ಕುಮಾರ್ ಹೇಳಿಕೆಗೆ ಅನಂತ ಟೀಕೆ ಬೆಂಗಳೂರು, ಭಾನುವಾರ, 25 ನವೆಂಬರ್ 2007( 16:02 IST )

ಐದು ಕೋಟಿ ರೂಪಾಯಿ ನೀಡಿ, ಆ ಅನಂತಕುಮಾರ್ ಮುಖದ ಮೇಲೆ ಎಸೆದು ಬಂದು ನಿಮ್ಮ ಪಕ್ಷ ಸೇರುತ್ತೇನೆ ಎಂದು ಯಡಿಯೂರಪ್ಪ ತಮ್ಮಲ್ಲಿ ಗೋಗರೆದ್ದಿದ್ದರು ಎಂಬ ಮಾಜಿ ಮುಖ್ಯಮಂತ್ರಿ ಕುಮಾರಸ್ವಾಮಿ ಅವರ ಹೇಳಿಕೆಗೆ ಬಿಜೆಪಿ ರಾಷ್ಟ್ರೀಯ ಕಾರ್ಯದರ್ಶಿ, ಸಂಸದ ಅನಂತ ಕುಮಾರ್ ಅವರು ಕಟುವಾಗಿ ಟೀಕಿಸಿದ್ದಾರೆ. ಕುಮಾರಸ್ವಾಮಿ ಹಾಗೂ ಅವರ ಬೆಂಬಲಿಗ ಶಾಸಕರು ರಾಜ್ಯಪಾಲರ ಹತ್ತಿರ ಹಾಗೂ ರಾಷ್ಟ್ರಪತಿಗಳ ಹತ್ತಿರ ಪರೇಡ್ ಮಾಡಿ ಬಿಜೆಪಿ ಸರಕಾರ ಬೆಂಬಲ ನೀಡುವುದಾಗಿ ಪ್ರಮಾಣಪತ್ರ ನೀಡಿದ್ದರು. ಅನಂತರ ವಚನವನ್ನೇ ಮುರಿದ ವಿಷಯ ಎಲ್ಲರಿಗೂ ತಿಳಿದಿದೆ. ಕುಮಾರಸ್ವಾಮಿ ಅವರಿಗೆ ಸಾರ್ವಜನಿಕ ಜೀವನದಲ್ಲಿ ಬೆಲೆ ಇಲ್ಲ, ಅಂಥವರು ನೀಡಿದ ಹೇಳಿಕೆಯನ್ನು ಜನ ನಂಬುವುದಿಲ್ಲ ಎಂದರು. ಎಲ್ಲಾ ಪಕ್ಷಗಳು ಜನತಾ ನ್ಯಾಯಾಲಯ ಎಂಬ ಶ್ರೇಷ್ಠ ನ್ಯಾಯಾಲಯದ ಮುಂದೆ ಹೋಗುವಾಗ ತಮ್ಮ ಸಾಧನೆ ಹಾಗೂ ಅಹವಾಲುಗಳನ್ನು ಜನತೆಯ ಮುಂದೆ ಪ್ರಸ್ತುತಪಡಿಸಬೇಕಾಗುತ್ತದೆ. ಜನ ಪ್ರಜ್ಞಾವಂತರಾಗಿದ್ದು ಯಾರು ಏನು ಹೇಳುತ್ತಾರೆ, ಏನು ಮಾಡುತ್ತಾರೆ ಎಂಬುದನ್ನು ತಿಳಿದುಕೊಳ್ಳುವಷ್ಟು ಸಮರ್ಥರಾಗಿದ್ದಾರೆ. ನಮ್ಮನ್ನು ಮೋಸ ಮಾಡಬಹುದು ಆದರೆ ಜನರನ್ನು ಮೋಸ ಮಾಡಲು ಪದೇ ಪದೇ ಸಾಧ್ಯವಿಲ್ಲ ಎಂದು ಕಟುವಾಗಿ ಹೇಳಿದರು.