ಉಡುಪಿಗೆ ಬಂದ ಪದ್ಮಪ್ರಿಯಾ ಪಾರ್ಥಿವ ಶವ   ಮಂಗಳೂರು, ಮಂಗಳವಾರ, 17 ಜೂನ್ 2008( 11:54 IST )

ನಿಗೂಢ ರೀತಿಯಲ್ಲಿ ಆತ್ಮಹತ್ಯೆ ಮಾಡಿಕೊಂಡಿರುವ ಉಡುಪಿ ಶಾಸಕ ರಘುಪತಿ ಭಟ್ ಅವರ ಪತ್ನಿ ಪದ್ಮಪ್ರಿಯಾ ಅವರ ಮೃತದೇಹವನ್ನು ನಗರಕ್ಕೆ ತರಲಾಗಿದೆ. ಈ ಸಂದರ್ಭದಲ್ಲಿ ಶಾಸಕ ರಘುಪತಿ ಭಟ್, ಕಾರ್ಕಳದ ಮಾಜಿ ಶಾಸಕ ಸುನೀಲ್ ಕುಮಾರ್ ಮತ್ತು ಪದ್ಮಪ್ರಿಯಾ ಅವರ ಕುಟುಂಬ ವರ್ಗದವರು ಆಗಮಿಸಿದ್ದಾರೆ. ಬಳಿಕ ಪದ್ಮಪ್ರಿಯಾ ಅವರ ಪಾರ್ಥಿವ ಶರೀರವನ್ನು ವಿಮಾನ ನಿಲ್ದಾಣದಿಂದ ನೇರವಾಗಿ ಉಡುಪಿಗೆ ತರಲಾಗಿದ್ದು, ಇಂದು ಮದ್ಯಾಹ್ನ ಪದ್ಮಪ್ರಿಯಾ ಅವರ ಶವಸಂಸ್ಕಾರ ನಡೆಯಲಿದೆ. ದೆಹಲಿಯಲ್ಲಿ ನಿಗೂಢವಾಗಿ ಆತ್ಮಹತ್ಯೆ ಮಾಡಿಕೊಂಡಿರುವ ಪದ್ಮಪ್ರಿಯಾ ಅವರ ಮೃತದೇಹದ ಮರಣೋತ್ತರ ಪರೀಕ್ಷೆಯ ವರದಿ ಎರಡು ದಿನಗಳಲ್ಲಿ ಪೊಲೀಸರ ಕೈಗೆ ಸೇರಲಿದೆ. ಪದ್ಮಪ್ರಿಯಾ ಸಾವು ಮೇಲ್ನೋಟಕ್ಕೆ ಆತ್ಮಹತ್ಯೆ ಎಂದು ಕಂಡುಬಂದಿದ್ದರೂ, ಮರಣೋತ್ತರ ಪರೀಕ್ಷೆಯ ವರದಿ ಕೈ ಸೇರಿದ ಮೇಲೆ ವಾಸ್ತವಾಂಶ ತಿಳಿಯಲಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಈ ಮಧ್ಯೆ ಪದ್ಮಪ್ರಿಯಾ ಸಾವಿಗೆ ಕಾರಣರಾಗಿರುವ ಪ್ರಮುಖ ಆರೋಪಿ ಎಂದೇ ಪರಿಗಣಿಸಲಾಗಿರುವ ಅತುಲ್ ರಾವ್ ಅವರ ಪತ್ನಿ, ಮಕ್ಕಳು ಹಾಗೂ ತಾಯಿಯನ್ನು ಪೊಲೀಸರು ಗುಪ್ತ ಸ್ಥಳದಲ್ಲಿರಿಸಿದ್ದು, ತೀವ್ರ ವಿಚಾರಣೆ ನಡೆಸುತ್ತಿದ್ದಾರೆ.