ಮೈಸೂರಲ್ಲಿ ಬಂಧಿತರಿಗೆ ಪಾಕ್ ಉಗ್ರರ ನಂಟು ಮೈಸೂರು, ಸೋಮವಾರ, 28 ಏಪ್ರಿಲ್ 2008( 19:19 IST )

ಇಲ್ಲಿನ ವಸತಿ ಗೃಹದಲ್ಲಿ ಭಾನುವಾರ ಬಂಧಿಸಲಾಗಿರುವ ಆರು ಮಂದಿ ಉಗ್ರರು ಪಾಕಿಸ್ತಾನ ಉಗ್ರಗಾಮಿ ಸಂಘಟನೆಯಿಂದ ಶ ತರಬೇತಿ ಪಡೆದಿದ್ದರು ಎಂಬ ಆತಂಕಕಾರಿ ವಿಷಯ ವಿಚಾರಣೆ ವೇಳೆ ತಿಳಿದು ಬಂದಿದೆ. ಬಂಧಿತರಲ್ಲಿ ಒಬ್ಬ ಕಮಾಂಡರ್ ಮತ್ತು ಮತ್ತೊಬ್ಬ ಉಪಕಮಾಂಡರ್ ಆಗಿದ್ದ ಎಂದು ಪೊಲೀಸರು ಸ್ಪಷ್ಟ ಪಡಿಸಿದ್ದು, ಉಗ್ರಗಾಮಿಗಳು ಮಣಿಪುರಕ್ಕೆ ಸೇರಿದವರಾಗಿದ್ದಾರೆ. ಅಲ್ಲದೆ, ಈ ಉಗ್ರಗಾಮಿಗಳು ಪೀಪಲ್ಸ್ ಯುನೈಟೆಡ್ ಲಿಬರೇಷನ್ ಫ್ರೆಂಟ್ (ಪಿಯುಎಲ್ಎಫ್) ಸಂಘಟನೆಗೆ ಸೇರಿದವರಾಗಿದ್ದಾರೆ ಎಂದು ತಿಳಿಸಿದರು. ಎರಡು ದಿನಗಳ ಹಿಂದೆ ಮಣಿಪುರದಿಂದ ಕಾರಿನ ಮೂಲಕ ನಗರಕ್ಕೆ ಆಗಮಿಸಿದ್ದ ಉಗ್ರಗಾಮಿಗಳು ಲಾಡ್ಜ್ ಒಂದರಲ್ಲಿ ತಂಗಿದ್ದರು. ಈ ಬಗ್ಗೆ ಮಣಿಪುರದ ಪೊಲೀಸರು ಅರಿತು ಕೂಡಲೇ ನಗರಕ್ಕೆ ಆಗಮಿಸಿ ಸಿಸಿಬಿ ಪೊಲೀಸರ ನೆರವಿನೊಂದಿಗೆ ಆರು ಉಗ್ರರನ್ನು ಬಂಧಿಸಿದ್ದಾರೆ. ಆರೋಪಿಗಳಿಂದ ಶಸ್ತ್ರಾಸ್ತ್ರಗಳನ್ನು ವಶಪಡಿಸಿಕೊಂಡಿದ್ದು, ಮಣಿಪುರದ ಅನೇಕ ಮಹತ್ವದ ಪ್ರಕರಣದಲ್ಲಿ ಈ ಉಗ್ರರು ಭಾಗಿಯಾಗಿದ್ದರು ಎನ್ನಲಾಗಿದೆ. ಬಂಧಿತರನ್ನು ನ್ಯಾಯಾಲಯಕ್ಕೆ ಹಾಜರು ಪಡಿಸಲಾಗಿದ್ದು, ಮೇ ಆರರವರೆಗೆ ಮಣಿಪುರ ಪೊಲೀಸರ ವಶಕ್ಕೆ ಒಪ್ಪಿಸಲಾಗಿದೆ.