ನಾಟಕ ನೋಡುತ್ತಿದ್ದಾಗ ಚಾವಣಿ ಕುಸಿದು 3 ಸಾವು   ವಿಜಾಪುರ, ಶನಿವಾರ, 31 ಮೇ 2008( 19:57 IST )

ನಾಟಕ ನೋಡಲೆಂದು ಮೇಲ್ಛಾವಣಿಯ ಮೇಲೆ ಕುಳಿತಾಗ ಸಿಮೆಂಟ್ ಶೀಟುಗಳು ಕುಸಿದು ಬಿದ್ದ ಪರಿಣಾಮ ಮೂರು ಮಂದಿ ಮೃತಪಟ್ಟಿದ್ದು, 10 ಮಂದಿ ಗಂಭೀರ ಗಾಯಗೊಂಡಿದ್ದಾರೆ. ಬಸವನಬಾಗೇವಾಡಿಯಿಂದ 15 ಕಿ.ಮೀ. ಅಂತರದಲ್ಲಿರುವ ಹತ್ತರಕಿಹಾಳದಲ್ಲಿ ಈ ಘಟನೆ ಸಂಭವಿಸಿದ್ದು, ಗಾಯಗೊಂಡವರನ್ನು ಸ್ಥಳೀಯ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಘಟನಾಸ್ಥಳದಲ್ಲಿಯೇ ಇಬ್ಬರು ಪ್ರಾಣ ಕಳೆದುಕೊಂಡಿದ್ದರೆ, ಇನ್ನೋರ್ವ ಆಸ್ಪತ್ರೆಯಲ್ಲಿ ಮೃತಪಟ್ಟಿದ್ದಾನೆ ಎಂದು ತಿಳಿದು ಬಂದಿದೆ. ನಾಟಕ ನೋಡಲು ಸುಮಾರು 40 ಮಂದಿ ಗ್ರಾಮಸ್ಥರು ನೆರೆದಿದ್ದ ಸಭಾಂಗಣದಲ್ಲಿ ದಿಢೀರ್ ಮೇಲ್ಛಾವಣಿ ಕುಸಿದಿರುವುದೇ ಈ ದುರ್ಘಟನೆಗೆ ಕಾರಣವಾಗಿದೆ. ಪ್ರಕರಣವನ್ನು ಮನಗೂಳಿ ಪೊಲೀಸರು ದಾಖಲಿಸಿಕೊಂಡಿದ್ದಾರೆ.