ಕಾನೂನಿನ್ವಯ ತಮಿಳುನಾಡಿಗೆ ನೀರು:ಸಿಎಂ ಬೆಂಗಳೂರು, ಭಾನುವಾರ, 10 ಆಗಸ್ಟ್ 2008( 12:05 IST )

ಕಾನೂನಿನ ಮಿತಿಯೊಳಗೆ ನಿಗದಿಸಲ್ಪಟ್ಟ ಪ್ರಮಾಣದ ನೀರನ್ನು ಕಾವೇರಿ ನದಿ ಪಾತ್ರದಿಂದ ತಮಿಳುನಾಡಿಗೆ ಬಿಡಲೇಬೇಕು. ಅದನ್ನು ತಡೆಯಲು ಸಾಧ್ಯವಿಲ್ಲ ಎಂದು ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಸಮರ್ಥಿಸಿಕೊಂಡಿದ್ದಾರೆ. ಹಿಂದಿನ ಯಾವ ಸರ್ಕಾರ ತಮಿಳುನಾಡಿಗೆ ನೀರು ಬಿಟ್ಟಿಲ್ಲ. ಕಾನೂನಿನಂತೆ ನೀರನ್ನು ಕಾವೇರಿ ನದಿಯಿಂದ ತಮಿಳುನಾಡಿಗೆ ಬಿಡುಗಡೆ ಮಾಡಲಾಗುತ್ತಿದೆ ಎಂದು ಸುದ್ದಿಗಾರರಿಗೆ ತಿಳಿಸಿದರು. ಪ್ರತಿ ಪಕ್ಷಗಳು ಈ ಬಗ್ಗೆ ಟೀಕೆ ಮಾಡುತ್ತಿವೆ. ಆದರೆ ಅವರ ಸರ್ಕಾರವಿದ್ದಾಗ ಕೂಡಾ ನೀರು ಬಿಡಲಾಗಿತ್ತು ಎಂದರು. ಇಲ್ಲಿಯವರೆಗೆ ಎಷ್ಟು ಟಿಎಂಸಿ ನೀರು ತಮಿಳುನಾಡಿಗೆ ಹರಿದುಹೋಗಿದೆ ಎಂಬ ಬಗ್ಗೆ ತಮ್ಮ ಬಳಿ ಈಗ ಮಾಹಿತಿ ಇಲ್ಲ. ಆದರೂ ಕಾನೂನಿನ ಪ್ರಕಾರ ನೀರು ಬಿಡಬೇಕಾಗುತ್ತದೆ. ತದಡಿ ಸೇರಿದಂತೆ ಇತರ ಕಡೆಗಳ ವಿದ್ಯುತ್ ಯೋಜನೆಗಳನ್ನು ಪರಿಸರವಾದಿಗಳ ಮನವೊಲಿಸಿ ಮಾಡಲಾಗುತ್ತದೆ ಎಂದರು.