ಕೊಲೆ ಹಾಗೂ ಅತ್ಯಾಚಾರ ಪ್ರಕರಣದ ಆರೋಪ ಎದುರಿಸುತ್ತಿದ್ದ ವಿಕೃತಕಾಮಿ ಉಮೇಶ್ ರೆಡ್ಡಿಗೆ ಬುಧವಾರ ಹೈಕೋರ್ಟ್‌ನ ಏಕಸದಸ್ಯ ನ್ಯಾಯಪೀಠ ಗಲ್ಲುಶಿಕ್ಷೆಯನ್ನು ವಿಧಿಸಿ ತೀರ್ಪು ನೀಡಿದೆ.ಈತ ಬಿಡುಗಡೆಯಾದರೆ ಸಮಾಜಕ್ಕೆ ಮತ್ತಷ್ಟು ಅಪಾಯ ಇದೆ ಎಂದು ಅಭಿಪ್ರಾಯಪಟ್ಟಿರುವ ಏಕಸದಸ್ಯಪೀಠದ ನ್ಯಾಯಮೂರ್ತಿಗಳಾದ ಎಸ್.ಆರ್.ಬನ್ನೂರ್‌ಮಠ ಅವರು ಮರಣದಂಡನೆಯನ್ನು ವಿಧಿಸಿದರು.21 ಕೇಸುಗಳು ಉಮೇಶ್ ರೆಡ್ಡಿ ಮೇಲೆ ದಾಖಲಾಗಿದ್ದು, ಕೊಲೆ ಮತ್ತು ಅತ್ಯಾಚಾರ ಪ್ರಕರಣದಿಂದ ಬೆಚ್ಚಿಬೀಳಿಸಿದ್ದ ಉಮೇಶ್ ರೆಡ್ಡಿಗೆ ನಗರದ ಸೆಶನ್ಸ್ ನ್ಯಾಯಾಲಯ ಕಳೆದ ವರ್ಷ ಮರಣದಂಡನೆ ತೀರ್ಪು ನೀಡಿತ್ತು. ಶಿಕ್ಷೆಯನ್ನು ಖಾಯಂಗೊಳಿಸುವ ಬಗ್ಗೆ ಹೈಕೋರ್ಟ್ ನಲ್ಲಿ ಭಿನ್ನ ಚಿಂತನೆಗೆಳು ಕೇಳಿಬಂದಿತ್ತು. ಸಮಾಜದ ನೆಮ್ಮದಿ ಕೆಡಿಸಿದ ದುಷ್ಟ ರೆಡ್ಡಿಗೆ ಒಂದೇ ಸಲ ಸಾವಿನ ಮುಖಾಂತರ ಶಿಕ್ಷೆ ನೀಡಿದರೆ ಸಾಲದು, ಜೀವಾವಧಿ ಶಿಕ್ಷೆ ಅನುಭವಿಸಲಿ ಎಂಬುದು ನ್ಯಾಯಮೂರ್ತಿಯೊಬ್ಬರ ಅನಿಸಿಕೆ. ಆ ಬಳಿಕ ಪ್ರಕರಣದ ಶಿಕ್ಷೆಯ ತೀರ್ಪನ್ನು ನೀಡಲು ಮೂರನೇ ನ್ಯಾಯಮೂರ್ತಿಗೆ ಒಪ್ಪಿಸಲಾಗಿತ್ತು.21 ಅತ್ಯಾಚಾರ, ದರೋಡೆ, ಕೊಲೆ ಸೇರಿದಂತೆ ಅನೇಕ ಪ್ರಕರಣಗಳು ಈತನ ವಿರುದ್ಧ ದಾಖಲಾಗಿತ್ತು. ಒಂಟಿ ಮಹಿಳೆಯರ ಮನೆಗೆ ನುಗ್ಗಿ, ಮೊದಲು ಕೊಲೆ ಮಾಡಿ ನಂತರ ಶವ ಸಂಭೋಗ ನಡೆಸುತ್ತಿದ್ದ ವಿಕೃತಿಯನ್ನು ಉಮೇಶ್ ರೆಡ್ಡಿ ಹೊಂದಿದ್ದ. ಅನೇಕ ಸಲ ಪೋಲೀಸರಿಗೆ ಚಳ್ಳೆಹಣ್ಣು ತಿನ್ನಿಸಿ ಉಮೇಶ್ ರೆಡ್ಡಿ ಪರಾರಿಯಾದ ಪ್ರಕರಣಗಳು ಈತನ ಮೇಲಿದೆ. ಉಮೇಶ್ ರೆಡ್ಡಿ ಪ್ರಕರಣ ತೀರ್ಪಿನ ಸಂದರ್ಭದಲ್ಲಿ ಹೈಕೋರ್ಟ್‌ಗೆ ಗೈರು ಹಾಜರಾಗಿದ್ದು, ಆತ ಬೆಳಗಾವಿಯ ಹಿಂಡಲಗಾ ಜೈಲಿನಲ್ಲಿಯೇ ಇದ್ದಿರುವುದಾಗಿ ಪೊಲೀಸ್ ಮೂಲಗಳು ತಿಳಿಸಿವೆ. |
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ
