ಒಂದೆರಡು ವರ್ಷವಲ್ಲ, ಕಳೆದ ಒಂಬತ್ತು ವರ್ಷಗಳಿಂದ ಜೈಲೆಂಬ ನರಕದಲ್ಲಿ ನಾವು ಕಾಲ ಕಳೆದಿದ್ದೇವೆ. ಈಗ ನೀವು ನಿರ್ದೋಷಿಗಳು ಎಂದು ನ್ಯಾಯಾಲಯ ತೀರ್ಪು ನೀಡಿದೆ. ಹಾಗಾದರೆ ಕಳೆದು ಹೋದ ನಮ್ಮ ಒಂಬತ್ತು ವರ್ಷಗಳನ್ನು ನಮಗೆ ಯಾರು ನೀಡುತ್ತಾರೆ -- ಇದು ಗೋದ್ರಾ ರೈಲು ದುರಂತ ಪ್ರಕರಣದಲ್ಲಿ ಜೈಲು ಸೇರಿ ಇದೀಗ ಬಿಡುಗಡೆಯಾಗಿರುವ 63 ಮಂದಿ ಅಮಾಯಕ ಮುಸ್ಲಿಮರ ಪ್ರಶ್ನೆ.

ನಿನ್ನೆ ಅಹಮದಾಬಾದ್‌ನ ಸಾಬರಮತಿ ವಿಶೇಷ ನ್ಯಾಯಾಲಯವು ಗೋದ್ರಾ ರೈಲು ದುರಂತದ ತೀರ್ಪು ಪ್ರಕಟಿಸಿತ್ತು. ರೈಲಿಗೆ ಬೆಂಕಿ ಬಿದ್ದದ್ದಲ್ಲ, ಬೆಂಕಿ ಹಚ್ಚಿದ್ದು. ಇದು ಪೂರ್ವ ನಿಯೋಜಿತ ಕೃತ್ಯ ಎಂದು ಹೇಳಿದ್ದ ನ್ಯಾಯಾಲಯ, 31 ಮಂದಿಯನ್ನು ದೋಷಿಗಳು ಮತ್ತು 63 ಮಂದಿಯನ್ನು ನಿರ್ದೋಷಿಗಳು ಎಂದು ತೀರ್ಪು ನೀಡಿತ್ತು.

ಇದರ ಬೆನ್ನಿಗೆ ಖುಲಾಸೆಗೊಂಡ ಎಲ್ಲಾ 63 ಮಂದಿಯನ್ನು ಬಿಡುಗಡೆ ಮಾಡಲಾಗಿದೆ. ಮಂಗಳವಾರ ಮಧ್ಯರಾತ್ರಿ, ಬುಧವಾರ ಬೆಳಿಗ್ಗೆ ಹೊತ್ತಿಗೆ ಬಹುತೇಕ ಮಂದಿ ತಮ್ಮ ಮನೆಗಳನ್ನು ಸೇರಿಕೊಂಡಿದ್ದಾರೆ. ಅವರ ಕುಟಂಬಗಳಲ್ಲೀಗ ಸಂಭ್ರಮದ ಹಬ್ಬದ ವಾತಾವರಣ ಮನೆ ಮಾಡಿದೆ.

'ಕಳೆದ ಒಂಬತ್ತು ವರ್ಷಗಳಿಂದ ನಾನು ನರಕದಲ್ಲಿದ್ದೆ. ಈಗ ನಾನು ಸ್ವರ್ಗದಲ್ಲಿದ್ದೇನೆ. ಇದಕ್ಕಿಂತ ಹೆಚ್ಚು ಏನೂ ಹೇಳಲಾರೆ' ಎನ್ನುತ್ತಾರೆ ಮೊಹಮ್ಮದ್ ಇಸಾಕ್ ಮಂದು. ಆದರೂ ಅವರಲ್ಲಿನ ಪ್ರಶ್ನೆಗಳಿಗೆ ಉತ್ತರವೇ ಸಿಕ್ಕಿಲ್ಲ. 'ತಾವು ಅಮಾಯಕರು, ತಪ್ಪು ಮಾಡಿಲ್ಲ ಎನ್ನುವುದಾದರೆ, ನಮ್ಮನ್ನು ಯಾಕೆ ಬಂಧಿಸಲಾಯಿತು? ಒಂಬತ್ತು ವರ್ಷಗಳ ಕಾಲ ಜೈಲಿನಲ್ಲಿ ಯಾಕೆ ಇಡಲಾಯಿತು?' ಎಂದು ಪ್ರಶ್ನಿಸುತ್ತಾರೆ.

ಜೈಲಿನಿಂದ ಬಿಡುಗಡೆಯಾಗಿ ಮನೆ ಸೇರಿಕೊಂಡಿರುವ ಇನ್ನೊಬ್ಬ ಕಮಲ್ ಬಾದಶಾಹ್ ಅವರಂತೂ ನ್ಯಾಯಾಂಗದ ಮೇಲಿನ ವಿಶ್ವಾಸವನ್ನೇ ಕಳೆದುಕೊಂಡಿದ್ದರು. ನಾನು ಯಾವುದೇ ತಪ್ಪನ್ನು ಮಾಡಿರಲಿಲ್ಲ. ಆದರೂ ನನ್ನ ಮೇಲೆ ಹಲವು ಆರೋಪಗಳನ್ನು ಹೊರಿಸಿ, ಪ್ರಕರಣ ದಾಖಲಿಸಿದರು. ಜೈಲಿಗೆ ಹಾಕಿದರು ಎನ್ನುತ್ತಾರವರು.

ಕೋರ್ಟ್ ತೀರ್ಪಿನಿಂದ ಆನಂದ ತುಂದಿಲರಾಗಿರುವ ಬಹುತೇಕ ಮಂದಿ ಶಬ್ಧಗಳಿಗಾಗಿ ತಡಕಾಡುತ್ತಿದ್ದಾರೆ. ಪ್ರಶ್ನೆಗಳಿಗೆ ಹೇಗೆ ಉತ್ತರಿಸಬೇಕೆಂದೇ ತಿಳಿಯುತ್ತಿಲ್ಲ. ಮಾತು ಮರೆತವರಂತೆ ತಮ್ಮ ಕುಟುಂಬದೊಂದಿಗೆ ಸೇರಿಕೊಂಡಿದ್ದಾರೆ. ಕೊನೆಗೂ ನ್ಯಾಯ ಸಿಕ್ಕಿದೆ ಎಂಬ ಸಂತಸದಲ್ಲಿದ್ದಾರೆ.

ಫಾರೂಕ್ ಕೇಸರಿಯವರಿಗೆ ಕೊನೆಗೂ ಸಿಕ್ಕಿದ ನ್ಯಾಯದ ಬಗ್ಗೆ ತೃಪ್ತಿಯಿದೆ. 'ನ್ಯಾಯದ ಹಾದಿ ಸುದೀರ್ಘವಾಗಿತ್ತು, ವಿಳಂಬವಾಯಿತು' ಎಂದಿದ್ದಾರೆ.

ಇಡೀ ದುರಂತದ ಹಿಂದಿನ ಪ್ರಮುಖ ರೂವಾರಿಗಳಲ್ಲಿ ಒಬ್ಬ ಎಂದು ಆರೋಪಿಸಲಾಗಿದ್ದ ಮೌಲಾನಾ ಉಮರ್ಜಿ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. 'ಈಗ ನಾನು ಯಾವುದೇ ಹೇಳಿಕೆ ನೀಡಲಾರೆ' ಎಂದಿದ್ದಾರೆ.

ಗೋದ್ರಾ ದುರಂತದ 31 ತಪ್ಪಿತಸ್ಥರು:
1. ಸುಲೇಮಾನ್ ಅಹ್ಮದ್ ಹುಸೇನ್ ಆಲಿಯಾ ಟೈಗರ್ (34)
2. ಅಬ್ದುಲ್ ರೆಹಮಾನ್ ಅಬ್ದುಲ್ ಮಜೀದ್ ದಂತಿಯಾ ಆಲಿಯಾಸ್ ಕಂಕಟ್ಟೋ (48)
3. ಬಿಲಾಲ್ ಇಸ್ಮಾಯಿಲ್ ಅಬ್ದುಲ್ ಮಜೀದ್ ಸುಜೇಲಾ ಆಲಿಯಾಸ್ ಬಿಲಾಲ್ ಹಾಜಿ (41)
4. ಖಾಸಿಂ ಅಬ್ದುಲ್ ಸತ್ತಾರ್ ಆಲಿಯಾಸ್ ಖಾಸಿಂ ಬಿರಿಯಾನಿ ಗಂಚಿ (22)
5. ಇರ್ಫಾನ್ ಸಿರಾಜ್ ಪಾಡೊ ಗಂಚಿ (19)
6. ಅನ್ವರ್ ಮೊಹಮ್ಮದ್ ಮೆಹ್ದಾ ಆಲಿಯಾಸ್ ಲಾಲ್ ಶೇಖ್ (22)
7. ಅಬ್ದುಲ್ ರಜಾಕ್ ಮೊಹಮ್ಮದ್ ಕುರ್ಕರ್ (44)
8. ಸಿದ್ಧಿಕ್ ಆಲಿಯಾಸ್ ಮಾತುಂಗಾ ಅಬ್ದುಲ್ಲಾಹ್ ಬದಮ್ (46)
9. ಮೆಹಬೂಬ್ ಯಾಕೂಬ್ ಮಿತಾ ಆಲಿಯಾಸ್ ಪೊಪಾ (30)
10. ರಂಜಾನಿ ಬಿನ್ಯಾಮಿನ್ ಬೆಹ್ರಾ (28)
11. ಹಸನ್ ಅಹ್ಮದ್ ಚರ್ಕಾ ಆಲಿಯಾಸ್ ಲಾಲೂ (23)
12. ಜಬೀರ್ ಬಿನ್ಯಾಮಿನ್ ಬೆಹ್ರಾ (20)
13. ಮೆಹಬೂಬ್ ಖಾಲಿದ್ ಚಂದಾ (31)
14. ಸೊಹೆಬ್ ಯೂಸುಫ್ ಅಹ್ಮದ್ ಕಲಂದರ್ (22)
15. ಶೌಕತ್ ಆಲಿಯಾಸ್ ಬಾನೊ ಫಾರೂಕ್ ಅಬ್ದುಲ್ ಸತ್ತಾರ್ ಪತಾಲಿಯಾ (23)
16. ಸಲೀಂ ಆಲಿಯಾಸ್ ಸಲ್ಮಾನ್ ಯೂಸುಫ್ ಸತ್ತಾರ್ ಜರ್ದಾ (27)
17. ಅಬ್ದುಲ್ ಸತ್ತಾರ್ ಇಬ್ರಾಹಿಂ ಗಡ್ಡಿ ಅಸ್ಲಾ (39)
18. ಅಬ್ದುಲ್ ರವೂಫ್ ಅಬ್ದುಲ್ ಮಜೀದ್ ಇಸಾ (48)
19. ಯೂನಸ್ ಅಬ್ದುಲ್ ಹಕ್ ಆಲಿಯಾಸ್ ಗಡಿಯಾಲಿ (24)
20. ಇಬ್ರಾಹಿಂ ಅಬ್ದುಲ್ ರಜಾಕ್ ಅಬ್ದುಲ್ ಸತ್ತಾರ್ ಸಮೂಲ್ ಆಲಿಯಾಸ್ ಬಾನೊ (20)
21. ಸಿರಾಜ್ ಮೊಹಮ್ಮದ್ ಅಬ್ದುಲ್ ಮೆದಾ ಆಲಿಯಾಸ್ ಬಾಲಾ (27)
22. ಬಿಲಾಲ್ ಅಬ್ದುಲ್ಲಾಹ್ ಇಸ್ಮಾಯಿಲ್ ಬದಂ ಗಂಚಿ (34)
23. ಹಾಜಿ ಭೂರಿಯಾ ಅಬ್ದುಲ್ ಸತ್ತಾರ್ ಇಬ್ರಾಹಿಂ ಮುಸಲ್ಮಾನ್ (36)
24. ಇರ್ಫಾನ್ ಅಬ್ದುಲ್ ಮಜೀದ್ ಗಂಚಿ ಕಲಂದರ್ ಆಲಿಯಾಸ್ ಇರ್ಫಾನ್ ಬೊಪೊ (25)
25. ಇರ್ಫಾನ್ ಮೊಹಮ್ಮದ್ ಹನೀಫ್ ಅಬ್ದುಲ್ ಗನಿ ಪತಾಲಿಯಾ (22)
26. ಆಯುಧ್ ಅಬ್ದುಲ್ ಗನಿ ಇಸ್ಮಾಯಿಲ್ ಪತಾಲಿಯಾ (37)
27. ಶೌಕತ್ ಅಬ್ದುಲ್ಲಾ ಮೌಲವಿ ಇಸ್ಮಾಯಿಲ್ ಬದಂ (40)
28. ಮೊಹಮ್ಮದ್ ಹನೀಫ್ ಆಲಿಯಾಸ್ ಹನಿ ಅಬ್ದುಲ್ಲಾ ಬದಂ (42)
29. ಮೆಹಬೂಬ್ ಅಹ್ಮದ್ ಯೂಸುಫ್ ಹಸನ್ ಆಲಿಯಾಸ್ ಲಾತಿಕೊ (27)
30. ಶೌಕತ್ ಯೂಸುಫ್ ಇಸ್ಮಾಯಿಲ್ ಮೋಹನ್ ಆಲಿಯಾಸ್ ಬಿಬಿನೊ (28)
31. ಸಿದ್ಧಿಕ್ ಮೊಹಮ್ಮದ್ ಮೋರಾ (35)