Feedback
Print
ಕಿಂಗ್ ಖಾನ್ ಹೆಸರು ಶಾರುಖ್ ಅಲ್ಲ, ಅಭಿನವ್! 
 | ||
|
ಗೌರಿ ಖಾನ್ ಒಬ್ಬ ಒಳಾಂಗಣ ವಿನ್ಯಾಸಕಿ. ಜತೆಗೆ ಸದ್ಗೃಹಿಣಿ, ಇಬ್ಬರು ಮಕ್ಕಳ ಮುದ್ದಿನ ಅಮ್ಮ. ಅಷ್ಟೇ ಅಲ್ಲ, ಚಿತ್ರ ನಿರ್ಮಾಪಕಿ ಕೂಡಾ. ಬಾಲಿವುಡ್‌ನ ಬಹುತೇಕ ನಟ-ನಟಿಯರು ತಮ್ಮ ಚಿತ್ರರಂಗದ ಜೀವನದೊಂದಿಗೆ ಖಾಸಗಿ ಜೀವನವನ್ನು ಸುಗಮವಾಗಿ ನಡೆಸಲು ಕಷ್ಟವಾಗಿ, ವಿಚ್ಛೇದನಕ್ಕೋ, ಮೂರ್ನಾಲ್ಕು ಮದುವೆಯಿಂದಲೋ, ಅಥವಾ ಇನ್ನಾವುದೋ ವಿವಾಹ ಬಾಹಿರ ಸಂಬಂಧಗಳಿಂದಲೋ ಗಾಸಿಪ್ಪಿಗೆ ತುತ್ತಾಗುತ್ತಲೇ ಇದ್ದರೂ, ಶಾರುಖ್- ಗೌರಿಯರದು ಸುಖೀ ದಾಂಪತ್ಯ.
ಶಾರುಖ್ ಬೆಳೆಯಲು ಆತನ ಬೆನ್ನೆಲುಬಾಗಿ ನಿಂತಿರುವುದು ಆತನ ಪತ್ನಿ ಗೌರಿ ಖಾನ್ ಎಂಬುದು ಜಗಜ್ಜಾಹೀರು. ಹಾಗಾದರೆ ಶಾರುಖ್ ಯಶಸ್ಸಿನ ಹಿಂದಿರುವ ಮಹಿಳೆ ಗೌರಿಯೇ ಎಂದು ಪ್ರಶ್ನಿಸಿದರೆ ಆಕೆ ''ಖಂಡಿತ, ಅಲ್ಲಪ್ಪಾ. ನಾನು ಆತನ ಬೆನ್ನೆಲುಬಲ್ಲ. ಆತನೇ ಕಷ್ಟಪಟ್ಟು ಮೇಲೆ ಬಂದ. ಶಾರುಖ್ ಜತೆಗೆ ದೆಹಲಿಯಿಂದ ಬಾಂಬೆಗೆ ಬರಲು ನನಗೆ ಇಷ್ಟವೇ ಇರಲಿಲ್ಲ. ಶಾರುಖ್ ಸ್ಟಾರ್ ಆದಾಗಲೂ ಮೊದಲೆಲ್ಲ ನನಗೆ ನಂಬಲು ಆಗುತ್ತಲೇ ಇರಲಿಲ್ಲ. ಇದು ನನ್ನ ಪಾಲಿಗೆ ದೊಡ್ಡ ಶಾಕ್ ಆಗಿತ್ತು. ಆದರೆ, ಈ ಮಟ್ಟಕ್ಕೆ ಮೇಲೆ ಬರಲು ಶಾರುಖ್ ಪಾತ್ರ ಬಹಳ ದೊಡ್ಡದು. ಅವನು ತುಂಬ ಹಾರ್ಡ್ ವರ್ಕರ್.''
''ಆಗಿನ ದಿನಗಳೂ ತುಂಬ ಕಷ್ಟದ್ದಾಗಿತ್ತು. ಶಾರುಖ್‌ನ ಫಿಲ್ಮ್ ಉತ್ತಮವಾಗಿ ಹೊರಬರಲು ನನಗೆ ಇಷ್ಟವೇ ಇರಲಿಲ್ಲ. ಆತನ ಚಿತ್ರ ಫ್ಲಾಪ್ ಆದರೆ ಚೆನ್ನಾಗಿತ್ತು, ಅಂತ ನಾನು ಎಷ್ಟೋ ಬಾರಿ ಯೋಚಿಸಿದ್ದೆ. ಫ್ಲಾಪ್ ಆದರೆ ಮತ್ತೆ ದೆಹಲಿಗೆ ಹೋಗಬಹುದಲ್ಲ ಅನ್ನೋದೇ ಇದಕ್ಕೆ ಕಾರಣ. ಯಾಕೆಂದರೆ ಆಗ ನನಗೆ ಬಾಂಬೆ ತೀರಾ ಹೊಸದು. ಜತೆಗೆ ನನಗಾಗ ಕೇವಲ 21 ವಯಸ್ಸು. ಅಷ್ಟು ಸಣ್ಣ ವಯಸ್ಸಿಗೆ ಹೊಸ ಜಗತ್ತನ್ನು ನೋಡುತ್ತಿದ್ದೆ. ಹೀಗಾಗಿ ಫ್ಲಾಪ್ ಆದರೆ ಮತ್ತೆ ದೆಹಲಿ ವಾಪಾಸಾಗೋಣ ಶಾರುಖ್ ಜತೆಗೆ ಅಂತಲೇ ಯೋಚಿಸುತ್ತಿದ್ದೆ.''
''ಆದರೆ, ಶಾರುಖ್ ತುಂಬ ಮಹತ್ವಾಕಾಂಕ್ಷಿ. ಬಾಲ್ಯದಿಂದಲೂ ಹಾಗೆಯೇ ಆತ. ಸ್ಕೂಲ್, ಕಾಲೇಜು ದಿನಗಳಲ್ಲೂ ಎಲ್ಲದರಲ್ಲೂ ಮುಂದಿದ್ದ ಶಾರುಖ್ ತನ್ನ ಮಹತ್ವಾಕಾಂಕ್ಷೆಗಾಗಿ ಕಷ್ಟಪಟ್ಟು ಕೆಲಸ ಮಾಡುತ್ತಿದ್ದ. ಆತ ವಿದ್ಯಾರ್ಥಿಯಾಗಿದ್ದ ದಿನಗಳಲ್ಲಿ ಫುಟ್ಬಾಲ್, ಹಾಕಿ, ನಾಟಕ ಹೀಗೆ ಎಲ್ಲ ವಲಯದಲ್ಲೂ ಕ್ರಿಯಾಶೀಲ. ಜತೆಗೆ ಆತ ಆಗ ಮುಟ್ಟಿದ್ದೆಲ್ಲ ಚಿನ್ನವಾಗುತ್ತಿತ್ತು. ಈಗಲೂ ಹಾಗೆಯೇ. ನಾನು ಅವನನ್ನು ಗಂಡನಾಗಿ ಪಡೆದುದಕ್ಕೆ ಖುಷಿಯಿದೆ. ನಾನು ಒಬ್ಬ ಒಳ್ಳೆಯ ಹಾಗೂ ಸರಿಯಾದ ವ್ಯಕ್ತಿಯನ್ನೇ ಜೀವ ಸಂಗಾತಿಯಾಗಿ ಆಯ್ಕೆ ಮಾಡಿದ್ದೇನೆ ಎಂದು ನನಗನಿಸುತ್ತಿದೆ.''
''ಹದಿಹರೆಯದಲ್ಲೇ ನಾನು ಶಾರುಖ್ ಭೇಟಿಯಾಗಿದ್ದು. ವಿದ್ಯಾರ್ಥಿ ಜೀವನದಲ್ಲೇ ನನಗೆ ಶಾರುಖ್‌ಗೆ ಲವ್ ಇತ್ತು. ಆ ದಿನಗಳಲ್ಲಿ ನಾನು ಇಷ್ಟಪಟ್ಟ ಏಕೈಕ ಪುರುಷ ಶಾರುಖ್. ಅದೇ ಈಗಲೂ'' ಎನ್ನುತ್ತಾರೆ ಗೌರಿ.
 | ||
|
''ದೆಹಲಿಯಲ್ಲಿದ್ದ ನನಗೆ ಎಲ್ಲವನ್ನು ತೊರೆದು ಬಾಂಬೆಗೆ ಬರಲು ತುಂಬ ಕಷ್ಟವಾಯಿತು. ಆರಂಭದ ದಿನಗಳಲ್ಲಿ ಬಾಂಬೆ ಜೀವನ ನನಗೆ ಬಹಳ ಕಷ್ಟವೆನಿಸಿತು. ಅದೊಂದು ಭಯಂಕರ ಅನುಭವ. ಆದರೂ ನಾನು ಶಾರುಖ್ ಜತೆಗೆ ಎಲ್ಲವನ್ನೂ ಎಂಜಾಯ್ ಮಾಡುತ್ತಿದ್ದೆ. ಹೊಸ ಮನೆ, ಹೊಸ ಪ್ರಪಂಚ, ಹೊಸ ಜೀವನ, ಜತೆಗೆ ಹೊಸ ಸ್ಥಳ. ಆದರೆ, ನಾವಿಬ್ಬರೂ ಆ ದಿನಗಳಲ್ಲಿ ಆಗಾಗ ದೆಹಲಿ ಹೋಗಿಬರುತ್ತಿದ್ದೆವು.''
''ಬಾಂಬೆಗೆ ಬಂದಾಗ ಮೊದಲು ಅಜೀಜ್ ಮಿರ್ಜಾ ಎಂಬವರ ಮನೆಯಲ್ಲಿ ಆರು ತಿಂಗಳ ಕಾಲ ಇದ್ದೆವು. ಅವರು ತುಂಬ ಒಳ್ಳೆಯವರು. ನಂತರ ನಾವೊಂದು ಬಾಡಿಗೆ ಫ್ಲಾಟ್‌ಗೆ ಶಿಫ್ಟ್ ಆದೆವು. ಆದರೆ ಆ ಮನೆಯಲ್ಲಿ ಏನೂ ಇರಲಿಲ್ಲ. ಒಮ್ಮೆ ಆ ಮನೆಗೆ ದೆಹಲಿಯಿಂದ ನನ್ನ ಅಮ್ಮ ಬಂದರು. ಅಮ್ಮನಿಗೆ ನನ್ನ ಸ್ಥಿತಿ ನೋಡಿ ಶಾಕ್ ಆಯಿತು. ಯಾಕೆಂದರೆ ಮನೆಯಲ್ಲಿ ಮಲಗಲು ನಮ್ಮ ಬಳಿ ಹಾಸಿಗೆ ಇರಲಿಲ್ಲ, ಸೋಫಾ ಇರಲಿಲ್ಲ, ಒಂದು ಕುರ್ಚಿಯೂ ಇರಲಿಲ್ಲ. ಕೇವಲ ಅಡುಗೆಮನೆಯೇ ನಮ್ಮ ಮನೆಯಾಗಿತ್ತು. ಅಮ್ಮ ಇದನ್ನೆಲ್ಲ ನೋಡಿ ಪ್ರಶ್ನೆಗಳ ಮಳೆಯನ್ನೇ ಸುರಿಸಿದರು. 'ಯಾಕೆ ಮನೆಯಲ್ಲಿ ಸೋಫಾ ಇಲ್ಲ, ಯಾಕೆ ಮಲಗಲು ಬೆಡ್ ಇಲ್ಲ?' ಎಂದೆಲ್ಲ ಕೇಳಿದಳು. ಆಗ ನಾನು ಅಡುಗೆ ಮನೆಯ ನೆಲವನ್ನೇ ತೋರಿಸಿ, 'ಇದೇ ನಮ್ಮ ಬೆಡ್' ಅಂದೆ'' ಎಂದು ನಗುತ್ತಾರೆ ಗೌರಿ.
ಅಂದಹಾಗೆ ''ಮನೆಯಲ್ಲೇ ಮಕ್ಕಳೊಂದಿಗೆ ಶಾರುಖ್ ಜತೆಗೆ ಕಾಲ ಕಳೆಯುವುದೆಂದರೆ ನನಗೆ ತುಂಬ ಇಷ್ಟ. ಅದು ನನ್ನ ಜೀವನದ ಅತ್ಯಂತ ಖುಷಿಯ ಕ್ಷಣಗಳು'' ಎನ್ನುತ್ತಾರೆ ಗೌರಿ.
 | ||
|