ಅಪಹೃತ ಬಾಲಕನ ಬಿಡುಗಡೆಗೆ 5 ಲಕ್ಷ ರೂ.ಒತ್ತೆ

ಕೋಲಾರ ಜಿಲ್ಲೆಯ ಮಾಲೂರಿನಿಂದ ಅಪಹರಣಕ್ಕೊಳಗಾಗಿದ್ದ ಬಾಲಕನೊಬ್ಬನನ್ನು ಹೆತ್ತವರು 5ಲಕ್ಷ ರೂ.ಒತ್ತೆ ಹಣ ನೀಡಿ ಬಿಡಿಸಿಕೊಂಡು ಬಂದ ಘಟನೆ ಮಂಗಳವಾರ ನಡೆದಿದೆ. ಜು.24ರಂದು ಕೋಲಾರ ಜಿಲ್ಲೆಯ ನಾಗರಾಜ್ ಎಂಬವರ ಪುತ್ರ ಅನಿಲ್‌‌ ಕುಮಾರ್ ಎಂಬ ಬಾಲಕನನ್ನು ತೊರ್ನೆಹಳ್ಳಿಯಿಂದ ಅಪರಿಚಿತ ವ್ಯಕ್ತಿಗಳು ಅಪಹರಿಸಿದ್ದರು. ಬಾಲಕನನ್ನು ಅಪರಿಸಿದ್ದರೂ ಕೂಡ ಪೋಷಕರು ಪೊಲೀಸರಿಗೆ ಯಾವುದೇ ದೂರನ್ನು ನೀಡಿರಲಿಲ್ಲವಾಗಿತ್ತು. ಏತನ್ಮಧ್ಯೆ ಅಪಹರಣಕಾರರು ಹತ್ತುಲಕ್ಷ ರೂಪಾಯಿ ಒತ್ತೆ ಹಣ ನೀಡಲು ಬೇಡಿಕೆ ಸಲ್ಲಿಸಿದ್ದರು. ಇಲ್ಲದಿದ್ದರೆ ಬಾಲಕನನ್ನು ಸಾಯಿಸುವ ಬೆದರಿಕೆ ಒಡ್ಡಿದ್ದರೆನ್ನಲಾಗಿದೆ. ಪ್ರತಿದಿನ ದೂರವಾಣಿ ಮೂಲಕ ಒತ್ತೆ ಹಣಕ್ಕೆ ಅಪಹರಣಕಾರರು ಒತ್ತಾಯಿಸುತ್ತಿದ್ದರು, ಕೊನೆಗೂ ಐದು ಲಕ್ಷ ರೂ.ನೀಡಲು ನಾಗರಾಜ್ ಅವರು ಒಪ್ಪಿದ್ದರು. ಬಳಿಕ ಹಣವನ್ನು ಅಪರಣಕಾರರಿಗೆ ತಲುಪಿಸಿದ್ದು, ಅವರು ಬಾಲಕನನ್ನು ತಮಿಳುನಾಡಿನ ಕೃಷ್ಣಗಿರಿಯಲ್ಲಿ ಬಿಡುಗಡೆ ಮಾಡಿರುವುದಾಗಿ ಖಾಸಗಿ ಸುದ್ದಿಸಂಸ್ಥೆಯೊಂದರ ವರದಿ ತಿಳಿಸಿದೆ. ಪೊಲೀಸರಿಗೆ ಮಾಹಿತಿ ಇಲ್ಲ: ಜು.24ರಂದೇ ಬಾಲಕ ಅನಿಲ್‌ ಕುಮಾರ್‌ನನ್ನು ಅಪಹರಿಸಲಾಗಿತ್ತು, ಆದರೆ ಪೋಷಕರು ಪೊಲೀಸರಿಗೆ ಮಾತ್ರ ಯಾವುದೇ ಮಾಹಿತಿಯನ್ನು ನೀಡಿರಲಿಲ್ಲವಾಗಿತ್ತು. ಕಾರಣ, ಪೊಲೀಸರಿಗೆ ಮಾಹಿತಿ ಮುಟ್ಟಿಸಿದಲ್ಲಿ, ತಮ್ಮ ಹುಡುಗನ ಜೀವಕ್ಕೆ ಎಲ್ಲಿ ಅಪಾಯವಾಗುತ್ತೋ ಎಂಬ ಭಯದಿಂದ ದೂರು ನೀಡಿರಲಿಲ್ಲವಾಗಿತ್ತಂತೆ.