ಇಂದು ಕರೀಂ ಲಾಲಾ ತೆಲಗಿ ಬೆಂಗಳೂರಿಗೆ ಬೆಂಗಳೂರು, ಮಂಗಳವಾರ, 13 ಮೇ 2008( 20:40 IST )

ಬಹುಕೋಟಿ ಛಾಪಾಕಾಗದ ಹಗರಣದ ಪ್ರಮುಖ ಆರೋಪಿ ಅಬ್ದುಲ್ ಕರೀಂ ಲಾಲ್ ತೆಲಗಿಯನ್ನು ಮುಂಬೈನ ಯೆರವಾಡ ಜೈಲಿನಿಂದ ಮಂಗಳವಾರ ಬೆಂಗಳೂರು ಕಾರಾಗೃಹಕ್ಕೆ ಕರೆತರಲಾಗುತ್ತಿದೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಹೆಚ್ಚಿನ ವಿಚಾರಣೆ ನಡೆಸುವ ನಿಟ್ಟಿನಲ್ಲಿ ಬೆಂಗಳೂರಿಗೆ ವರ್ಗಾಯಿಸುವಂತೆ ಇತ್ತೀಚೆಗೆ ಮುಂಬೈನ ನ್ಯಾಯಾಲಯವು ವಿಚಾರಣೆ ವೇಳೆ ಆದೇಶ ಹೊರಡಿಸಿತ್ತು. ಆದೇಶದಂತೆ ಕಳೆದ ವಾರವೇ ನಗರಕ್ಕೆ ಕರೆದುಕೊಂಡು ಬರಬೇಕಿತ್ತಾದರೂ, ರಾಜ್ಯದಲ್ಲಿ ಚುನಾವಣೆ ನಡೆಯುತ್ತಿರುವುದರಿಂದ ಭದ್ರತೆ ಸಮಸ್ಯೆಯಾಗಬಹುದೆಂದು ಪೊಲೀಸ್ ಇಲಾಖೆ ತಿಳಿಸಿತ್ತು. ಈ ಮಧ್ಯೆ ಅಬ್ದುಲ್ ಕರೀಂ ತೆಲಗಿ ಕುಟುಂಬ ಬೆಂಗಳೂರಿನಲ್ಲಿ ವಾಸಿಸುತ್ತಿದ್ದು, ತೆಲಗಿಗೆ ಇರುವ ಕಾಯಿಲೆಗೆ ನಗರದಲ್ಲಿಯೇ ಓಷಧಿ ದೊರೆಯುತ್ತದೆ ಎಂಬ ಕಾರಣದಿಂದಾಗಿಯೂ ಬೆಂಗಳೂರಿಗೆ ವರ್ಗಾಯಿಸಲಾಗುತ್ತಿದೆ ಎಂದು ತಿಳಿದು ಬಂದಿದೆ. ರಾಜ್ಯದಲ್ಲಿನ ಒಟ್ಟು 10 ಪ್ರಕರಣಗಳ ಪೈಕಿ ಒಂದರಲ್ಲಿ ತೆಲಗಿಯನ್ನು ದೋಷಮುಕ್ತ ಎಂದು ಇತ್ತೀಚೆಗೆ ನಗರದ ನ್ಯಾಯಾಲಯವೊಂದು ಪ್ರಕಟಿಸಿತ್ತು.