ತೈವಾನ್ಗೆ ಶಸ್ತ್ರಾಸ್ತ್ರ ನೀಡಿದ್ರೆ ಜಾಗ್ರತೆ: ಅಮೆರಿಕಕ್ಕೆ ಚೀನಾ
ವಾಷಿಂಗ್ಟನ್, ಭಾನುವಾರ, 31 ಜನವರಿ 2010( 11:45 IST )
ಅಮೆರಿಕ ತೈವಾನ್ಗೆ ಸುಮಾರು 6,4ಬಿಲಿಯನ್ ಡಾಲರ್ನಷ್ಟು ಶಸ್ತ್ರಾಸ್ತ್ರವನ್ನು ಮಾರಾಟ ಮಾಡುವ ನಿಲುವು ತಳೆದಿರುವುದನ್ನು ಚೀನಾ ತೀವ್ರವಾಗಿ ಖಂಡಿಸಿದ್ದು, ಇದರಿಂದಾಗಿ ಚೀನಾ ಮತ್ತು ಅಮೆರಿಕ ನಡುವಿನ ಸಂಬಂಧ ಹದಗೆಡಬಹುದು ಎಂದು ಗಂಭೀರ ಎಚ್ಚರಿಕೆಯನ್ನೂ ನೀಡಿದೆ.
ಹೊಸ ಬೆಳವಣಿಗೆಯೊಂದರಲ್ಲಿ ಚೀನಾದ ಭಾಗವೆಂದು ಹೇಳುತ್ತಿರುವ ತೈವಾನ್ಗೆ ಅಮೆರಿಕ ಶಸ್ತ್ರಾಸ್ತ್ರ ಮಾರಾಟ ಮಾಡಲು ಹೊರಟಿರುವುದು ಚೀನಾದ ಆಕ್ರೋಶಕ್ಕೆ ಕಾರಣವಾಗಿದೆ. ಚೀನಾದ ಆಂತರಿಕ ಸಮಸ್ಯೆ ಬಗ್ಗೆ ಅಮೆರಿಕ ಮೂಗು ತೂರಿಸಲು ಯತ್ನಿಸುತ್ತಿರುವುದು ಸರಿಯಾದ ಕ್ರಮವಲ್ಲ ಎಂದು ವಾಷಿಂಗ್ಟನ್ನಲ್ಲಿರುವ ಚೀನಾ ರಾಯಭಾರಿ ವಾಂಗ್ ಬಾವೋಡಾಂಗ್ ವಿರೋಧ ವ್ಯಕ್ತಪಡಿಸಿರುವುದಾಗಿ ಯುಎಸ್ ರಾಯಭಾರಿ ಜಾನ್ ಹಂಟ್ಸ್ಮನ್ ತಿಳಿಸಿದ್ದಾರೆ.
ಅಮೆರಿಕದ ಈ ಯೋಜನೆ ನಿಜಕ್ಕೂ ಚೀನಾ ಮತ್ತು ಅಮೆರಿಕದ ನಡುವಿನ ಬಾಂಧವ್ಯಕ್ಕೆ ಧಕ್ಕೆ ತರಲಿದೆ ಎಂದು ಹೇಳಿದೆ. ನಾವು ಇದನ್ನು ತೀವ್ರವಾಗಿ ಖಂಡಿಸುತ್ತೇವೆ ಎಂದಿರುವ ಚೀನಾ, ಅಮೆರಿಕ ಮೊದಲು ತೈವಾನ್ಗೆ ಶಸ್ತ್ರಾಸ್ತ್ರ ಪೂರೈಕೆ ಮಾಡುವ ನಿರ್ಧಾರವನ್ನು ಹಿಂಪಡೆಯಬೇಕು ಎಂದು ಒತ್ತಾಯಿಸಿದೆ.