ತನ್ನ ಮುಖ್ಯಮಂತ್ರಿತ್ವಕ್ಕೆ ಬಿಜೆಪಿ ಸಮ್ಮತಿಸಿರುವುದರೊಂದಿಗೆ, 81 ಸದಸ್ಯಬಲದ ವಿಧಾನಸಭೆಯಲ್ಲಿ 43 ಸದಸ್ಯರ ಬೆಂಬಲ ಪತ್ರವನ್ನು ಹೊತ್ತ ಮಾಜಿ ಮುಖ್ಯಮಂತ್ರಿ, ಮಾಜಿ ಕೇಂದ್ರ ಸಚಿವ, ಜೆಎಂಎಂ ಮುಖ್ಯಸ್ಥ ಶಿಬು ಸೋರೆನ್ ಅವರು ಸರಕಾರ ರಚನೆಗಾಗಿ ಶನಿವಾರ ಹಕ್ಕು ಮಂಡಿಸಿದರು.
ಅಪರಾಹ್ನ 3 ಗಂಟೆಗೆ ರಾಜಭವನದಲ್ಲಿ ರಾಜ್ಯಪಾಲ ಕೆ.ಶಂಕರನಾರಾಯಣ್ ಅವರನ್ನು ಭೇಟಿ ಮಾಡಿ 43 ಸದಸ್ಯರ ಬೆಂಬಲ ಪತ್ರವನ್ನು ಒಪ್ಪಿಸಿ, ಸರಕಾರ ರಚನೆಗೆ ಅನುವು ಮಾಡುವಂತೆ ಕೋರಿದರು.
ಇತ್ತೀಚೆಗೆ ಮುಕ್ತಾಯವಾದ ವಿಧಾನಸಭೆ ಚುನಾವಣೆಯಲ್ಲಿ ಜೆಎಂಎಂ 18 ಸ್ಥಾನಗಳನ್ನು ಗೆದ್ದು ಅತಿದೊಡ್ಡ ಪಕ್ಷವಾಗಿ ಮೂಡಿ ಬಂದಿತ್ತು. ಅದಕ್ಕೆ ಬಿಜೆಪಿ ಮಿತ್ರಕೂಟದ 18 ಹಾಗೂ ಅಖಿಲ ಜಾರ್ಖಂಡ್ ವಿದ್ಯಾರ್ಥಿ ಒಕ್ಕೂಟ (ಎಜೆಎಸ್ಯು)ದ 6 ಶಾಸಕರ ಬೆಂಬಲ ದೊರೆತಿದೆ.