ಬಸ್ ಉರುಳಿ ಆರು ಪ್ರಯಾಣಿಕರ ಸಾವು   ಚಿತ್ರದುರ್ಗ, ಗುರುವಾರ, 5 ಜೂನ್ 2008( 18:53 IST )

ಚಿತ್ರದುರ್ಗ: ಹಾಸನದ ಅರಕಲಗೂಡಿನಲ್ಲಿ ಬಸ್ ಅಪಘಾತದಿಂದಾದ ಅನಾಹುತ ಇನ್ನು ಹಸಿರಾಗಿರುವಾಗಲೇ ಇನ್ನೊಂದು ರಸ್ತೆ ಅಪಘಾತ ಸಂಭವಿಸಿದೆ. ಚಾಲಕನ ನಿಯಂತ್ರಣ ತಪ್ಪಿದ ಪರಿಣಾಮ ಖಾಸಗಿ ಬಸ್ಸೊಂದು ಉರುಳಿ ಬಿದ್ದು, ಸ್ಥಳದಲ್ಲಿಯೇ ಆರು ಮಂದಿ ಪ್ರಾಣ ಕಳೆದುಕೊಂಡಿದ್ದು, 20ಕ್ಕೂ ಹೆಚ್ಚು ಮಂದಿ ಗಾಯಗೊಂಡಿದ್ದಾರೆ. ನಾಯಕನಹಟ್ಟಿಯ ಮೇದೆಕ್ರಾಸ್ ಬಳಿ ಇಂದು(ಗುರುವಾರ) ಮಧ್ಯಾಹ್ನದ ಸುಮಾರಿಗೆ ಈ ದುರ್ಘಟನೆ ಸಂಭವಿಸಿದ್ದು, ಗಾಯಗೊಂಡವರನ್ನು ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಗಾಯಗೊಂಡವರಲ್ಲಿ ಕೆಲವರ ಸ್ಥಿತಿ ಚಿಂತಾಜನಕವಾಗಿದೆ ಎಂದು ತಿಳಿದು ಬಂದಿದೆ. ಈಗಾಗಲೇ ಕ್ರೇನ್ ಮೂಲಕ ಬಸ್ ಎತ್ತುವ ಕಾರ್ಯ ನಡೆಸಲಾಗಿದ್ದು, ಸಾವಿನ ಶಂಕೆ ಹೆಚ್ಚುವ ಸಾಧ್ಯತೆಗಳಿವೆ ಎಂದು ತಿಳಿದು ಬಂದಿದೆ. ಘಟನಾ ಸ್ಥಳಕ್ಕೆ ಜಿಲ್ಲಾಧಿಕಾರಿಗಳು ಆಗಮಿಸಿದ್ದು, ಚಾಲಕನ ಬೇಜಾವಾಬ್ದಾರಿಯೇ ಈ ದುರ್ಘಟನೆಗೆ ಕಾರಣ ಎಂದು ತಿಳಿದು ಬಂದಿದೆ.