ಲೋಕಸಭೆ ಚುನಾವಣೆ ಘೋಷಣೆಯಾಗಿದೆ. 'ಕಾಸಿದ್ದೋನೇ ಬಾಸು' ಎಂಬಂತೆ ದುಡ್ಡು ಹಾಗೂ ಬೆಂಬಲ ಇದ್ದವರಿಗೆ ಸೀಟು ಲಭಿಸಿದೆ. ಟಿಕೆಟ್ ಗಿಟ್ಟಿಸಿಕೊಳ್ಳಲು ಅಭ್ಯರ್ಥಿಯ ಜೇಬಿನಲ್ಲಿ ಕನಿಷ್ಠ ಎಂಟು ಕೋಟಿ ರೂ. ಇರಬೇಕು ಎಂದು ಮೂಲಗಳು ತಿಳಿಸಿವೆ.
ಈ ಬಾರಿಯ ಚುನಾವಣೆಯಲ್ಲಿ ಹಣದ ಹೊಳೆಯೇ ಹರಿಯಲಿದೆ. ರಾಜ್ಯ ಗುಪ್ತಚರ ಇಲಾಖೆ ನಡೆಸಿದ ಪೂರ್ವ ಅಂದಾಜಿನ ಪ್ರಕಾರ ಕರ್ನಾಟಕದ ಇತರ ನಗರಗಳಿಗೆ ಹೋಲಿಸಿದರೆ ಬೆಂಗಳೂರು ನಗರ, ದಕ್ಷಿಣ, ಉತ್ತರ ಮತ್ತು ಕೇಂದ್ರ ವಲಯಗಳಲ್ಲಿ ಹೆಚ್ಚಿನ ಪ್ರಮಾಣದಲ್ಲಿ ಹಣದ ಹೊಳೆ ಹರಿಯಲಿದೆ.
ಬೆಂಗಳೂರು ವಲಯದಲ್ಲಿ ಅಭ್ಯಥಿಯೊಬ್ಬನ ಖರ್ಚು 3 ರಿಂದ 3.5 ಕೋಟಿ ರೂ. ಇರಬಹುದೆಂದು ಅಂದಾಜಿಸಲಾಗಿದೆ. ಚುನಾವಣೆ ಕಾವೇರುತ್ತಿದ್ದಂತೆ ಈ ಮೊತ್ತವೂ ಏರಬಹುದು. ಧುರೀಣರು ಮತ್ತು ಹಳೆಯ ತಲೆಗಳನ್ನು ಬಿಟ್ಟರೆ ಒಂದು ಟಿಕೆಟ್‌ಗೆ ಕನಿಷ್ಠ 5 ಕೋಟಿ ರೂ. ನೀಡಬೇಕಾಗುತ್ತದೆ ಎಂದು ಹೇಳಲಾಗಿದೆ. ಅಂದಾಜು ಅಂಕಿ ಅಂಶದ ಪ್ರಕಾರ ರಾಜ್ಯದಲ್ಲಿ ಚುನಾವಣೆಗಾಗಿ ಖರ್ಚಾಗಬಹುದಾದ ಒಟ್ಟು ಮೊತ್ತ 300 ಕೋಟಿ.
2008ರ ಮೇ ತಿಂಗಳಲ್ಲಿ ನಡೆದ ವಿಧಾನಸಭಾ ಚುನಾವಣೆಗಾಗಿ ಬೆಂಗಳೂರಿನಲ್ಲಿ ಅತಿ ಹೆಚ್ಚು ಖರ್ಚು ಮಾಡಿದವರು ಬಿಜೆಪಿ ಅಭ್ಯರ್ಥಿಗಳು. ಇವರಲ್ಲಿ ಕೆಲವರು ಈಗ ಅಧಿಕಾರದ ಗದ್ದುಗೆ ಏರಿದ್ದಾರೆ. ಒಬ್ಬ ಕನಿಷ್ಠ 15 ಕೋಟಿ ರೂ. ಖರ್ಚು ಮಾಡಿದ್ದರು ಎಂದು ಹೇಳಲಾಗಿದೆ.
| 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ