ಮುಖ್ಯಮಂತ್ರಿ ಹೆಸರಲ್ಲಿ ಅರ್ಚನೆ: ಸಚಿವರಿಗೆ 'ಪೂಜೆ'   ಬೆಂಗಳೂರು, ಶುಕ್ರವಾರ, 13 ಜೂನ್ 2008( 11:12 IST )

ರಾಜ್ಯದ 34 ಸಾವಿರ ದೇವಾಲಯಗಳು ಮುಖ್ಯಮಂತ್ರಿ ಯಡಿಯೂರಪ್ಪನವರ ಹೆಸರಿನಲ್ಲಿ ಪೂಜೆ ಮಾಡಬೇಕು ಎಂದು ದೇವಾಲಯಗಳಿಗೆ ಸುತ್ತೋಲೆ ಕಳುಹಿಸಿದ ಮುಜರಾಯಿ ಖಾತೆ ಸಚಿವ ಶೆಟ್ಟಿ ಅವರಿಗೆ ಗುರುವಾರದ ಸಚಿವ ಸಂಪುಟ ಸಭೆ ಮಂಗಳಾರತಿ ಮಾಡಿದೆ. ಶೆಟ್ಟಿ ಅವರನ್ನು ತರಾಟೆಗೆ ತೆಗೆದುಕೊಂಡ ಮುಖ್ಯಮಂತ್ರಿ ಸೇರಿದಂತೆ ಸಂಪುಟದ ಬಹುತೇಕ ಸಚಿವರು ಇವರ ಬಾಲಿಶ ಕ್ರಮವನ್ನು ಟೀಕಿಸಿದ್ದಾರೆ. ಸಿಎಂ ಈ ನಿರ್ಧಾರದಿಂದ ಅಸಮಾಧಾನಗೊಂಡಿದ್ದಾರೆ. ಇದರ ಬದಲಿಗೆ ರಾಜ್ಯದ ಜನರ ಕಲ್ಯಾಣಕ್ಕಾಗಿ ಪೂಜೆ ಮಾಡಿಸಲು ಮುಜರಾಯಿ ಇಲಾಖೆಗೆ ಸೂಚಿಸಿದರು ಎಂದು ಸಚಿವೆ ಶೋಭಾ ಕರಂದ್ಲಾಜೆ ಸುದ್ದಿಗಾರರಿಗೆ ತಿಳಿಸಿದರು. ಆದರೆ ಸಚಿವ ಶೆಟ್ಟಿ, ಯಡಿಯೂರಪ್ಪನವರ ಮೇಲಿನ ಅಗಾಧ ಪ್ರೀತಿ ತನ್ನ ಈ ನಿಲುವಿಗೆ ಕಾರಣವಾಯಿತೆಂದು ತಮ್ಮನ್ನು ಸಮರ್ಥಿಸಿಕೊಂಡರು. ಯಡಿಯೂರಪ್ಪನವರಿಂದ ಬೆನ್ನು ತಟ್ಟಿಸಿಕೊಳ್ಳಬೇಕೆಂದಿದ್ದ ಶೆಟ್ಟಿ ಮಂಗಳಾರತಿ ಮಾಡಿಕೊಂಡರು.