ಅಟ್ಲಾಂಟಿಕ್ ಸಾಗರಕ್ಕೆ ಬಿದ್ದು ಅಪಘಾತಕ್ಕೀಡಾದ ಏರ್ ಫ್ರಾನ್ಸ್ ವಿಮಾನ ಸಾಗರಕ್ಕೆ ಬೀಳುವ ಮುಂಚೆ ಆಕಾಶದಲ್ಲಿ ಅತ್ಯಂತ ಎತ್ತರದಲ್ಲೇ ಎರಡು ಭಾಗಗಳಾಗಿ ಇಬ್ಭಾಗವಾಗಿದೆ ಎಂದು ಮಾಧ್ಯಮದ ವರದಿಗಳು ಭಾನುವಾರ ತಿಳಿಸಿವೆ.
ರಿಯೊ ಡಿ ಜನೈರೊನಿಂದ ಪ್ಯಾರಿಸ್ಸಿಗೆ ತೆರಳುತ್ತಿದ್ದ ವಿಮಾನವು ಕೆಟ್ಟ ಹವಾಮಾನದಲ್ಲಿ ನಿಯಂತ್ರಣ ತಪ್ಪಿ ಅಪಘಾತವಾಗಿ 80 ಕಿಮೀ ಅಂತರದಲ್ಲಿ ಮೃತದೇಹಗಳು ಪತ್ತೆಯಾದ ಬಳಿಕ ವಿಮಾನ ಎರಡು ಭಾಗವಾಗಿ ಒಡೆದಿದೆಯೆಂದು ತನಿಖೆದಾರರು ತೀರ್ಮಾನಿಸಿದ್ದಾರೆ. ಬ್ರೆಜಿಲ್ ತೀರದಲ್ಲಿ ಪತ್ತೆಯಾದ ದೇಹಗಳನ್ನು ಪರೀಕ್ಷೆ ಮಾಡಿದಾಗ ಸಾಗರಕ್ಕೆ ಬೀಳುವ ಮುಂಚೆಯೇ ಪ್ರಯಾಣಿಕರು ಮೃತಪಟ್ಟಿದ್ದು ಪತ್ತೆಯಾಗಿರುವುದಾಗಿ ಸಂಡೇ ಟೈಮ್ಸ್ ವರದಿ ಮಾಡಿದೆ.
ಸುಮಾರು 35,000 ಅಡಿ ಎತ್ತರದಿಂದ ಬಿದ್ದಿದ್ದರಿಂದ ಗಾಳಿಯ ಒತ್ತಡಕ್ಕೆ ಉಡುಪುಗಳು ಕಳಚಿದ್ದವು. ಗಂಟೆಗೆ 120 ಕಿಮೀ ವೇಗದಲ್ಲಿ ನೀರಿಗೆ ಬಿದ್ದಿದ್ದರಿಂದ ಮ‌ೂಳೆಗಳು ಮುರಿದಿದ್ದವು.
ಸ್ಫೋಟದ ಯಾವುದೇ ಲಕ್ಷಣಗಳಾದ ಸುಟ್ಟ ಗಾಯ ಅಥವಾ ಹೊಗೆ ಸೇವನೆ ಮುಂತಾದವುಗಳ ಅನುಪಸ್ಥಿತಿಯಲ್ಲಿ ವೇಗದ ಸೆನ್ಸರ್‌ಗಳಲ್ಲಿ ಅಡಚಣೆ ಮುಂತಾದ ಅನೇಕ ಅಂಶಗಳ ಆಧಾರದ ಮೇಲೆ ಅಪಘಾತ ಸಂಭವಿಸಿದ್ದಾಗಿ ಹೇಳಲಾಗಿದೆ. ಅಪಘಾತಕ್ಕೆ ಕಳಪೆ ನಿರ್ವಹಣೆಯ ಸ್ಪೀಡ್ ಸೆನ್ಸರ್‌ಗಳು ಕೊಡುಗೆ ನೀಡಿವೆ ಎಂದು ಏರ್ ಫ್ರಾನ್ಸ್ ಮುಖ್ಯ ಎಕ್ಸಿಕ್ಯೂಟಿವ್ ಪೀರೆ ಹೆನ್ರಿ ಗುರ್ಗಾನ್ ತಿಳಿಸಿದ್ದಾರೆ. | 
ಸಲಹೆ/ಪ್ರತಿಕ್ರಿಯೆ
ಮಿತ್ರನಿಗೆ ಕಳುಹಿಸಿ
ಈ ಪುಟ ಮುದ್ರಿಸಿ