ಅಬಕಾರಿ ಉಪಾಯುಕ್ತರ ಮನೆಗೆ ಲೋಕಾಯುಕ್ತ ದಾಳಿ   ಮಂಡ್ಯ, ಬುಧವಾರ, 18 ಜೂನ್ 2008( 11:25 IST )

ಅಬಕಾರಿ ಉಪ ಆಯುಕ್ತ ಎಸ್. ಕೃಷ್ಣಕುಮಾರ್ ಅವರ ಮನೆ ಮೇಲೆ ದಾಳಿ ನಡೆಸಿದ ಲೋಕಾಯುಕ್ತ ಪೊಲೀಸರು ಒಂದು ಕೋಟಿ ರೂ. ನಗದು ಸೇರಿದಂತೆ ಕೋಟ್ಯಂತರ ರೂ. ಮೌಲ್ಯದ ಚಿನ್ನಾಭರಣ ವಶಪಡಿಸಿಕೊಂಡಿದ್ದಾರೆ. ಎಸ್. ನಾಗರಾಜು ಎನ್ನುವವರ ಬಳಿ ಲಂಚ ಸ್ವೀಕರಿಸುತ್ತಿದ್ದ ವೇಳೆ ಕೃಷ್ಣಕುಮಾರ್ ಅವರನ್ನು ಬಂಧಿಸಲಾಗಿದೆ. ಈ ಸಂದರ್ಭದಲ್ಲಿ ಮನೆಯಲ್ಲಿ ಅಪಾರ ಪ್ರಮಾಣ ನಗದು ಹಾಗೂ ಚಿನ್ನಾಭರಣ ಪತ್ತೆಯಾಗಿದೆ. ಪತ್ತೆಯಾದ ಯಥೇಚ್ಛ ಹಣವನ್ನು ತಡರಾತ್ರಿಯವರೆಗೂ ಲೆಕ್ಕ ಮಾಡುತ್ತಿದ್ದ ಲೋಕಾಯುಕ್ತ ಪೊಲೀಸರು ಆರೋಪಿ ಎಸ್. ಕೃಷ್ಣ ಕುಮಾರ್ ರಾತ್ರಿಯೇ ನ್ಯಾಯಾಲಯಕ್ಕೆ ಹಾಜರು ಪಡಿಸಿದರು. ಜಿಲ್ಲೆಯ ಭಾರತೀನಗರದಲ್ಲಿ ವೈನ್ ಸ್ಟೌರ್ ನಡೆಸುತ್ತಿದ್ದ ಎಸ್. ನಾಗರಾಜು, ವೈನ್ಸ್ಟೌರ್ ಪರವಾನಗಿಯನ್ನು ತಮ್ಮ ಬೆಟ್ಟಯ್ಯ ಅವರ ಹೆಸರಿನಿಂದ ತಾಯಿ ಹೆಸರಿಗೆ ಬದಲಿಸಿಕೊಡುವಂತೆ ಅಬಕಾರಿ ಇಲಾಖೆಗೆ ಮನವಿ ಸಲ್ಲಿಸಿದರು. ಈ ಸಂಬಂಧ ತನ್ನಿಂದ ಕೃಷ್ಣಕುಮಾರ್ ಲಂಚ ಕೇಳುತ್ತಿದ್ದಾರೆ ಎಂದು ಆರೋಪಿಸಿದ ನಾಗರಾಜು ಲೋಕಾಯುಕ್ತಕ್ಕೆ ದೂರು ನೀಡಿದ್ದರು. ಈ ಹಿನ್ನೆಲೆಯಲ್ಲಿ ನಾಗರಾಜು ಅವರಿಂದ ಕೃಷ್ಣ ಕುಮಾರ್ ಲಂಚ ಸ್ವೀಕರಿಸುತ್ತಿದ್ದಾಗಲೇ ದಾಳಿ ನಡೆಸಿದ ಲೋಕಾಯುಕ್ತ ಪೊಲೀಸರು ಕೃಷ್ಣ ಕುಮಾರ್ ಅವರನ್ನು ಬಂಧಿಸಿದ್ದಾರೆ.