ಬಾರ್ಲಿ ಸೇವನೆಯಿಂದ ಆರೋಗ್ಯಕ್ಕೆ ಪ್ರಯೋಜನಗಳು

ಬಾರ್ಲಿ ಸೇವನೆಯಿಂದ ಆರೋಗ್ಯಕ್ಕೆ ಪ್ರಯೋಜನಗಳು

ಮನೆಯಲ್ಲಿ ಕುಡಿಯಲು ಬಾರ್ಲಿಯ ಗಂಜಿ ಕುಡಿಯುತ್ತಿದ್ದ ಪ್ರಸಂಗ ಈಗಲೂ ನೆನಪಿಗೆ ಬರುತ್ತದೆ. ಅಂದು ಬಾರ್ಲಿಯ ಮಹತ್ವ ತಿಳಿದಿರಲಿಲ್ಲ. ಆದರೆ ಈ ಧಾನ್ಯದಲ್ಲಿ ಅಡಗಿರುವ ಆರೋಗ್ಯ ಪ್ರಯೋಜನಗಳು ತಿಳಿಯುತ್ತಾ ಹೋದಂತೆ ನಿಜಕ್ಕೂ ಅಚ್ಚರಿಯಾಗುತ್ತದೆ. ಅದರಲ್ಲೂ, ಈ ಬಾರ್ಲಿಯ ಪಾನೀಯ ಕುಡಿದರೆ ಮಧುಮೇಹ, ಹೃದಯದ ಸಮಸ್ಯೆಗಳೆಲ್ಲಾ ದೂರವಾಗುತ್ತದೆ ಎಂದರೆ ಅಚ್ಚರಿಯಾಗುತ್ತದೆ

photo credit social media

ಮನುಷ್ಯನ ಆರೋಗ್ಯ ವೃದ್ಧಿಸುವ ಪೌಷ್ಟಿಕಾಂಶಭರಿತ ಧಾನ್ಯ ಯಾವುದು ಎಂದು ಕೇಳಿದರೆ, ಬಾರ್ಲಿ ಅಥವಾ ಜವೆ ಗೋಧಿ ಎಂದು ಕಣ್ಣುಮುಚ್ಚಿ ಹೇಳಬಹುದು! ಹೌದು ಈ ಏಕದಳ ಹೊಂದಿರುವ ಧಾನ್ಯದಲ್ಲಿ, ಹೇರಳವಾಗಿ ಮನುಷ್ಯನ ಆರೋಗ್ಯಕ್ಕೆ ಬೇಕಾಗುವ ಎಲ್ಲಾ ಬಗೆಯ ವಿಟಮಿನ್‌ಗಳು, ಖನಿಜಾಂಶಗಳು ಮತ್ತು ಕಾರ್ಬೋಹೈಡ್ರೇಟ್ ಅಂಶಗಳು ಅಂಶಗಳು ಅಡಗಿವೆ.

ಅದರಲ್ಲೂ ವಾತಾವರಣದ ಬದಲಾವಣೆಯಿಂದ ಆರೋಗ್ಯದಲ್ಲಿ ಕಂಡುಬರುವ ಸಣ್ಣ-ಪುಟ್ಟ ಸಮಸ್ಯೆಗಳಿಂದ ಹಿಡಿದು, ದೀರ್ಘಕಾಲದವರೆಗೆ ಕಾಡುವ ಕಾಯಿಲೆಗಳನ್ನೆಲ್ಲಾ ನಿಯಂತ್ರಿಸುವ ಎಲ್ಲಾ ಗುಣ ಲಕ್ಷಣಗಳು ಈ ಧಾನ್ಯದಲ್ಲಿ ಅಡಗಿದೆ.

ದೇಹದ ತೂಕ ಇಳಿಕೆ ಆಗದಿದ್ದರೆ, ನಿರಾಸೆ ಜೊತೆಗೆ ಮನಸ್ಸಿಗೆ ನೋವಾಗುವುದು ಸಹಜ. ಇದಕ್ಕೊಂದು ಒಳ್ಳೆಯ ಮಾರ್ಗವಿದೆ ಅದೇನೆಂದರೆ, ಪ್ರತಿದಿನ ಒಂದೊಂದು ಲೋಟ ಬಾರ್ಲಿ ನೀರು ಅಥವಾ ಬಾರ್ಲಿಯ ಗಂಜಿ ಕುಡಿಯುವ ಅಭ್ಯಾಸ ಮಾಡಿಕೊಳ್ಳಬೇಕು. ಇದಕ್ಕೆ ಕಾರಣ ಬಾರ್ಲಿ ನೀರಿನಲ್ಲಿರುವ ಅಧಿಕ ಫೈಬರ್‌ನ ಅಂಶ.

ಫೈಬರ್ ಹೊಂದಿರುವ ಯಾವುದೇ ಪದಾರ್ಥಗಳನ್ನು ಸೇವಿಸುವುದರಿಂದ, ದೀರ್ಘ ಕಾಲವರೆಗೆ ಹೊಟ್ಟೆ ಹಸಿವು ದೂರವಾಗಿ ಬಹಳ ಹೊತ್ತಿನ ತನಕ ಹೊಟ್ಟೆ ತುಂಬಿದ ರೀತಿ ಇರುತ್ತದೆ. ಇದರಿಂದ ಪದೇ ಪದೇ ತಿನ್ನುವ ಬಯಕೆ ಕೂಡ ಇಲ್ಲದಾಗುತ್ತದೆ. ಇದರಿಂದ ದೇಹದ ತೂಕ ಕೂಡ ಹೆಚ್ಚಾಗುವ ಭಯವೇ ಇರುವುದಿಲ್ಲ!

ತನ್ನಲ್ಲಿ ಆಂಟಿ - ಆಕ್ಸಿಡೆಂಟ್‌ಗಳ ಮಹಾ ಪೂರವೇ ತುಂಬಿರುವ ಬಾರ್ಲಿಯನ್ನು ಪಾನೀಯ ರೂಪದಲ್ಲಿ ಸೇವನೆ ಮಾಡುತ್ತಾ ಬಂದರೆ, ಕ್ಯಾನ್ಸರ್ ರೋಗಕ್ಕೆ ಕಾರಣವಾಗುವ ಫ್ರೀ ರಾಡಿಕಲ್‌ಗಳ ಜೊತೆ ಹೋರಾಡುವ ಶಕ್ತಿಯನ್ನು ನಮ್ಮ ದೇಹಕ್ಕೆ ಒದಗಿಸಿ ಕೊಡುತ್ತದೆ.

ಮುಖ್ಯವಾಗಿ ಬಾರ್ಲಿ ನೀರನ್ನು ಪ್ರತಿದಿನ ಒಂದೊಂದು ಲೋಟ ಕುಡಿಯುತ್ತಾ ಬಂದರೆ, ಗಂಟಲಿನ ಭಾಗದಲ್ಲಿ ಒಳ್ಳೆಯ ಬ್ಯಾಕ್ಟೀರಿಯಾಗಳನ್ನು ಉತ್ಪತ್ತಿ ಮಾಡಿ, ಮುಂದಿನ ದಿನಗಳಲ್ಲಿ ಗಂಟಲು ಕ್ಯಾನ್ಸರ್ ಬರುವ ಅಪಾಯವನ್ನು ತಪ್ಪಿಸುತ್ತದೆ

ಸರಿಯಾದ ಆಹಾರ ಪದ್ಧತಿಯನ್ನು ಅನುಸರಿಸುವುದರ ಜೊತೆಗೆ ಫೈಬರ್‌ ಅಂಶ ಹೊಂದಿ ರುವ ಬಾರ್ಲಿ ನೀರನ್ನು ಕುಡಿಯುವ ಅಭ್ಯಾಸ ಮಾಡಿಕೊಂಡರೆ, ದೇಹದ ರಕ್ತದಲ್ಲಿ ಕೆಟ್ಟ ಕೊಲೆಸ್ಟ್ರಾಲ್ ಅಂಶದ ಪ್ರಮಾಣ ಕಡಿಮೆಯಾಗಿ, ಹೃದಯದ ಆರೋಗ್ಯ ಚೆನ್ನಾಗಿರುವಂತೆ ನೋಡಿಕೊಳ್ಳುತ್ತದೆ