ಬೆಳಗಾವಿಯ ಸಂಕೇಶ್ವರ ಸಮೀಪ ಗುರುವಾರ ಬೆಳಗಿನ ಜಾವ ಕೆಎಸ್‌ಆರ್‌ಟಿಸಿಯ ಐರಾವತ ಬಸ್ಸೊಂದು ಮಗುಚಿ ಬಿದ್ದು ಇನ್ಫೋಸಿಸ್ ಸಂಸ್ಥೆಯ ಐವರು ಮಂದಿ ಸಾವನ್ನಪ್ಪಿದ್ದು,ಎಂಟು ಮಂದಿ ಜನರಿಗೆ ಗಾಯಗಳಾಗಿವೆ. ಮೃತರನ್ನು ಮೈಸೂರು ಇನ್ಫೋಸಿಸ್ ಸಂಸ್ಥೆಯ ನೌಕರರು ಎಂದು ಗುರುತಿಸಲಾಗಿದೆ.
ಘಟನೆಯಲ್ಲಿ ಗಾಯಗೊಂಡವರನ್ನು ಬೆಳಗಾವಿಯ ಕೆ.ಎಲ್.ಇ ಆಸ್ಪತ್ರೆಗೆ ದಾಖಲು ಮಾಡಲಾಗಿದೆ. ಬಸ್‌ನಲ್ಲಿ ಒಟ್ಟು 43ಮಂದಿ ಪ್ರಯಾಣಿಸುತ್ತಿದ್ದರು. ಕಡಿದಾದ ತಿರುವಿನಲ್ಲಿ ಚಾಲನೆ ಮಾಡುತ್ತಿದ್ದಾಗ ಚಾಲಕನ ಹಿಡಿತ ತಪ್ಪಿ ಈ ಅಪಘಾತ ಸಂಭವಿಸಿದೆ ಎಂದು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಸೋನಿಯಾ ನಾರಂಗ್ ತಿಳಿಸಿದ್ದಾರೆ.
ಮೈಸೂರು ಇನ್ಫೋಸಿಸ್ ಸಂಸ್ಥೆಯಲ್ಲಿ ತರಬೇತಿ ಪೂರೈಸಿಕೊಂಡು ಪುಣೆಯ ಸಂಸ್ಥೆಯಲ್ಲಿ ಕರ್ತವ್ಯ ನಿರ್ವಹಿಸಲು ತೆರಳುತ್ತಿದ್ದ ವೇಳೆ ಈ ದುರ್ಘಟನೆ ನಡೆದಿದೆ. ಮೃತರು 23-25ರ ಹರೆಯದವರಾಗಿದ್ದಾರೆ. ಅವರನ್ನು ತುಷಾರ್ ಅಗರ್‌ವಾಲ್, ಅಗ್ನಿವೇಶ್(ಬಿಹಾರ), ಅಂಕಿತಾ(ದೆಹಲಿ), ರಕ್ಷಿತಾ ಮಲ್ಲೋತ್ರಾ(ನೋಯಿಡಾ) ಎಂದು ಗುರುತಿಸಲಾಗಿದೆ. ಐದನೇ ಶವವನ್ನು ಇನ್ನೂ ಗುರುತಿಸಿಲ್ಲ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ