ಬಿಜೆಪಿ ಹಿರಿಯ ಮುಖಂಡ ಲಾಲ್ ಕೃಷ್ಣ ಆಡ್ವಾಣಿ ಅವರು ಪಾಕಿಸ್ತಾನಕ್ಕೆ ತೆರಳಿದ ಸಂದರ್ಭದಲ್ಲಿ ಮಹಮ್ಮದ್ ಅಲಿ ಜಿನ್ನಾ ಅವರನ್ನು ಜಾತ್ಯತೀತ ವ್ಯಕ್ತಿ ಎಂದು ಬಣ್ಣಿಸಿದ ಹಿನ್ನೆಲೆಯಲ್ಲಿ ಶ್ರೀರಾಮಸೇನೆ ಸಂಘಟನೆ ಸೋಮವಾರ ಆಡ್ವಾಣಿ ಭಾಷಣ ಮಾಡಿದ್ದ ಬಾಗಲಕೋಟೆ ಪೋಲೊ ಮೈದಾನವನ್ನು ಶುದ್ದೀಕರಿಸಿದ ಘಟನೆ ನಡೆದಿದೆ.ಸೋಮವಾರ ಬಿಜೆಪಿ ಲೋಕಸಭಾ ಅಭ್ಯರ್ಥಿ ಪಿ.ಸಿ.ಗದ್ದಿಗೌಡರ್ ಅವರ ಪರ ಮತಪ್ರಚಾರಕ್ಕಾಗಿ ಆಡ್ವಾಣಿ ಅವರು ಬಾಗಲಕೋಟೆಗೆ ಆಗಮಿಸಿದ್ದರು. ಆಡ್ವಾಣಿ ಜಿನ್ನಾ ಪರ ಹೇಳಿಕೆ ನೀಡುವ ಮೂಲಕ ದ್ವಂದ್ವ ನಿಲುವು ಹೊಂದಿದ್ದಾರೆಂದು ಆರೋಪಿಸಿರುವ ಸೇನೆ ಇಂದು ಆಡ್ವಾಣಿ ಭಾಷಣ ಮಾಡಿದ ಸ್ಥಳವನ್ನು ಗೋಮೂತ್ರ, ಗಂಗಾಜಲ ಬಳಸಿ ಶುದ್ದೀಕರಿಸಿದೆ.ಕಟ್ಟಾ ಬಿಜೆಪಿ ಅನುಯಾಯಿಯಾಗಿರುವ ಆಡ್ವಾಣಿಯವರು ಜಿನ್ನಾ ಪರ ಹೇಳಿಕೆ ನೀಡಿರುವುದು ಅಕ್ಷಮ್ಯ ಎಂದು ಹೇಳಿರುವ ಶ್ರೀರಾಮಸೇನೆ, ಆ ಕಾರಣಕ್ಕಾಗಿ ಶುದ್ದೀಕರಣ ಮಾಡಿರುವುದಾಗಿ ಹೇಳಿದೆ.ಆಡ್ವಾಣಿ ಅವರು ಪಾಕಿಸ್ತಾನಕ್ಕೆ ಭೇಟಿ ನೀಡಿದ್ದ ಸಂದರ್ಭದಲ್ಲಿ, ಪಾಕ್ ಪಿತಾಮಹ ಮಹಮ್ಮದ್ ಅಲಿ ಜಿನ್ನಾ ಅವರನ್ನು ಜಾತ್ಯತೀತ ವ್ಯಕ್ತಿ ಎಂದು ಹೊಗಳಿದ್ದರು. ಈ ಹೇಳಿಕೆ ಭಾರತದಲ್ಲಿ ವ್ಯಾಪಕ ಟೀಕೆಗೆ ಒಳಗಾಗಿತ್ತು. ನಂತರ ಆರ್‌ಎಸ್‌ಎಸ್ ಸೂಚನೆ ಮೇರೆಗೆ ಬಿಜೆಪಿ ಅಧ್ಯಕ್ಷ ಹುದ್ದೆಯಿಂದ ಆಡ್ವಾಣಿಯವರನ್ನು ಕೆಳಗಿಳಿಸಲಾಗಿತ್ತು. |
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ
