ಆಸ್ಟ್ರೇಲಿಯದಲ್ಲಿ ಜನಾಂಗೀಯ ದ್ವೇಷದ ದಾಳಿಗಳಿಗೆ ಪ್ರತಿಭಟನೆ ಸೂಚಿಸಲು ಭಾರತೀಯ ವಿದ್ಯಾರ್ಥಿಗಳ ಒಕ್ಕೂಟದ ರ್ಯಾಲಿ ನಡೆದ ಬೆನ್ನಲ್ಲೇ ಹೈದಾರಾಬಾದ್ನ ಟ್ಯಾಕ್ಸಿ ಚಾಲಕನೊಬ್ಬನಿಗೆ ಆಸ್ಟ್ರೇಲಿಯ ವ್ಯಕ್ತಿಯೊಬ್ಬ ಹಲ್ಲೆ ಮಾಡಿದ ಘಟನೆ ನಡೆದಿದೆ.
35 ವರ್ಷ ವಯಸ್ಸಿನ ಟ್ಯಾಕ್ಸಿ ಚಾಲಕ ಕುಡಿದ ಮತ್ತಿನಲ್ಲಿದ್ದ ಪ್ರಯಾಣಿಕನನ್ನು ಬ್ಲಾಕ್ಬರ್ನ್ ಉಪನಗರದ ಚಾಪೆಲ್ ಬೀದಿಯಲ್ಲಿ ಹತ್ತಿಸಿಕೊಂಡಿದ್ದ. ಬ್ಲಾಕ್ಬರ್ನ್ ತಲುಪಿದ ಬಳಿಕ ರಿಂಗ್ವುಡ್ಗೆ ತೆರಳುವಂತೆ ಪ್ರಯಾಣಿಕ ತಿಳಿಸಿದ್ದು, ಅಷ್ಟರಲ್ಲಿ ಟ್ಯಾಕ್ಸಿ ಟೈರ್ ಒಡೆಯಿತೆಂದು ಹೇಳಲಾಗಿದೆ.
ಇದರಿಂದ ಮತ್ತಷ್ಟು ದೂರ ತೆರಳಲು ಚಾಲಕ ತನ್ನ ಅಸಹಾಯಕತೆ ತೋಡಿಕೊಂಡಾಗ ಪ್ರಯಾಣಿಕ ದೂಷಣೆ ಆರಂಭಿಸಿದ.ಬಳಿಕ ದಾಳಿಕೋರ ತನಗೆ ಗುದ್ದಿದ್ದರಿಂದ ಮುಖ, ಕಾಲು ಮತ್ತು ಕೈಗಳಲ್ಲಿ ಗಾಯಗಳಾಗಿದ್ದು ಎರಡು ಹಲ್ಲುಗಳು ಮುರಿದಿದ್ದಾಗಿ ದಾಳಿಯ ಬಳಿಕ ಪ್ರಜ್ಞೆತಪ್ಪಿದ್ದ ಚಾಲಕ ತಿಳಿಸಿದ್ದಾನೆ.ವ್ಯಕ್ತಿಯನ್ನು ಬಳಿಕ ಆಲ್ಫ್ರೆಡ್ ಆಸ್ಪತ್ರೆಗೆ ಸೇರಿಸಲಾಯಿತೆಂದು ತಿಳಿದುಬಂದಿದೆ. |