ನಾಡಿನಾದ್ಯಂತ ನಾಗರಪಂಚಮಿ ಸಂಭ್ರಮ ಬೆಂಗಳೂರು, ಬುಧವಾರ, 6 ಆಗಸ್ಟ್ 2008( 13:23 IST )

ನಾಗರಪಂಚಮಿ ನಾಡಿಗೆ ದೊಡ್ಡದು' ಎಂಬಂತೆ ಬುಧವಾರದಂದು ನಾಡಿನಾದ್ಯಂತ ನಾಗರ ಪಂಚಮಿ ಸಂಭ್ರಮಾಚರಣೆಯಲ್ಲಿದೆ. ಇಂದು ಬೆಳಿಗ್ಗೆನಿಂದಲೇ ನಾಡಿನ ನಾಗದೇವಾಲಯಗಳಿಗೆ ಜನ ತಂಡೋಪತಂಡವಾಗಿ ತೆರಳಿ, ಹುತ್ತಕ್ಕೆ ಹಾಲೆರೆದು ಪೂಜೆ -ಪುನಸ್ಕಾರ ಸಲ್ಲಿಸಿದರು. ಶ್ರಾವಣ ಮಾಸದ ಮೊದಲ ಹಬ್ಬ ಎನಿಸಿಕೊಂಡ ನಾಗರಪಂಚಮಿ ಸಂಭ್ರಮ ಎಲ್ಲೆಡೆಯಲ್ಲಿ ಕಂಡು ಬಂತು. ಬೆಂಗಳೂರು, ಮಂಗಳೂರು, ಕುಕ್ಕೆಸುಬ್ರಹ್ಮಣ್ಯ ಸೇರಿದಂತೆ ನಾಡಿನ ಪ್ರಮುಖ ದೇವಾಲಯಗಳಲ್ಲಿ ಜನರು ತಮ್ಮ ಹರಕೆಯನ್ನು ಸಲ್ಲಿಸಿ, ಹಬ್ಬವನ್ನು ಆಚರಿಸಿದರು. ವಿಶಿಷ್ಟ ರೀತಿಯಲ್ಲಿ ಹಬ್ಬದ ಆಚರಣೆ: ದಿಟ ನಾಗರ ಕಂಡರೆ ಹೊಡೆ, ಹೊಡೆ ಎಂಬ ಜನ ಕಲ್ಲ ನಾಗರ ಕಂಡರೆ ಹಾಲೆರೆಯುವರಯ್ಯ ಎಂಬ ಶರಣರ ವಚನದಂತೆ ಜನ ತಮ್ಮ ಮೌಢ್ಯವನ್ನು ತೋರ್ಪಡಿಸುವ ವಿರುದ್ಧ ಚಿತ್ರದುರ್ಗ ಮುರುಘಾಮಠದ ಶಿವಮೂರ್ತಿ ಶರಣರು ಆಕ್ರೋಶ ವ್ಯಕ್ತಪಡಿಸಿ, ನಾಗರ ಪಂಚಮಿಯನ್ನು ವಿಶಿಷ್ಟವಾಗಿ ಆಚರಿಸಿದ್ದಾರೆ. ಕಲ್ಲ ನಾಗರಕ್ಕೆ, ಹುತ್ತಕ್ಕೆ ಹಾಲೆರೆಯುವುದು ಮೌಢ್ಯದ ಪರಮಾವಧಿ ಎಂದು ಟೀಕಿಸಿದ ಅವರು,ನಾಗರಪಂಚಮಿ ದಿನದಂದು ಅವರು ನಿರಾಶ್ರಿತ ಮಕ್ಕಳಿಗೆ ಹಾಲು,ಬ್ರೆಡ್ ನೀಡುವ ಮೂಲಕ ಹಬ್ಬವನ್ನು ವಿಶಿಷ್ಟವಾಗಿ ಆಚರಿಸಿದ್ದಾರೆ.