರಕ್ಕೆ ಕೈಹಾಕಿರುವ ಬಿಜೆಪಿ ಹಾಗೂ ಇದಕ್ಕಾಗಿ ಪಕ್ಷ ಈಗಾಗಲೇ ಎಲ್ಲಾ ಜಿಲ್ಲಾ ಘಟಕಗಳಿಗೆ ಸಂದೇಶ ರವಾನಿಸಿದೆ. ವ್ಯವಸ್ಥಿತ ಮಾಧ್ಯಮ ಪ್ರಚಾರಕ್ಕೆ ಎಲ್ಲಾ 224 ವಿಧಾನಸಭಾ ಕ್ಷೇತ್ರಗಳಲ್ಲಿನ ಪ್ರಚಾರಕ್ಕೆ ಮಾಧ್ಯಮ ಸಂಯೋಜಕರನ್ನು ಪಕ್ಷ ಆಯ್ಕೆ ಮಾಡಿದೆ. ಅಲ್ಲದೆ, ಈ ಬಗ್ಗೆ ಅವರಿಗೆ ತರಬೇತಿಯನ್ನು ನೀಡಲಾಗುತ್ತಿದೆ ಎಂದು ಬಿಜೆಪಿ ಮೂಲಗಳು ತಿಳಿಸಿವೆ. ಪತ್ರಿಕಾಗೋಷ್ಠಿಯನ್ನು ನಡೆಸುವುದು ಹೇಗೆ? ಮಾಧ್ಯಮದವರೊಂದಿಗೆ ಹೇಗೆ ಬಾಂಧವ್ಯ ಬೆಳೆಸಿಕೊಳ್ಳುವುದು ಮೊದಲಾದವುಗಳ ಬಗ್ಗೆ ತರಬೇತಿ ನೀಡುವ ಕಾರ್ಯಕ್ರಮಗಳ ಕುರಿತು ಬಿಜೆಪಿ ಪಾಳಯದಲ್ಲಿ ಬಿರುಸಿನ ಚಟಿವಟಿಕೆ ನಡೆದಿದೆ. ಈ ಮಧ್ಯೆ ಪಕ್ಷಗಳ ಪ್ರಚಾರದಲ್ಲಿ ನೇರವಾಗಿ ವ್ಯವಹರಿಸುವಂತೆ ಮಾಧ್ಯಮ ಸಂಯೋಜಕರಿಗೆ ಸೂಚಿಸಲಾಗಿದ್ದು, ಪಕ್ಷದ ಕಾರ್ಯಕ್ರಮಗಳ ಕುರಿತು ಸ್ಪಷ್ಟವಾಗಿ ಜನರಿಗೆ ಮಾಹಿತಿ ನೀಡಬೇಕು. ಅಲ್ಲದೆ, ಬೇರೆ ಪಕ್ಷಗಳ ಹುಳುಕು ಹುಡುಕುವ ಪ್ರಯತ್ನ ನಡೆಸಬಾರದೆಂದು ಪಕ್ಷದ ವರಿಷ್ಠರು ಜಿಲ್ಲಾ ಸಮಿತಿಗಳಿಗೆ ಈಗಾಗಲೇ ಮಾಹಿತಿ ನೀಡದ್ದಾರೆ.