ಪಬ್ ದಾಳಿ ಪ್ರಕರಣ, ಶ್ರುತಿ ಅಪಹರಣದ ಘಟನೆಯಿಂದ ತೀವ್ರ ಮುಖಭಂಗಕ್ಕೀಡಾಗಿದ್ದ ಆಡಳಿತಾರೂಢ ಸರ್ಕಾರವೀಗ ಮತ್ತೊಂದು ಸಮಸ್ಯೆಯ ಸುಳಿಗೆ ಸಿಲುಕುವಂತಾಗಿದೆ. ಯುವತಿಯೊಬ್ಬಳು ಅನ್ಯಕೋಮಿನ ಹುಡುಗನೊಂದಿಗೆ ಸಲುಗೆಯಿಂದ ಮಾತನಾಡುತ್ತಿದ್ದಾಗ ಸಂಘ ಪರಿವಾರದ ಪಟಾಲಂ ಅವರನ್ನು ಹಿಡಿದು ಪೊಲೀಸರ ಕೈಗೊಪ್ಪಿಸಿದ್ದು, ಇದರಿಂದಾಗಿ ಬಾಲಕಿ ಸಾರ್ವಜನಿಕರೆದುರು ಅವಮಾನಿತಳಾಗಿ ನೇಣಿಗೆ ಶರಣಾದ ಘಟನೆ ನಡೆದಿದೆ.
ಕಿನ್ನಿಗೋಳಿಯ ಐಕಳ ಹೈಸ್ಕೂಲ್‌ನ 9ನೇ ತರಗತಿಯಲ್ಲಿ ಕಲಿಯುತ್ತಿರುವ 16ರ ಹರೆಯದ ವಿದ್ಯಾರ್ಥಿನಿ ಅಶ್ವಿನಿ ಎಂಬಾಕೆ ಆಕೆಯ ಸ್ನೇಹಿತೆ ಮಹಾದೇವಿಯೊಂದಿಗೆ ಬಸ್ ಕಂಡೆಕ್ಟರ್ ಹಾಗೂ ಮಾಲಿಕನಾಗಿರುವ ಸಲೀಂ ಎಂಬಾತನನ್ನು ಭೇಟಿ ಮಾಡುವ ಸಲುವಾಗಿ ಮೂಡುಬಿದಿರೆ ಸಮೀಪದ ಮರೂರು ಎಂಬಲ್ಲಿಗೆ ಮಂಗಳವಾರ ಪ್ರಯಾಣ ಬೆಳೆಸಿದ್ದರು.
ಈ ನಡುವೆ ಶಂಕೆಗೊಳಗಾದ ಸಂಘ ಪರಿವಾರದ ಕಾರ್ಯಕರ್ತರು ಬಸ್ ನಿಲ್ಲಿಸಿ ಸಲೀಂ ಸೇರಿದಂತೆ ಇಬ್ಬರನ್ನೂ ಮರೂರು ಪೊಲೀಸ್ ಠಾಣೆಗೆ ಕರೆದೊಯ್ದಿದ್ದರು. ಆಮೇಲೆ ಅಶ್ವಿನಿಯವರ ಹೆತ್ತವರಿಗೆ ದೂರವಾಣಿ ಮೂಲಕ ಕರೆಯಿಸಿ ಹೆತ್ತವರ ಕೈಗೊಪ್ಪಿಸಿದ್ದರು. ಈ ಘಟನೆ ನಡೆದ ಬಳಿಕ ತನಗಾದ ಅವಮಾನವನ್ನು ತಾಳಲಾರದೆ ಆಕೆ ನೇಣಿಗೆ ಶರಣಾಗಿದ್ದಳು.
ಆದರೂ, ಅಶ್ವಿನಿಯ ತಂದೆ ಸಲೀಂ ವಿರುದ್ಧ ತನ್ನ ಮಗಳಿಗೆ ಆಮಿಷವೊಡ್ಡಿ ಅತ್ಯಾಚಾರ ಎಸಗಿರುವುದಾಗಿ ದೂರು ನೀಡಿದ್ದು ಐಪಿಸಿ 376 ಮತ್ತು 305 ಕಾಯ್ದೆಯಡಿಯಲ್ಲಿ ಸಲೀಂ ವಿರುದ್ಧ ಮೊಕದ್ದಮೆ ದಾಖಲಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ