ಅಲ್ ಖಾಯಿದಾ ಮುಖ್ಯಸ್ಥ ಒಸಾಮಾ ಬಿನ್ ಲಾಡೆನ್ನ ಹೊಸ ವಿಡಿಯೊ ಟೇಪ್ನ ಪ್ರತಿಯೊಂದು ಅಮೆರಿಕ ಸರ್ಕಾರಕ್ಕೆ ಸಿಕ್ಕಿದ್ದು, ಅದರ ವಿಶ್ಲೇಷಣೆ ನಡೆಸುತ್ತಿದೆಯೆಂದು ಅಮೆರಿಕದ ಪ್ರಮುಖ ಸುದ್ದಿ ಚಾನೆಲ್ ಸಿಎನ್ಎನ್ ಶುಕ್ರವಾರ ವರದಿ ಮಾಡಿದೆ. ಅದು ನಿಜವಾಗಲೂ ಬಿನ್ ಲಾಡೆನ್ ಚಿತ್ರವೇ ಅಥವಾ ಟೇಪ್ ಹಳೆಯದೋ, ಹೊಸದೋ ಎಂದು ತಪಾಸಣೆ ಮಾಡಲಾಗುತ್ತಿದೆ ಎಂದು ಹೆಸರುಹೇಳಲು ಬಯಸದ ಮೂಲವೊಂದನ್ನು ಉಲ್ಲೇಖಿಸಿ ಸುದ್ದಿ ಚಾನೆಲ್ ತಿಳಿಸಿದೆ.
ಅಮೆರಿಕದ ಮೇಲೆ ಸೆ.11ರ ದಾಳಿಯ 6ನೇ ವಾರ್ಷಿಕದಂದು ಅಮೆರಿಕದ ಜನರನ್ನು ಉದ್ದೇಶಿಸಿ ಮಾತನಾಡುವ ವಿಡಿಯೊವನ್ನು ಅಲ್ ಖಾಯಿದಾ ನಾಯಕ ಬಿಡುಗಡೆ ಮಾಡುತ್ತಾನೆಂದು ಇದಕ್ಕೆ ಮುಂಚಿತವಾಗಿ ಇಸ್ಲಾಮಿಕ್ ವೆಬ್ಸೈಟ್ ತಿಳಿಸಿತ್ತು.
ಅಲ್ ಖಾಯಿದಾದ ಮಾಧ್ಯಮ ಅಲ್ ಸಾಹಬ್ ಆಗಾಗ್ಗೆ ಸಂದೇಶಗಳನ್ನು ನೀಡುವ ವೆಬ್ಸೈಟ್ನಲ್ಲಿ ಹೊಸ ವಿಡಿಯೊ ಕಾಣಿಸಿಕೊಳ್ಳುತ್ತದೆಂದು ಪ್ರಕಟಣೆ ತಿಳಿಸಿದೆ. ವಿಡಿಯೊದ ಸ್ತಬ್ಧ ಛಾಯಾಚಿತ್ರದಲ್ಲಿ ಬಿನ್ ಲಾಡನ್ ಕ್ಯಾಮೆರಾ ಎದುರು ನಿಂತು ಮಾತನಾಡುತ್ತಿದ್ದು, ಅವನ ಗಡ್ಡವನ್ನು ಕಪ್ಪು ಬಣ್ಣಕ್ಕೆ ಡೈ ಮಾಡಲಾಗಿತ್ತು.