ಒಂದು ಬಾರಿ ರಸ್ತೆಗೆ ಡಾಂಬಾರು ಹಾಕಿದ ಮೇಲೆ ಮತ್ತೆ ಅದೇ ರಸ್ತೆಗೆ ಟಾರು ಹಾಕುತ್ತೀರಾ ಆದರೂ ರಸ್ತೆಗಳು ಹಾಳಾಗುತ್ತವೆ. ಕಟ್ಟಿದ ಕಟ್ಟಡಗಳು ಕುಸಿದು ಬೀಳುತ್ತವೆ. ಇದನ್ನು ಮಾಡಲು ಇಂಜಿನಿಯರಿಂಗ್ ಓದಬೇಕೆ?ನಿಮಗೆ ನಾಚಿಕೆಯಾಗುವುದಿಲ್ಲವೆ ?ಏನ್ ಕತ್ತೆ ಕಾಯುತ್ತಿದ್ದೀರಾ?ಎಂದು ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಇಂಜಿನಿಯರ್, ಅಧಿಕಾರಿಗಳ ವಿರುದ್ಧ ಕಿಡಿಕಾರಿದ ಪರಿ ಇದು.
ಮೊದಲು ರಸ್ತೆ ಮಾಡುವುದು, ಆ ಮೇಲೆ ಪೈಪ್ ಹಾಕುವುದು, ಮತ್ತೆ ರಸ್ತೆ ಮಾಡುವುದು ಇದೆಲ್ಲಾ ಇವತ್ತಿಗೆ ಮುಗಿಯಬೇಕು. ಪ್ರತಿದಿನ ಕಾಮಗಾರಿಗಳ ಸ್ಥಳಕ್ಕೆ ಭೇಟಿ ನೀಡಬೇಕು. ಕಾಮಗಾರಿಗಳ ಪ್ರಗತಿ ವೀಕ್ಷಿಸಬೇಕು, ನಂತರ ವರದಿ ನೀಡಲೇಬೇಕು. ಏಕೆ ಇದಕ್ಕೆಲ್ಲ ಸಂಬಳ ತೆಗೆದುಕೊಳ್ಳುವುದು ಎಂದು ತರಾಟೆಗೆ ತೆಗೆದುಕೊಂಡರು.
ಅಬೈಡ್ ನಮ್ಮ ಬೆಂಗಳೂರು ಉಪಕ್ರಮ ಯೋಜನೆ2020 ಅಡಿಯಲ್ಲಿ ವಿವಿಧ ಯೋಜನೆಗಳ ನಗರ ಪಾಲಿಕೆ ಆವರಣದಲ್ಲಿ ಶಂಕು ಸ್ಥಾಪನೆ ನೆರವೇರಿಸಿ ಅವರು ಮಾತನಾಡಿದರು.
ತಮ್ಮ ಭಾಷಣದದ್ದಕೂ ಇಂಜಿನಿಯರ್,ಅಧಿಕಾರಿಗಳ ವಿರುದ್ಧ ಕಿಡಿ ಕಾರಿದ ಅವರು, ವಿಶ್ವೇಶ್ವರಯ್ಯ ಅವರು ಕನ್ನಂಡಬಾಡಿ ಕಟ್ಟೆ ಕಟ್ಟಿದರು, ಅಂತಹ ಒಂದು ಕಟ್ಟೆ ಕಟ್ಟಲು ಆಗುತ್ತದೆಯೇ, ಅಲ್ಲಿಂದ ಒಂದೇ ಒಂದು ಕಲ್ಲು ಕಿತ್ತುಕೊಂಡು ಬರಲು ನಿಮ್ಮಿಂದ ಸಾಧ್ಯವಾಗುತ್ತದೆಯೇ ಎಂದು ಪ್ರಶ್ನಿಸಿದರು.
ಶೀಘ್ರವಾಗಿ ಕೆಲಸ ಮಾಡಿ, ಶೀಘ್ರವಾಗಿ ಬಿಲ್ ಡ್ರಾ ಮಾಡಿ ನಾನು ಅಡ್ಡಿ ಪಡಿಸುವುದಿಲ್ಲ, ಜನರು ಇನ್ನೂ ಸೈರಣೆಯಿಂದ ಇರುವುದಿಲ್ಲ ಎಂದು ಅಧಿಕಾರಿಗಳಿಗೆ ಎಚ್ಚರಿಕೆ ನೀಡಿದರು. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ