ಮೂರನೇ ಹಂತದ ಮತದಾನ:ಹೆಸರುಗಳು ನಾಪತ್ತೆ   ಹುಬ್ಬಳ್ಳಿ, ಗುರುವಾರ, 22 ಮೇ 2008( 17:54 IST )

ರಾಜ್ಯ ವಿಧಾನಸಭೆಯ ಮೂರನೇ ಹಂತದ ಚುನಾವಣೆಯಲ್ಲಿ ನಗರದ ಕೆಲವು ಮತಗಟ್ಟೆಗಳಲ್ಲಿ ಮತದಾರರ ಹೆಸರು ಪಟ್ಟಿಯಲ್ಲಿ ಇಲ್ಲದೆ ನಿರಾಶೆಗೊಂಡು ಮನೆಗೆ ವಾಪಸ್ಸಾದ ಪ್ರಸಂಗಗಳು ಇಂದು ಮತಗಟ್ಟೆಯಲ್ಲಿ ಕಂಡು ಬಂದವು. ನಗರದ ಹಳೇ ಹುಬ್ಬಳ್ಳಿಯ ಹೆಗ್ಗೇರಿ, ಮಂಟೂರು ರಸ್ತೆ, ಪಿ.ಬಿ. ರಸ್ತೆ ಮತಗಟ್ಟೆಗಳಲ್ಲಿ ಮತದಾನಕ್ಕೆಂದು ಹುರುಪಿನಿಂದ ಮತದಾರರು ತಮ್ಮ ಚುನಾವಣಾ ಗುರುತಿನ ಚೀಟಿಯೊಂದಿಗೆ ಅಗಮಿಸಿದರೆ, ಹೆಸರೇ ನಾಪತ್ತೆ!. ಇದರಿಂದ ಕೆಲವು ಕಡೆಗಳಲ್ಲಿ ಆಕ್ರೋಶಗೊಂಡ ಮತದಾರರು ಪ್ರತಿಭಟನೆಗಿಳಿದ ಘಟನೆ ನಡೆಯಿತು. ಅಲ್ಲದೆ, ಹುಬ್ಬಳ್ಳಿ ಧಾರವಾಡ ಕ್ಷೇತ್ರದ ಮತಗಟ್ಟೆ 57ರಲ್ಲಿ ವಿದ್ಯುನ್ಮಾನ ಮತಯಂತ್ರ ಕೆಟ್ಟ ಕಾರಣ ಕೆಲ ಹೊತ್ತು ಮತದಾನವನ್ನು ಸ್ಥಗಿತಗೊಳಿಸಲಾಗಿತ್ತು. ಉಳಿದಂತೆ ಎಲ್ಲ ಕಡೆಗಳಲ್ಲಿ ಶಾಂತಿಯುತ ಮತದಾನ ನಡೆದಿದೆ ಎಂದು ತಿಳಿದು ಬಂದಿದೆ. ಈ ಮಧ್ಯೆ ಗಾನವಿದೂಷಿ ಡಾ. ಗಂಗೂಬಾಯಿ ಹಾನಗಲ್ ಹುಬ್ಬಳ್ಳಿಯ ದೇಶಪಾಂಡೆ ನಗರದಲ್ಲಿನ ಮತಗಟ್ಟೆಯಲ್ಲಿ ತಮ್ಮ ಹಕ್ಕು ಚಲಾಯಿಸಿದರು. ಇದೇ ಸಂದರ್ಭದಲ್ಲಿ ಮಾತನಾಡಿದ ಅವರು, ಯಾವುದೇ ಪಕ್ಷವಿರಲಿ ಪ್ರಜಾಪ್ರಭುತ್ವದ ಹಕ್ಕಾದ ಮತದಾನವನ್ನು ಮಾಡಿ ಉತ್ತಮ ಸರ್ಕಾರ ರಚನೆಗೆ ಮುಂದಾಗಿ ಎಂದು ಜನತೆಗೆ ಕರೆ ನೀಡಿದರು.