ಹೊಸ ವಿಶ್ವದಾಖಲೆಯೊಂದನ್ನು ಮಾಡುವತ್ತ ಪ್ರಯತ್ನಶೀಲರಾಗಿರುವ ಕೇರಳದ ಮೃದಂಗ ವಿದ್ವಾಂಸರೊಬ್ಬರು, 101 ಗಂಟೆಗಳಿಗಿಂತ ಹೆಚ್ಚು ಕಾಲ ನಿರಂತರ ಮೃದಂಗ ನುಡಿಸುವ ಮೂಲಕ ತಮ್ಮದೇ ಹಳೆಯ ದಾಖಲೆಯನ್ನು ಮುರಿದಿದ್ದಾರೆ.
37ರ ಹರೆಯದ ಕುಳಲ್ಮಣ್ಣಂ ಜಿ.ರಾಮಕೃಷ್ಣನ್ ಅವರು 101 ಗಂಟೆಗಳಿಗೂ ಹೆಚ್ಚುಕಾಲದಿಂದ ಮೃದಂಗ ನುಡಿಸುತ್ತಿದ್ದು, ಆಗಸ್ಟ್ 1ರಿಂದ ಆರಂಭಿಸಿರುವ ಈ 'ಮ್ಯಾರಥಾನ್ ಮೃದಂಗ ನುಡಿಸುವಿಕೆ'ಯನ್ನು ಕನಿಷ್ಠ 15 ದಿನಗಳ ಕಾಲ ಮುಂದುವರಿಸುವ ಇರಾದೆ ಹೊಂದಿದ್ದಾರೆ ಎಂದು ಕಾರ್ಯಕ್ರಮದ ಸಂಘಟಕರು ತಿಳಿಸಿದ್ದಾರೆ.
2005ರ ಮೇ ತಿಂಗಳಲ್ಲಿ ಗಿನ್ನೆಸ್ ಪುಸ್ತಕದಲ್ಲಿ 'ಹ್ಯಾಂಡ್ ಡ್ರಮ್' ಎಂದು ಬಣ್ಣಿಸಲಾಗಿರುವ ಮೃದಂಗವನ್ನು ನಿರಂತರ 101 ಗಂಟೆ ಕಾಲ ನುಡಿಸಿದ್ದ ರಾಮಕೃಷ್ಣನ್ ಗಿನ್ನೆಸ್ ಮತ್ತು ಲಿಮ್ಕಾ ದಾಖಲೆಗಳ ಪುಸ್ತಕದಲ್ಲಿ ಹೆಸರು ದಾಖಲಿಸಿದ್ದರು.
ತಮ್ಮದೇ ದಾಖಲೆಯನ್ನು ಉತ್ತಮಪಡಿಸಿಕೊಳ್ಳುವ ನಿಟ್ಟಿನಲ್ಲಿ ಅವರು, ಕೊಯಮತ್ತೂರಿನ ನೆಹರೂ ಶಿಕ್ಷಣ ಕಾಲೇಜು ಮತ್ತು ಚಾರಿಟೇಬಲ್ ಟ್ರಸ್ಟ್ನಲ್ಲಿ ವಿಶೇಷವಾಗಿ ನಿರ್ಮಿಸಲಾದ ವೇದಿಕೆಯಲ್ಲಿ ಆಗಸ್ಟ್ 1ರಂದು ಮೃದಂಗ ನುಡಿಸಲು ಆರಂಭಿಸಿದ್ದರು.
|