ದಕ್ಷಿಣ ಭಾರತದ ತಮಿಳುನಾಡು, ಕೇರಳ ಮತ್ತು ಒರಿಸ್ಸಾಗಳಲ್ಲಿ ಕಾಲಿಟ್ಟ ಬೆನ್ನಿಗೆ 'ಟಾಟಾ ಡೊಕೊಮೊ' ಇದೀಗ ಕರ್ನಾಟಕಕ್ಕೂ ವ್ಯಾಪಿಸಿದೆ. ಸೆಕುಂಡುಗಳ ಲೆಕ್ಕಾಚಾರದಲ್ಲಿ ಪಾವತಿಸಿ ಎಂದೇ ಪ್ರಸಿದ್ಧಿಗೆ ಬರುತ್ತಿರುವ ಟಾಟಾ ಜಿಎಸ್ಎಂ ಗುರುವಾರ ಬೆಂಗಳೂರಿನಲ್ಲಿ ಉದ್ಗಾಟನೆಗೊಂಡಿತು.
ಟಾಟಾ ಟೆಲಿಸರ್ವಿಸಸ್ನ ಜಿಎಸ್ಎಂ ವಿಭಾಗ 'ಟಾಟಾ ಡೊಕೊಮೊ' ಕರ್ನಾಟಕದಲ್ಲಿ ಕಾರ್ಯಾರಂಭ ಮಾಡಿದ್ದು, ಸೇವೆಗಳನ್ನು ದೇಶದಾದ್ಯಂತ ವಿಸ್ತರಿಸುವ ಸಲುವಾಗಿ 2 ಬಿಲಿಯನ್ ಡಾಲರ್ ವೆಚ್ಚ ಮಾಡುವುದಾಗಿ ಹೇಳಿಕೊಂಡಿದೆ. ವರ್ಷಾಂತ್ಯದೊಳಗೆ ಎಲ್ಲವನ್ನೂ ಮಾಡಿ ಮುಗಿಸುವುದಾಗಿ ಕಂಪನಿ ಭರವಸೆಯನ್ನೂ ನೀಡಿದೆ.
ಇದಕ್ಕಾಗಿ ಕರ್ನಾಟಕದಲ್ಲಿ ಕಂಪನಿಯು 150 ಮಿಲಿಯನ್ ಡಾಲರುಗಳನ್ನು ವ್ಯಯಿಸಲಿದೆ ಎಂದು ಟಾಟಾ ಟೆಲಿಸರ್ವಿಸಸ್ನ ವ್ಯವಸ್ಥಾಪಕ ನಿರ್ದೇಶಕ ಅನಿಲ್ ಸರ್ದಾನಾ ಪತ್ರಕರ್ತರಿಗೆ ತಿಳಿಸಿದ್ದಾರೆ.
ಮುಂದಿನ ವಾರದಲ್ಲಿ ಇನ್ನಷ್ಟು ರಾಜ್ಯಗಳನ್ನು ಟಾಟಾ ಡೊಕೊಮೊ ವ್ಯಾಪಿಸಲಿದೆ. 'ಬಳಸಿದಕ್ಕಷ್ಟೇ ಪಾವತಿಸಿ' ಎಂಬುದು ಟಾಟಾ ಜಿಎಸ್ಎಂ ಘೋಷ ವಾಕ್ಯ. ಪ್ರತೀ ಸೆಕುಂಡುಗಳನ್ನೂ ಗಣನೆಗೆ ತೆಗೆದುಕೊಳ್ಳುವ ಈ ನೆಟ್ವರ್ಕ್ ಸೆಕುಂಡಿಗೆ ಒಂದು ಪೈಸೆಯಂತೆ ದರ ನಿಗದಿಪಡಿಸಿದೆ. ಇದರಿಂದ ಗ್ರಾಹಕರಿಗೆ ಹೆಚ್ಚಿನ ಉಪಯೋಗವಾಗಲಿದೆ ಎಂದು ಅವರು ಇದೇ ಸಂದರ್ಭದಲ್ಲಿ ವಿವರಿಸಿದ್ದಾರೆ.
ಕರ್ನಾಟಕದಲ್ಲಿ ಟಾಟಾ ಜಿಎಸ್ಎಂ ಸೇವೆಯು ರೈಲ್ವೇ ವಲಯಗಳು, ರಾಷ್ಟ್ರೀಯ ಹೆದ್ದಾರಿಗಳು ಸೇರಿದಂತೆ 427 ನಗರಗಳು ಹಾಗೂ 2,642 ಹಳ್ಳಿಗಳಲ್ಲಿ ಪ್ರಸಕ್ತ ಲಭ್ಯವಿದೆ. ಕರ್ನಾಟಕದಿಂದ ಭಾರತದ ಯಾವುದೇ ಮೂಲೆಗೆ ಸೆಕುಂಡಿಗೆ ಕೇವಲ ಒಂದು ಪೈಸೆಯಂತೆ ಕರೆ ಮಾಡುವ ವಿಶೇಷತೆಯನ್ನು ಟಾಟಾ ಡೊಕೊಮೊ ಹೊಂದಿದೆ.
|